ଭୁବନେଶ୍ୱର,୨୩ା୨(ବ୍ୟୁରୋ): ବିରୋଧୀ ଦଳ ନେତା ଜୟନାରାୟଣ ମିଶ୍ର ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକଙ୍କ ବିରୋଧରେ ମାନହାନି ମାମଲା ରୁଜୁ କରିବାକୁ ଚେତାବନୀ ଦେଇଛନ୍ତି। ଗଣମାଧ୍ୟମକୁ ସୂଚନା ଦେଇ ବୁଧବାର ବିରୋଧୀ ଦଳ ନେତା କହିଛନ୍ତି, ପ୍ରମିଳା ମଲ୍ଲିକ ରାଜ୍ୟର ମନ୍ତ୍ରୀ। ସେ ଯାହା କହୁଛନ୍ତି ସରକାର କହୁଛନ୍ତି। ସେ କହିଛନ୍ତି, ମାନ୍ୟବର କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କର ହତ୍ୟାରେ ଷଡ଼ଯନ୍ତ୍ର ନାହିଁ ତ? କ୍ରାଇମ୍ବ୍ରାଞ୍ଚ ଯେତେବେଳେ ତଦନ୍ତ କରୁଛି, ତଦନ୍ତକୁ ଏହା ପ୍ରଭାବିତ କରିବନି ତ? ଜଣେ ମନ୍ତ୍ରୀ ଯେତେବେଳେ ଷ୍ଟେଟ୍ମେଣ୍ଟ ଦେବେ ତାହା ସରକାରଙ୍କ ଉକ୍ତି ବୋଲି ଧରାଯିବ। ମନ୍ତ୍ରୀଙ୍କ ବିରୋଧରେ ମାନହାନି ମାମଲା କରିବେ ବୋଲି ଜୟନାରାୟଣ କହିଛନ୍ତି।
ସୂଚନାଯୋଗ୍ୟ, ଏହି ହତ୍ୟା ଘଟଣାରେ କେନ୍ଦ୍ରମନ୍ତ୍ରୀ ଓ ବିରୋଧୀ ଦଳ ନେତା ସମ୍ପୃକ୍ତି ଥିବା ନେଇ ରାଜସ୍ବ ମନ୍ତ୍ରୀ ପରୋକ୍ଷରେ ଇଙ୍ଗିତ କରିଥିଲେ। ପ୍ରମିଳା କହିଛନ୍ତି, ସେ ଯେଉଁଭଳି ହେଉଛନ୍ତି କୌଣସି ମହିଳା କର୍ମଚାରୀ ତାଙ୍କ ସହ କଥାବାର୍ତ୍ତା କିମ୍ବା କାମ କରିବା ସମ୍ଭବ ନୁହେଁ। ତାଙ୍କ ଦେହ ଖରାପ। ସେ ଉତ୍ତେଜିତ ହୋଇଯାଉଛନ୍ତି । ଡାକ୍ତରୀ ପରୀକ୍ଷା କରିବା ଦରକାର ବୋଲି ସେ କହିଛନ୍ତି।
