କୋଲକାତା,୭।୨: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ସମ୍ମାନଜନକ ଡକ୍ଟରେଟ ପ୍ରଦାନ କରାଯାଇଛି। ସେଣ୍ଟ ଜାଭିୟର ବିଶ୍ୱବିଦ୍ୟାଳୟର ଚତୁର୍ଥ ବାର୍ଷିକୀ ସମାରୋହରେ ତାଙ୍କୁ ଏହି ଉପାଧି ଦିଆଯାଇଛି। ସମ୍ବିଧାନର ସୁରକ୍ଷା ପାଇଁ ସେ ଶେଷନିଶ୍ୱାସ ପର୍ଯ୍ୟନ୍ତ ସଂଗ୍ରାମ ଜାରି ରଖିବେ। ଦେଶର ଏକତା ରକ୍ଷା ପାଇଁ ସମସ୍ତେ କାର୍ଯ୍ୟ କରିବା ଉଚିତ ବୋଲି ସେ କହିଛନ୍ତି।
ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ଆମର ସମ୍ବିଧାନ ଏକ ଧର୍ମନିରପେକ୍ଷ ଗଣତାନ୍ତ୍ରିକ ଦେଶ ଭାବରେ ଭାରତର ମୂଳଦୁଆ ପକାଇଥାଏ। ମୁଁ ଏହାର ସୁରକ୍ଷା ପାଇଁ ମୋର ଶେଷ ନିଶ୍ୱାସ ପର୍ଯ୍ୟନ୍ତ ଲଢିବି। ଆମକୁ ଦାରିଦ୍ର୍ୟର ମୁକାବିଲା କରିବାକୁ ହେବ, ଅନ୍ୟାୟ ଏବଂ ଅସମାନତା ସହ ଲଢିବାକୁ ହେବ।
ସେଣ୍ଟ ଜାଭିୟର ବିଶ୍ୱବିଦ୍ୟାଳୟର କୁଳପତି ଫାଦର ଫେଲିକ୍ସ ରାଜ କହିଛନ୍ତି, ସାମାଜିକ ସେବା ତଥା ଶିକ୍ଷା ବିସ୍ତାର କ୍ଷେତ୍ରରେ ଅବଦାନ ପାଇଁ ମୁଖ୍ୟମନ୍ତ୍ରୀ ବାନାର୍ଜୀଙ୍କୁ ସମ୍ମାନିତ କରାଯାଇଛି। ବିଶ୍ୱବିଦ୍ୟାଳୟର ନ୍ୟୁଟାଉନ କ୍ୟାମ୍ପସରେ ଆୟୋଜିତ ଏକ କାର୍ଯ୍ୟକ୍ରମରେ ରାଜ୍ୟପାଳ ସିଭି ଆନନ୍ଦ ବୋଷଙ୍କ ଉପସ୍ଥିତିରେ ଡକ୍ଟର ଅଫ ଲେଟର୍ସ ପୁରସ୍କାର ମମତାଙ୍କୁ ପ୍ରଦାନ କରାଯାଇଥିଲା। ଏହାକୁ ଗ୍ରହଣ କରି ମମତା କହିଛନ୍ତି, ସେ ଏହାକୁ ରାଜ୍ୟ ତଥା ଦେଶର ଲୋକଙ୍କ ପାଇଁ ଉତ୍ସର୍ଗ କରୁଛନ୍ତି, ଯାହା ବିନା ସେ କିଛି ନୁହଁନ୍ତି।
