ମୁମ୍ବାଇ,୨୯।୩ : ଅନ୍ୟ କୌଣସି ଫ୍ରାଞ୍ଚାଇଜ ପାଇଁ ଖେଳିବି କଦାପି ଚିନ୍ତା କରି ନ ଥିଲି । ଏଭଳି କହିଛନ୍ତି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)ର ପୂର୍ବତନ ସଦସ୍ୟ ୟୁଜବେନ୍ଦ୍ର ଚହଲ। ଏଥର ରାଜସ୍ଥାନ ରୟାଲ୍ସ ପାଇଁ ଖେଳିବାକୁ ଯାଉଥିବା ଲେଗ୍ ସ୍ପିନର କହିଛନ୍ତି, ମୋର ଆରସିବି ଏବଂ ଫ୍ୟାନ୍ସଙ୍କ ସହିତ ନିବିଡ଼ ସମ୍ପର୍କ ରହିଛି। ମୁଁ ଏହି ଦଳ ପାଇଁ ଅନେକ ମ୍ୟାଚ୍ ଖେଳିଛି। ଆର୍ସିବି ଛଡ଼ା ଅନ୍ୟ କୌଣସି ଫ୍ରାଞ୍ଚାଇଜ ପାଇଁ ଖେଳିବି ବୋଲି କଦାପି ଚିନ୍ତା କରି ନ ଥିଲି। ଲୋକେ ଏବଂ ପ୍ରଶଂସକମାନେ ମୋତେ ଏବେ ବି ପ୍ରଶ୍ନ କରୁଛନ୍ତି ‘ତୁମେ କାହିଁକି ଅଧିକ ଟଙ୍କା ମାଗିଲ ?’। କିନ୍ତୁ ଏଥିରେ ସତ୍ୟତା ନାହିଁ ବୋଲି ସେ କହିଛନ୍ତି।
“ମୋତେ ମାଇକ ହେସନ (ଆର୍ସିବି ଡିରେକ୍ଟର ଅଫ୍ କ୍ରିକେଟ୍) କଲ କରିଥିଲେ। କହିଥିଲେ, ୟୁଜି ଶୁଣ ଆମେ ୩ ଖେଳାଳି(ବିରାଟ କୋହଲି, ଗ୍ଲେନ ମ୍ୟାକ୍ସଓ୍ବେଲ ଏବଂ ମହମ୍ମଦ ସିରାଜ)ଙ୍କୁ ରିଟେନ କରିଛୁ। ତୁମକୁ ଆମେ ଅକ୍ଶନ ଆଣିବୁ। ଏହା ଛଡ଼ା ସେ ମୋତେ କିଛି ପଚାରି ନ ଥିଲି। ମୁଁ ରିଟେନ ହେବାକୁ ଚାହେଁ କି ସେମାନେ ମୋତେ ରିଟେନ କରିବାକୁ ଚାହାନ୍ତି, ସେଭଳି କିଛି ବି କଥା ହୋଇ ନ ଥିଲା। କିନ୍ତୁ ମୁଁ ସର୍ବଦା ବାଙ୍ଗାଲୋର ଫ୍ୟାନଙ୍କ ଲାଗି ସଚ୍ଚୋଟ। ମୁଁ ସେମାନଙ୍କୁ ଖୁବ୍ ଭଲ ପାଏ” ବୋଲି ଚହଲ କହିଛନ୍ତି। ଉଲ୍ଲେଖଯୋଗ୍ୟ, ଚହଲ ଆରସିବି ପାଇଁ ୧୧୩ ମ୍ୟାଚ୍ ଖେଳି ୧୩୯ ଉଇକେଟ ନେଇଛନ୍ତି। ୨୦୧୩ରେ ସେ ମୁମ୍ବାଇ ଇଣ୍ଡିଆନ୍ସ ପକ୍ଷରୁ କେବଳ ଗୋଟିଏ ମ୍ୟାଚ୍ ଖେଳିଥିଲେ।