ନୂଆଦିଲ୍ଲୀ,୩।୨ (ପି.ଟି.): ଅଷ୍ଟ୍ରେଲିଆ ଗସ୍ତରେ ପ୍ରଭାବୀ ପ୍ରଦର୍ଶନ କରି ନିଜ ଘରୋଇ ସହର ଚିନ୍ନାପ୍ପମ୍ପପଟ୍ଟିକୁ ପ୍ରତ୍ୟାବର୍ତ୍ତନ କରିବା ପରେ ଭାରତୀୟ ଯୁବ ଦ୍ରୁତ ବୋଲର ଥଙ୍ଗାରାସୁ ନଟରାଜନଙ୍କୁ ଉଚ୍ଛସ୍ବିତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ନିଜ ହୋମଟାଉନ୍ରେ ଏଭଳି ସ୍ବାଗତ ସମ୍ବର୍ଦ୍ଧନା ଦେଖି ଅଭିଭୂତ ହୋଇଥିଲି ଓ ଏଭଳି ଆତ୍ମିୟତା ମୋତେ ଆଶ୍ଚର୍ଯ୍ୟଚକିତ ହୋଇଥିଲି ବୋଲି ମଙ୍ଗଳବାର ନଟରାଜନ କହିଛନ୍ତି।
ନଟରାଜନଙ୍କ ସ୍ବାଗତ କରିବା ପାଇଁ ତାମିଲନାଡୁର ସାଲେମ ଜିଲାର ସିନାପ୍ପମ୍ପପଟି ଗ୍ରାମରେ ହଜାର ହଜାର ଲୋକ ରାସ୍ତା ଏକାଠି ହୋଇଥିଲେ। ରାସ୍ତା ମଝିରେ ଏକ ରଥସହ ଲୋକମାନେ ଠିଆ ହୋଇଥିଲେ। ଏହି ରଥକୁ ସୁସଜ୍ଜିତ ଘୋଡା ଟାଣିବାର ଦେଖାଯାଇଥିଲା। ଏକା ସମୟରେ ବାଣ ଫୁଟାଯାଇଥିଲା। ସେତେବେଳେ ଏକ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା। କୋଭିଡ୍-୧୯ ପ୍ରୋଟୋକଲକୁ ବେଖାତିର କରି ବହୁ ସଂଖ୍ୟାରେ ଲୋକେ ଏକାଠି ହେବା ସହ ଧ୍ୱସ୍ଥାଧ୍ୱସ୍ତି ହୋଇଥିଲେ। ଏହା ମନମୁଗ୍ଧକର ଥିଲା ବୋଲି ନଟରାଜନ କହିଛନ୍ତି।
ଜଣେ ନେଟ୍ ବୋଲରଭାବେ ନଟରାଜନ ଅଷ୍ଟ୍ରେଲିଆ ଗସ୍ତରେ ଯାଇଥିଲେ। ୨୯ ବର୍ଷୀୟ ତାମିଲନାଡୁର ନଟରାଜନ ଭାରତର ପ୍ରଥମ ନେଟ ବୋଲର ଭାବେ ଗୋଟିଏ ଗସ୍ତରେ ୩ଟି ଯାକ ଫର୍ମାଟରେ ପଦାର୍ପଣ କରିଥିଲେ। ଇଞ୍ଜୁରି କାରଣରୁ ପ୍ରାୟ ଡଜନେ ଖେଳାଳି ବାଦ୍ ପଡିବା ପରେ ଅନ୍ତିମ ଏକାଦଶରେ ସାମିଲ ହେବା ପାଇଁ ନଟରାଜନଙ୍କ ପାଇଁ ସୁଯୋଗ ସୃଷ୍ଟି ହୋଇଥିଲା। ସେ ଅଷ୍ଟ୍ରେଲିଆ ବିପକ୍ଷ ଚତୁର୍ଥ ଓ ଅନ୍ତିମ ଟେଷ୍ଟରେ ଖେଳିବାର ସୁଯୋଗ ହାସଲ କରିଥିଲେ। ଡିସେମ୍ବର ୨ରେ କାନବେରାରେର ତୃତୀୟ ଦିନିକିଆ ଖେଳି ସେ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିଥିଲେ। ଏହି ମ୍ୟାଚ୍ରେ ଭାରତ ୧୩ ରନରେ ବିଜୟ ହାସଲ କରିଥିଲା। ଏହି ମ୍ୟାଚ୍ରେ ୧୦ ଓଭର ବୋଲିଂ କରି ସେ ୭୦ ରନ ବ୍ୟୟ କରିଥିଲେ ମଧ୍ୟ ୨ ଉଇକେଟ ହାସଲ କରି ଭାରତ ବିଜୟରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିଲେ। ଦିନିକିଆ ସିରିଜରେ ଭାରତ ୧-୨ରେ ପରାସ୍ତ ହୋଇଥିଲେ ମଧ୍ୟ ଟି୨୦ ସିରିଜରେ ୨-୧ରେ ବିଜୟୀ ହୋଇଥିଲା। ଟି୨୦ ସିରିଜରେ ସେ ୬ ଉଇକେଟ ଅକ୍ତିଆର କରିଥିଲେ।
