ନୂଆଦିଲ୍ଲୀ,୨୪।୮: ଭାରତର ପୂର୍ବତନ ଅଧିନାୟକ ବିରାଟ କୋହଲି କିଛି ଦିନ ହେବ ଖରାପ ଫର୍ମ ଦେଇ ଗତି କରୁଛନ୍ତି। ଏଥିପାଇଁ ତାଙ୍କୁ ସମାଲୋଚନା କରାଯାଉଛି। ନଭେମ୍ବର ୨୦୧୯ ଠାରୁ କୋହଲି ଅନ୍ତର୍ଜାତୀୟ କ୍ରିକେଟରେ ଶତକ ହାସଲ କରିନାହାଁନ୍ତି। ଗତ ମାସରେ ଇଂଲଣ୍ଡ ବିପକ୍ଷ ସିରିଜ ପରେ ସେ ବିରତି ନେଇଥିଲେ। ଏବେ ବିରାଟ ଟିମ ଇଣ୍ଡିଆକୁ ଫେରିଛନ୍ତି। ସେ ଏସିଆ କପରେ ରନ ସ୍କୋର କରିବାକୁ ପ୍ରସ୍ତୁତ ଅଛନ୍ତି। ଟୁର୍ଣ୍ଣାମେଣ୍ଟ ପୂର୍ବରୁ କୋହଲି ତାଙ୍କ ଫର୍ମକୁ ନେଇ ମୁହଁ ଖୋଲି ଆଲୋଚକଙ୍କୁ କଡ଼ା ଜବାବ ଦେଇଛନ୍ତି।
ଏସିଆ କପ୍ର ଷ୍ଟାର୍ ସ୍ପୋର୍ଟସ ବ୍ରଡକାଷ୍ଟରର କାର୍ଯ୍ୟକ୍ରମ ‘ଗେମ ପ୍ଲାନ’ରେ ବିରାଟ କହିଛନ୍ତି, କୋ ବ୍ୟାଟିଂରେ କୌଣସି ଅସୁବିଧା ନାହିଁ। ମୁଁ ନିଶ୍ଚିତ ଯେ ଖୁବ୍ଶୀଘ୍ର ଖରାପ ପର୍ଯ୍ୟାୟରୁ ବାହାରିବି। ଅନେକ ଥର ମୁଁ ଅନୁଭବ କରେ ଯେ ଗତି ଫେରି ଆସିଛି, ତେଣୁ ଏହା ମୋତେ ଦର୍ଶାଏ ଯେ ମୁଁ ଭଲ ବ୍ୟାଟିଂ କରୁଛି। ମୁଁ ଜାଣେ ମୁଁ କଣ କରୁଛି। ଯଦି ଆପଣ କଠିନ ପରିସ୍ଥିତି ଏବଂ ଭିନ୍ନ ବୋଲିଂର ସମ୍ମୁଖୀନ ହେବାକୁ ପ୍ରସ୍ତୁତ ନୁହଁନ୍ତି, ତେବେ ଆପଣ ଅନ୍ତର୍ଜାତୀୟ କ୍ରିକେଟରେ ସେତେ ଦୂର ଯାଇପାରିବେ ନାହିଁ। ମୁଁ ଏଥିରୁ ଶିଖିବାକୁ ଚାହେଁ ଏବଂ ଜଣେ ଖେଳାଳି ଏବଂ ମଣିଷ ଭାବରେ ମୋ ପାଇଁ ମୂଳ ମୂଲ୍ୟ କ’ଣ ତାହା ବୁଝିବାକୁ ଚେଷ୍ଟା କରେ। ମୁଁ ଜାଣେ ଉତ୍ଥାନ-ପତନ ହେବ। ମୁଁ ମଧ୍ୟ ଏହି ପର୍ଯ୍ୟାୟରୁ ବାହାରକୁ ଆସିବି। ମୋ ଅଭିଜ୍ଞତା ମୋ ପାଇଁ ସ୍ବତନ୍ତ୍ର।
ଏସିଆ କପରେ କ୍ରିକେଟ ବିରତି ପରେ କୋହଲି ଦଳକୁ ଫେରିବା ଉପରେ ସମସ୍ତଙ୍କ ନଜର ରହିବ। ବିରାଟ ବର୍ତ୍ତମାନ କିଛି ସମୟ ପାଇଁ ଖରାପ ଫର୍ମ ସହ ଲଢୁଛନ୍ତି। ଚଳିତ ବର୍ଷ ଶେଷରେ ଅଷ୍ଟ୍ରେଲିଆରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପ ପୂର୍ବରୁ ଏସିଆ କପରେ ଫର୍ମକୁ ଫେରିବା ପାଇଁ ତାଙ୍କର ଏକ ସୁବର୍ଣ୍ଣ ସୁଯୋଗ ରହିଛି।