ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି ଖେଳ ସହିତ ନିଜର ଫ୍ୟାଶନ ଏବଂ ଷ୍ଟାଇଲ୍ ପାଇଁ ବେଶ୍ ପରିଚିତ। ବୋଧେ କମ୍ ଲୋକ ଜାଣିଥିବେ କୋହଲିଙ୍କ ଡାକନାମ ଚିକୁ। କୋହଲିଙ୍କୁ ତାଙ୍କ ସାଥୀ ଖେଳାଳିମାନେ ଏହି ନାମରେ ଡାକିଥାନ୍ତି। ବିଶେଷକରି ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ କୋହଲିଙ୍କୁ ଚିକୁ ନାମରେ ଡାକିଥାନ୍ତି। ମାହି ହିଁ କୋହଲିଙ୍କୁ ଏହି ନାମରେ ବେଶ୍ ପ୍ରସିଦ୍ଧ କରାଇଥିଲେ। ଏହି ନାଁ ଯୋଗୁ ବିରାଟ ଦିନେ କପିଲ ଶର୍ମା ଶୋ’ରେ ଅଜବ ପରିସ୍ଥିତିର ସାମ୍ନା କରିଥିଲେ।
କପିଲ ଶର୍ମାଙ୍କ ଶୋ’ରେ ଉପସ୍ଥିତ ଥିବା ଅତିଥିଙ୍କୁ ସାଧାରଣ ଜନତା ପ୍ରଶ୍ନ କରିଥାନ୍ତି। ଏହିକ୍ରମରେ ଜଣେ ମହିଳା ପ୍ରଶଂସକ କୋହଲିଙ୍କୁ ପଚାରିଲେ, ‘ମୁଁ ଶୁଣିଛି ବିରାଟଙ୍କ ଡାକନାମ ଚିକୁ। ମୁଁ ଜାଣିବାକୁ ଚାହୁଁଛି ଚିକୁ ପରି ବିରାଟ କ’ଣ ସ୍ବାଦିଷ୍ଟ। ଏହି ସମୟରେ ନବଜୋତ ସିଂହ ସିଦ୍ଧୁ ତୁରନ୍ତ ମଜାଳିଆ ଢଙ୍ଗରେ ମହିଳା ପ୍ରଶଂସକଙ୍କୁ କହିଥିଲେ, ଚାଖି କି ଦେଖିନିଅନ୍ତୁ ମିଠା କି ନୁହେଁ। ଏହା ପରେ କୋହଲି କହିଲେ ସେକ୍ କରି ପିଇ ନିଅନ୍ତୁ ଜଣାପଡ଼ିଯିବ।
ପରେ ବିରାଟ ଏହି ନାଁ ପଛରେ ଏକ କାହାଣୀ କହିଥିଲେ। ସେ କହିଲେ ଧୋନୀଙ୍କ ଯୋଗୁ ହିଁ ଏହି ନାଁରେ ତାଙ୍କୁ ସମସ୍ତେ ଜାଣିଲେ। ସେ ପଡ଼ିଆରେ ସବୁବେଳେ ମୋତେ କୁହନ୍ତି, ଚିକୁ ଇଆଡ଼େ ଯାଅ, ଚିକୁ ସିଆଡ଼େ ଯାଅ। ଧୋନୀ ଏବେ ବିରାଟ ଡାକିଲେ ମୋତେ ଆଦୌ ଭଲ ଲାଗେନା। ପଡ଼ିଆରେ ଥରେ ଜଣେ ଦର୍ଶକ କହିଲେ ଚେିକୁ ଗୋଟିଏ ଫଟୋ ହୋଇଯାଉ। ମୋତେ ଲାଗିଲା ପଡ଼ୋଶୀ ବୋଧେ କିଏ ଏହି ନାଁରେ ମୋତେ ଡାକୁଛନ୍ତି। କିନ୍ତୁ ମୁଁ ପରେ ଜାଣିଲି ଧୋନୀ ମୋତେ ଏହି ନାଁରେ ଡାକୁଥିବାରୁ ଲୋକେ ବି ଡାକିବା ଆରମ୍ଭ କଲେଣି। ପ୍ରଥମେ ମୋ କୋଚ୍ ଚିକୁ ଡାକୁଥିଲେ। ପରେ ଧୋନୀ ସବୁବେଳେ ମୋତେ ଏହି ନାଁରେ ଡାକିବାକୁ ଲାଗିଲେ। ଯେଉଁଥିପାଇଁ ଚିକୁ ନାଁଟି ପ୍ରସିଦ୍ଧ ହୋଇଗଲା।
