ନୂଆଦିଲ୍ଲୀ,୩୦।୧୦: କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ‘ଚାପ କୌଶଳ’ ଯୋଗୁୁ ନଭେମ୍ବର ୨୦୨୧ରେ ଗୋପୀନାଥ ରବିନ୍ଦ୍ରନଙ୍କୁ କନ୍ନୁର ବିଶ୍ୱବିଦ୍ୟାଳୟର କୁଳପତି ଭାବରେ ପୁନଃ ନିଯୁକ୍ତ କରାଯାଇଥିଲା ବୋଲି ରାଜ୍ୟପାଳ ଆରିଫ ମହମ୍ମଦ ଖାନ୍ ଦାବି କରିଛନ୍ତି। ସୁପ୍ରିମକୋର୍ଟ ରବିନ୍ଦ୍ରନଙ୍କ ନିଯୁକ୍ତିକୁ ବାତିଲ କରିବା ପରେ ଏହି ଦାବି ଆସିଛି।
ସୁପ୍ରିମକୋର୍ଟ ନିଷ୍ପତ୍ତି ପରେ କେରଳ ରାଜ୍ୟପାଳ ଆରିଫ ମହମ୍ମଦ ଖାନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଉପରେ ଟାର୍ଗେଟ୍ କରିଛନ୍ତି। ସେ କହିଛନ୍ତି, ସମଗ୍ର ଚାପ ସିଏମଓରୁ ଆସିଛି ଏବଂ ବିଜୟନଙ୍କ ଆଇନ ପରାମର୍ଶଦାତା ମୋତେ ପ୍ରଭାବିତ କରିବାକୁ ଚେଷ୍ଟା କରିଛନ୍ତି। ମୁଖ୍ୟମନ୍ତ୍ରୀଙ୍କ ଦ୍ୱାରା ବ୍ୟବହୃତ ହୋଇଥିବାରୁ ଶିକ୍ଷା ମନ୍ତ୍ରୀଙ୍କୁ ଦୋଷ ଦେବା ଭୁଲ। ମୋ କାର୍ଯ୍ୟାଳୟକୁ ମନ୍ତ୍ରୀ ନୁହଁନ୍ତି, ବରଂ ଏପରି ଜଣେ ବ୍ୟକ୍ତି ଆସିଥିଲେ ଯିଏ ନିଜକୁ ମୁଖ୍ୟମନ୍ତ୍ରୀଙ୍କ ଆଇନ ପରାମର୍ଶଦାତା ବୋଲି ଦାବି କରିଥିଲେ।
ବର୍ତ୍ତମାନ ପର୍ଯ୍ୟନ୍ତ କେରଳ ସରକାର କିମ୍ବା ମୁଖ୍ୟମନ୍ତ୍ରୀ ଏ ବାବଦରେ କୌଣସି ପ୍ରତିକ୍ରିୟା ଦେଇନାହାଁନ୍ତି। ବିରୋଧୀଦଳ ନେତା ଭି.ଡି ସାଥେସନ ଏବଂ କଂଗ୍ରେସ ନେତା ଶିକ୍ଷା ମନ୍ତ୍ରୀଙ୍କ ଇସ୍ତଫା ଦାବି କରିଛନ୍ତି।