ନୂଆଦିଲ୍ଲୀ,୩୦।୮: ଭାରତୀୟ ବ୍ୟାଟ୍ସମ୍ୟାନ ତଥା ଆଇପିଏଲ ଦଳ ଦିଲ୍ଲୀ କ୍ୟାପିଟାଲ୍ସ ଅଧିନାୟକ ଶ୍ରେୟାସ ଆୟର ଏବେ କାନ୍ଧ ଆଘାତରୁ ସମ୍ପୂର୍ଣ୍ଣ ସୁସ୍ଥ ହୋଇ ପଡିଆକୁ ଫେରିବା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ତାଙ୍କୁ ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟରେ ଖେଳୁଥିବା ଦେଖିବାକୁ ମିଳିବ। ଚଳିତ ବର୍ଷ ମାର୍ଚ୍ଚରେ ଇଂଲଣ୍ଡ ବିପକ୍ଷ ଦିନିକିଆ ସିରିଜରେ ଆୟାର କାନ୍ଧରେ ଆଘାତ ପାଇଥିଲେ। ଏହି କାରଣରୁ ସେ ଗତ କିଛି ମାସ ଧରି କ୍ରିକେଟ ପଡ଼ିଆରୁ ଦୂରରେ ଥିଲେ। କିନ୍ତୁ ଏବେ ସେ ୧୯ ସେପ୍ଟେମ୍ବରରୁ ଆଇପିଏଲରେ ଜଲଓ୍ବା ଦେଖାଇବାକୁ ପ୍ରସ୍ତୁତ ଅଛନ୍ତି। ଆୟର ରୟାଲ ଲଣ୍ଡନ କପରେ କାଉଣ୍ଟି ଦଳ ଲାଙ୍କାଶେୟାର ପାଇଁ ଖେଳିବାର ଥିଲା। କିନ୍ତୁ ଶେଷ ମୁହୂର୍ତ୍ତରେ ଫିଟନେସ କାରଣରୁ ତାଙ୍କ ନାମ ପ୍ରତ୍ୟାହାର କରି ନେଇଥିଲେ। ତେବେ ଏବେ ସେ ଫିଟ ଅଛନ୍ତି। ନିକଟରେ ସେ ତାଙ୍କ ଫିଟନେସ ସହ ଜଡିତ ଅନେକ ଭିଡିଓ ସୋସିଆଲ ମିଡିଆରେ ଶେୟାର କରିଥିଲେ। ଭିଡିଓରେ ତାଙ୍କୁ ଏକ ପାହାଡ ଉପରେ ଦୌଡୁଥିବା ଦେଖିବାକୁ ମିଳିଥିଲା।
୨୬ ବର୍ଷୀୟ ଆୟାର କ୍ରିକେଟ ପଡ଼ିଆକୁ ଫେରିବା ନେଇ ବହୁତ ଉତ୍ସାହିତ ଅଛନ୍ତି। ତେବେ ଗତ କିଛି ମାସ ତାଙ୍କ ପାଇଁ ବହୁତ କଷ୍ଟସାଧ୍ୟ ଥିଲା। କାନ୍ଧରେ ଆଘାତ ଏବଂ ପରେ ଫେରିବା ପାଇଁ ସଂଘର୍ଷ ହେତୁ ସେ ଭାଙ୍ଗି ପଡିଥିଲେ। ଏକ ସାକ୍ଷାତକାରରେ ସେ କହିଛନ୍ତି ଯେ, ମୁଁ ଏବେ ଭଲ ଅନୁଭବ କରୁଛି। ଏ ପର୍ଯ୍ୟନ୍ତ ଯାତ୍ରା ଭଲ ଥିଲା । କିନ୍ତୁ ଯେତେବେଳେ ମୁଁ ଆଘାତ ପାଇଲି, ମୁଁ ବହୁତ ନିରାଶ ହୋଇଥିଲି। ମୁଁ କ’ଣ କରିବି ବୁଝିପାରିଲି ନାହିଁ। ଆଘାତ ପରେ ମୁଁ ପଡିଆରୁ କାନ୍ଦି କାନ୍ଦି ଡ୍ରେସିଂ ରୁମକୁ ଫେରୁଥିଲି। ଏହାକୁ ଗ୍ରହଣ କରିବାକୁ ମୋତେ କିଛି ସମୟ ଲାଗିଲା। ତଥାପି, ତୁମେ ଏହି ସବୁ ଜିନିଷ ଦେଇ ଗତି କରିବାକୁ ପଡିବ। କିନ୍ତୁ ତୁମକୁ ଦୃଢ ଭାବରେ ଫେରିବାକୁ ଚେଷ୍ଟା କରିବାକୁ ପଡିବ। ଆୟାର ଆହୁରି କହିଛନ୍ତି ଯେ, କାନ୍ଧର ଅସ୍ତ୍ରୋପଚାର ବିଷୟରେ ଶୁଣି ମୁଁ ଆଶ୍ଚର୍ଯ୍ୟ ହୋଇଗଲି। ଯେତେବେଳେ ମୁଁ ଜାଣିଲି ଯେ କାନ୍ଧରେ ଆଘାତରୁ ମୁକ୍ତି ପାଇବା ପାଇଁ ମୋତେ ଅସ୍ତ୍ରୋପଚାର କରିବାକୁ ପଡିବ, ପ୍ରଥମେ ଏହାକୁ ହଜମ କରିବା ମୋ ପକ୍ଷେ ସହଜ ନଥିଲା। କାରଣ ଏହି ଆଘାତ ପୂର୍ବରୁ ମୋର ଫିଟନେସ ବହୁତ ଭଲ ଥିଲା। ମୁଁ ଭଲ ଟ୍ରେନିଂ କରିବାକୁ ସକ୍ଷମ ହେଲି। ଏହା କୌଣସି ଖେଳାଳିଙ୍କ କ୍ୟାରିୟରର ଏକ ଅଂଶ। ମୁଁ ଏହା ପରେ ମଧ୍ୟ ଗ୍ରହଣ କଲି । ଆୟର ଦିଲ୍ଲୀ ଦଳର ଏକ ସପ୍ତାହ ପୂର୍ବରୁ ତାଙ୍କ ପିଲାଦିନର ପ୍ରଶିକ୍ଷକ ପ୍ରବୀଣ ଆମ୍ରେଙ୍କ ସହ ଦୁବାଇରେ ପହଞ୍ଚି ସେଠାରେ ଅଭ୍ୟାସ କରୁଛନ୍ତି।
ଆୟରଙ୍କ ଅଧିନାୟକତ୍ୱରେ ଦିଲ୍ଲୀ କ୍ୟାପିଟାଲ୍ସ ଗତ ବର୍ଷ ୟୁଏଇରେ ଆୟୋଜିତ ଆଇପିଏଲର ଫାଇନାଲ ଖେଳିଥିଲା। ଏହି ସିଜିନରେ ଦଳର ପ୍ରଦର୍ଶନ ମଧ୍ୟ ଉତ୍କୃଷ୍ଟ ଥିଲା। ଆୟରଙ୍କ ଆଘାତ ପରେ ରିଷଭ ପନ୍ତ ଦଳର ଅଧିନାୟକତ୍ୱ କରିଥିଲେ ଏବଂ କରୋନା କାରଣରୁ ଆଇପିଏଲ ୨୦୨୧ ସ୍ଥଗିତ ରଖିବା ପୂର୍ବରୁ ଦିଲ୍ଲୀ ୮ଟି ମ୍ୟାଚ ମଧ୍ୟରୁ ୬ଟି ଜିତି ପଏଣ୍ଟ ଟେବୁଲରେ ୧ ନମ୍ବର ସ୍ଥାନରେ ରହିଥିଲା। ତେବେ ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟରେ କିଏ ଦଳର ନେତୃତ୍ୱ ନେବ ତାହା ଦିଲ୍ଲୀର ଦଳ ପରିଚାଳନା ଏପର୍ଯ୍ୟନ୍ତ ସ୍ପଷ୍ଟ କରିନାହିଁ। ଲିଗ ସ୍ଥଗିତ ରଖିବା ପୂର୍ବରୁ ଆଇପିଏଲର ୨୭ଟି ମ୍ୟାଚ ହୋଇଥିଲା । ଅବଶିଷ୍ଟ ୩୧ ଟି ମ୍ୟାଚ ୟୁଏଇରେ ୧୯ ସେପ୍ଟେମ୍ବରରୁ ଆରମ୍ଭ ହେବ। ୨୨ ସେପ୍ଟେମ୍ବରରେ ଦୁବାଇରେ ସନରାଇଜର୍ସ ହାଇଦ୍ରାବାଦ ବିପକ୍ଷରେ ଦିଲ୍ଲୀ ପ୍ରଥମ ମ୍ୟାଚ ଖେଳିବ।