କୋଲକାତା,୨୮।୩(ପି.ଟି.): ଭାରତର ଅନ୍ୟତମ ଫୁଟ୍ବଲ ଲିଗ୍ ଆଇ- ଲିଗ୍ ଉଦ୍ଯାପିତ ହୋଇଛି। ଏଥର କେରଳ ଗୋକୁଳମ ଏଫ୍ସି ପ୍ରଥମଥର ପାଇଁ ଚାମ୍ପିୟନ ହେବାର ଗୌରବ ଅର୍ଜନ କରିଛି। ସ୍ଥାନୀୟ କିଶୋର ଭାରତୀ କ୍ରୀଡ଼ାଙ୍ଗନରେ ଶନିବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ଗୋକୁଳମ ୪-୧ ଗୋଲରେ ଟିଡିମ ରୋଡ ଆଥଲେଟିକ ୟୁନିୟନ (ଟିଆରଏୟୁ) ଏଫସିକୁ ହରାଇ ଟାଇଟଲ ହାସଲ କରିଛି।
ଏହି ନିର୍ଣ୍ଣାୟକ ମ୍ୟାଚ୍ରେ କେରଳ ସମ୍ପୂର୍ଣ୍ଣ ଭାବେ ଆଧିପତ୍ୟ ବିସ୍ତାର କରି ଖେଳିଥିଲା। ତେବେ ଟିଆରଏୟୁ ତରଫରୁ ପ୍ରଥମ ଗୋଲ ସ୍କୋର କରାଯାଇଥିଲା। ୨୪ତମ ମିନିଟ୍ରେ ବିଦ୍ୟାସାଗର ସିଂ ଗୋଲ ଦେଇ ଟିଆରଏୟୁକୁ ଅଗ୍ରଣୀ କରାଇଥିଲେ। ତେବେ ଏହାପରେ ଗୋକୁଳମ ପ୍ରତ୍ୟାବର୍ତ୍ତନ କରି ଗୋଟିଏ ପରେ ଗୋଟିଏ ଗୋଲ ଦେଇଥିଲା। ଦଳ ତରଫରୁ ଶରିଫ ମହମ୍ମଦ ୬୯, ଏମିଲ ବେନି ୭୪, ଡେନିସ ଆଣ୍ଟିଓ୍ବି ୭୭ ଓ ମହମ୍ମଦ ରସିଦ ଇଞ୍ଜୁରି ଟାଇମର ଷଷ୍ଠ ମିନିଟ୍ରେ ଗୋଲ ଦେଇ ଗୋକୁଳମକୁ ଜିତାଇଥିଲେ। ଏଥିସହିତ ଗୋକୁଳମ ଏଏଫସି କପ୍ର ଆଗାମୀ ସେସନରେ ଗ୍ରୁପ୍ ପର୍ଯ୍ୟାୟ ଖେଳିବାକୁ ଯୋଗ୍ୟତା ହାସଲ କରିଛି। ସେହିପରି ଶନିବାର ଖେଳାଯାଇଥିବା ଅନ୍ୟ ଏକ ମ୍ୟାଚରେ ଚର୍ଚ୍ଚିଲ ବ୍ରଦର୍ସ ୩-୨ ଗୋଲରେ ପଞ୍ଜାବ ଏଫ୍ସିକୁ ପରାସ୍ତ କରିଥିଲା। ୧୫ଟି ଲେଖାଏ ମ୍ୟାଚ୍ ଖେଳି ଗୋକୁଳମ ଓ ଚର୍ଚ୍ଚିଲ ବ୍ରଦର୍ସ ୨୯ ଲେଖାଏ ପଏଣ୍ଟ ପାଇଥିଲେ। ତେବେ ଗୋକୁଳମ ଗୋଲ ବ୍ୟବଧାନରେ ଆଗରେ ରହିଥିଲା।