ଟାଇଗର ଶ୍ରଫଙ୍କ ଅଭିନୀତ ‘ବାଗୀ’କୁ ଏବେ ମଧ୍ୟ ମନେ ପକାଉଛନ୍ତି ଦିଶା ପଟାନି। ହେଲେ କାରଣ କ’ଣ ? ଏହି ଫିଲ୍ମରେ ତ ସେ ଅଭିନୟ କରି ନ ଥିଲେ। ତେବେ ସେହି ଚିତ୍ରକୁ ମନେ ପକାଇଲେ ଉଦାସ ହୋଇଯାଉଛନ୍ତି ଦିଶା। କଥା କ’ଣ କି ଯେତେବେଳେ ଏହି ଫିଲ୍ମର କାଷ୍ଟିଂ ଚାଲିଥିଲା, ସେତେବେଳେ ପ୍ରଥମେ ଏହାର ନାୟିକା ଭୂମିକାରେ ଅଭିନୟ କରିବା ଲାଗି ଦିଶାଙ୍କୁ ଅଫର ଦିଆଯାଇଥିଲା। କିନ୍ତୁ ପରେ ଚକ ଏମିତି ବୁଲିଗଲା ଯେ ଦେଖିଲା ବେଳକୁ ଶ୍ରଦ୍ଧା କପୁରଙ୍କୁ ଏହି ରୋଲ୍ ପାଇଁ ସାଇନ୍ କରାଯାଇଛି। ”ସେତେବେଳେ ‘ବାଗୀ’ ଫିଲ୍ମର ପ୍ରଯୋଜକ ମୋତେ ଏଥିରେ ଅଭିନୟ କରିବାକୁ ଅଫର ଦେଇଥିଲେ। ସେହି ସମୟରେ ମୁଁ ମିସ୍ ଇଣ୍ଡିଆ ଇନ୍ଦୋର’ରେ ରନର୍ସ ଅପ୍ ହୋଇଥିଲି ଏବଂ କେତୋଟି ବିଜ୍ଞାପନ ପାଇଁ କାମ କରିସାରିଥିଲି। ହେଲେ ଦେଖିଲା ବେଳକୁ କାଷ୍ଟିଂରୁ ମୋ ନାମକୁ ବାଦ୍ ଦିଆଯାଇଛି ଏବଂ ଏଥିପାଇଁ ଶ୍ରଦ୍ଧାଙ୍କୁ ସାଇନ୍ କରାଯାଇଛି। ଅବଶ୍ୟ ସେତେବେଳେ ତାହାକୁ ମୁଁ ଗୁରୁତ୍ୱ ଦେଇ ନ ଥିଲି। ହେଲେ ଯଦି ମୋତେ ସେହି ସୁଯୋଗ ମିଳିଥାଆନ୍ତା ତେବେ ଫିଲ୍ମଟି ମୋ କ୍ୟାରିୟର ପାଇଁ ମାଇଲେଜ ସାବ୍ୟସ୍ତ ହୋଇପାରିଥାଆନ୍ତା ବୋଲି କହନ୍ତି ଦିଶା।“ ଲକ୍ଷ୍ନୋସ୍ଥିତ ଆମିଟି ୟୁନିଭର୍ସିଟିରୁ ଦିଶା କମ୍ପ୍ୟୁଟର ସାଇନ୍ସରେ ବି.ଟେକ୍ ଡିଗ୍ରୀ ହାସଲ କରିଛନ୍ତି। ତାଙ୍କର ମନ ପସନ୍ଦୀୟ ଫିଲ୍ମଟି ହେଲା ‘ବର୍ଫି’। ଅବସର ମିଳିଲେ ସେ ମନ ପସନ୍ଦର ଖାଦ୍ୟ ଖାଆନ୍ତି ଏବଂ ଡ୍ୟାନ୍ସ ପ୍ରାକ୍ଟିସ କରନ୍ତି। ତାଙ୍କର ବେଷ୍ଟ ଫ୍ରେଣ୍ଡ ହେଉଛନ୍ତି ନୋରା ଫତେହି।
