ମସ୍କୋ,୧୭।୨ : ମୁଁ ମୋର ଶତ୍ରୁମାନଙ୍କୁ କେବେବି କ୍ଷମା କରେ ନାହିଁ । ଏହି ଉକ୍ତି ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ପାଇଁ ସମ୍ପୂର୍ଣ୍ଣ ଫିଟ ଅଟେ। ପୁଟିନଙ୍କ ବିଷୟରେ କୁହାଯାଇଛି ସେ ନିଜ ପ୍ରତିପକ୍ଷଙ୍କୁ କଦାପି କ୍ଷମା କରନ୍ତି ନାହିଁ। ତାଙ୍କର କଡ଼ା ସମାଲୋଚକ ତଥା ରାଜନୈତିକ ପ୍ରତିଦ୍ୱନ୍ଦ୍ୱୀ ଆଲେକ୍ସାଇ ନାଭାଲନିଙ୍କ ମୃତ୍ୟୁ ମାମଲାରେ ଏହା ପୁଣି ଘଟିଛି। ନାଭାଲନିଙ୍କ ବ୍ୟତୀତ ଅନେକ ଲୋକ ଅଛନ୍ତି ଯେଉଁମାନେ ପୁଟିନଙ୍କ ବିରୋଧରେ ବିଦ୍ରୋହ ଯୋଗୁ ନିଜର ଜୀବନ ଦେଇଛନ୍ତି ଅବା କେତେକଙ୍କୁ ଦେଶ ବାହାରେ ରହିବାକୁ ପଡିଛି।
ଆଲେକ୍ସୀ ନାଭାଲ୍ନି ପୁଟିନଙ୍କ ବିରୋଧରେ ଅନେକ ବିରୋଧ ପ୍ରଦର୍ଶନ କରିଥିଲେ। ସେ ପୁଟିନଙ୍କ ସବୁଠାରୁ ବଡ ପ୍ରତିଦ୍ୱନ୍ଦ୍ୱୀ ଭାବରେ ଉଭା ହୋଇଥିଲେ, କିନ୍ତୁ ଫେବୃଆରୀ ୧୬ ରେ ଜେଲରେ ବୁଲୁଥିବାବେଳେ ରହସ୍ୟମୟ ଭାବରେ ତାଙ୍କର ମୃତ୍ୟୁ ହୋଇଥିଲା। ଏହାପୂର୍ବରୁ ନାଭାଲନିଙ୍କୁ ଅନେକ ଥର ହତ୍ୟା କରିବାକୁ ଚେଷ୍ଟା କରାଯାଇଥିଲା। ସାଇବେରିଆରୁ ମସ୍କୋ ଅଭିମୁଖେ ଯାତ୍ରା କରୁଥିବା ସମୟରେ ତାଙ୍କୁ ବିଷ ଦିଆଯାଇଥିଲା, ଯାହା ତାଙ୍କୁ କୋମାରେ ପକାଇଥିଲା। ତାଙ୍କୁ ବର୍ଲିନକୁ ନିଆଯାଇଥିଲା। ତେବେ ଏହା ପରେ ମଧ୍ୟ ସେ ରୁଷିଆକୁ ଫେରିବାକୁ ସ୍ଥିର କରିଥିଲେ, ଯାହା ପରେ ତାଙ୍କୁ ଗିରଫ କରାଯାଇଥିଲା।
ନାଭାଲନିଙ୍କ ପୂର୍ବରୁ, ଗତ ବର୍ଷ ଅଗଷ୍ଟରେ ବିମାନ ଦୁର୍ଘଟଣାରେ ୟେଭେଗେନି ପ୍ରିଗୋଜିନଙ୍କର ମୃତ୍ୟୁ ହୋଇଥିଲା। ପ୍ରିଗୋଜିନ ୱାଗନର୍ ଗ୍ରୁପ ର ମୁଖ୍ୟ ଥିଲେ। ସେ ପୁଟିନଙ୍କ ବିରୁଦ୍ଧରେ ବିଦ୍ରୋହ କରିଥିଲେ। ତାଙ୍କ ସେନା ରୋଷ୍ଟୋଭରୁ ମସ୍କୋ ଅଭିମୁଖେ ଯାତ୍ରା ଆରମ୍ଭ କରିଥିଲା, ଯାହା ପୁଟିନଙ୍କୁ ଏପର୍ଯ୍ୟନ୍ତ ସବୁଠାରୁ ବଡ ଆହ୍ବାନ ବୋଲି କୁହାଯାଉଥିଲା। ତେବେ ପରେ ବେଲାରୁଷର ରାଷ୍ଟ୍ରପତିଙ୍କ ହସ୍ତକ୍ଷେପ ଦ୍ୱାରା ଏହି ବିଦ୍ରୋହକୁ ବନ୍ଦ କରାଯାଇଥିଲା। ଏଥି ସହିତ, ଯେତେବେଳେ ପ୍ରିଗୋଜିନଙ୍କର ମୃତ୍ୟୁ ହୋଇଥିଲା, ସେତେବେଳେ ପୁଟିନ ତାଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା। ତେବେ କ୍ରେମଲିନ ଏହାକୁ ମିଥ୍ୟା ବୋଲି କହି ଖଣ୍ଡନ କରିଥିଲା।
ସାମ୍ବାଦିକ ଆନ୍ନା ପଲିଟକୋଭସ୍କାୟାଙ୍କୁ ୭ ଅକ୍ଟୋବର ୨୦୧୬ ରେ ଭ୍ଲାଦିମିର ପୁଟିନଙ୍କ ଜନ୍ମଦିନରେ ତାଙ୍କ ଘରେ ଗୁଳି କରି ହତ୍ୟା କରାଯାଇଥିଲା। ଚେଚେନ୍ୟାରେ ମାନବିକ ଅଧିକାରର ଉଲ୍ଲଂଘନ ଏବଂ ଦୁର୍ନୀତି ବିରୋଧରେ ଆନ୍ନା ସ୍ବର ଉତ୍ତୋଳନ କରିଥିଲେ। ତାଙ୍କ ମୃତ୍ୟୁ ପରେ ପୁଟିନ ଗଣମାଧ୍ୟମର ସୁରକ୍ଷା ପାଇଁ ପର୍ଯ୍ୟାପ୍ତ ପଦକ୍ଷେପ ଗ୍ରହଣ କରି ନ ଥିବା ଅଭିଯୋଗ ହୋଇଥିଲା।
ବୋରିସ ନେମଟୋଭ ରୁଷିଆର ପୂର୍ବତନ ଉପପ୍ରଧାନମନ୍ତ୍ରୀ ଥିଲେ। ତାଙ୍କୁ ପୁଟିନଙ୍କ କଠୋର ସମାଲୋଚକ ଭାବେ ବିବେଚନା କରାଯାଉଥିଲା। ସେ ଜଣେ ବିରୋଧୀ ଦଳର ନେତା ଥିଲେ। ୨୦୧୫ ୟୁକ୍ରେନ ବିବାଦରେ ରୁଷିଆର ଭୂମିକା ଅନୁସନ୍ଧାନ କରୁଥିବା ବୋରିସ ଏକ ରିପୋର୍ଟ ଉପରେ କାମ କରୁଥିଲେ। ତେବେ ରିପୋର୍ଟ ଶେଷ ହେବା ପୂର୍ବରୁ ତାଙ୍କୁ ଗୁଳି କରି ହତ୍ୟା କରାଯାଇଥିଲା। ସେତେବେଳେ ସେ ତାଙ୍କ ପ୍ରେମିକାଙ୍କ ସହ ଥିଲେ। ତାଙ୍କର ବୟସ ୫୫ ବର୍ଷ ଥିଲା । ପୁଟିନ ବିରୋଧରେ ତାଙ୍କ ହତ୍ୟା ଅଭିଯୋଗ କରାଯାଇଥିଲା, ଯାହା କ୍ରେମଲିନ ମିଥ୍ୟା ବୋଲି କହିଥିଲା।
ଆଲେକ୍ସଜାଣ୍ଡାର୍ ଲିଟଭିନେଙ୍କୋ ରୁଷିଆର ଏଫଏସବି ସୁରକ୍ଷା ସେବାର ପୂର୍ବତନ ଏଜେଣ୍ଟ ଥିଲେ। ସେ ପୁଟିନ ଦୁର୍ନୀତି କରିଥିବା ଅଭିଯୋଗ କରିଛନ୍ତି। ଏହା ସହିତ ମସ୍କୋର ଏକ ଆପାର୍ଟମେଣ୍ଟରେ ଘଟିଥିବା ବୋମା ବିସ୍ଫୋରଣ ପାଇଁ ତାଙ୍କୁ ମଧ୍ୟ ଦାୟୀ କରାଯାଇଥିଲା। ପରବର୍ତ୍ତୀ ସମୟରେ, ନଭେମ୍ବର ୨୦୦୬ରେ, ତାଙ୍କ ଚା’ରେ ବିଷ ମିଶାଇ ତାଙ୍କୁ ହତ୍ୟା କରାଯାଇଥିଲା। ଏହି ହତ୍ୟାକାଣ୍ଡ ପୁଟିନଙ୍କ ନିର୍ଦ୍ଦେଶରେ ହୋଇଥିବା କୁହାଯାଇଥିଲା।
ରୁଷିଆର ଦ୍ୱିତୀୟ ବୃହତ୍ତମ ତୈଳ ଉତ୍ପାଦନକାରୀ ଲୁକୋଏଲ ବୋର୍ଡର ଚେୟାରମ୍ୟାନ ରବିଲ ମାଗାନୋଭ ୟୁକ୍ରେନ ଯୁଦ୍ଧକୁ ଖୋଲାଖୋଲି ସମାଲୋଚନା କରିଥିଲେ। ପରବର୍ତ୍ତୀ ସମୟରେ, ସେପ୍ଟେମ୍ବରରେ ମାଗାନୋଭ ଷଷ୍ଠ ମହଲା ଝରକାରୁ ତଳେ ପଡ଼ିଯିବା ପରେ ମସ୍କୋର ସେଣ୍ଟ୍ରାଲ କ୍ଲିନିକାଲ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା।
ପଲ କ୍ଲେବନିକୋଭ ଜଣେ ରୁଷିଆ ଜନ୍ମିତ ଆମେରିକୀୟ ଅନୁସନ୍ଧାନକାରୀ ସାମ୍ବାଦିକ ଥିଲେ। ୨୦୦୪ରେ ମସ୍କୋରେ ଥିବା ତାଙ୍କ କାର୍ଯ୍ୟାଳୟ ବାହାରେ ତାଙ୍କୁ ଗୁଳି କରି ହତ୍ୟା କରାଯାଇଥିଲା। ସେ ଫୋର୍ବସ ରୁଷିଆର ସମ୍ପାଦକ ଥିଲେ। ସେ ଦୁର୍ନୀତି ବିଷୟରେ ଲେଖିଥିଲେ।
ନାଟାଲିଆ ଏଷ୍ଟେମିରୋଭା ଜଣେ ପୁରସ୍କାର ପ୍ରାପ୍ତ ମାନବ ଅଧିକାର ପ୍ରଚାରକ ଥିଲେ। ୧୯୯୯ ରେ ଚେଚେନ୍ୟାରେ ଦ୍ୱିତୀୟ ଯୁଦ୍ଧ ଆରମ୍ଭରୁ ସେ ପୁଟିନ ବିରୋଧରେ ବହୁ ପ୍ରମାଣ ସଂଗ୍ରହ କରିଥିଲେ। କିଛି ବର୍ଷ ପରେ, ୧୫ ଜୁଲାଇ ୨୦୦୯ ରେ, ତାଙ୍କୁ ଅପହରଣ କରାଯାଇଥିଲା। ପରେ ତାଙ୍କ ମୃତଦେହ ଜଙ୍ଗଲରୁ ମିଳିଥିଲା। ତାଙ୍କ ମୁଣ୍ଡ ଓ ଛାତିରେ ଗୁଳି ବାଜିଥିଲା।