ସୋନପୁର,୩୧।୫(ନି.ପ୍ର.):ସୋମବାର ପ୍ରକାଶିତ ୟୁପିଏସ୍ସି ସିଭିଲ ସର୍ଭିସ୍ ପରୀକ୍ଷା ୨୦୨୧ରେ ୬୩ ର଼୍ୟାଙ୍କ ରଖି ଓଡ଼ିଶାର କାର୍ତ୍ତିକ ପାଣିଗ୍ରାହୀ କୃତକାର୍ଯ୍ୟ ହୋଇଛନ୍ତି। ତାଙ୍କ ଘର ସୋନପୁର ସହର ଗଡ଼ଭିତର ଅଞ୍ଚଳରେ। କାର୍ତ୍ତିକ ତାଙ୍କ ପ୍ରତିକ୍ରିୟାରେ କହିଛନ୍ତି, ପରିଶ୍ରମର ଫଳ ମିଳିଥିବାରୁ ଖୁସି ଲାଗୁଛି। ଆଗକୁ ସମାଜର ଅବହେଳିତ ବର୍ଗ ଓ ମହିଳାଙ୍କ ଉନ୍ନତି ପାଇଁ କାମ କରିବି। ସୁଯୋଗ ମିଳିଲେ ଓଡ଼ିଶାର ବିକାଶ ପ୍ରକ୍ରିୟାରେ ସାମିଲ ହେବି। ତୃଣମୂଳସ୍ତରରେ ପ୍ରଶାସନିକ ସୁବିଧା ପହଞ୍ଚାଇବା ପାଇଁ ଚେଷ୍ଟା କରିବି ବୋଲି ସେ କହିଛନ୍ତି। କାର୍ତ୍ତିକଙ୍କ ମା’ ଗୀତା ଜଣେ ଗୃହିଣୀ ହୋଇଥିବା ବେଳେ ବାପା ଶିବଶଙ୍କର ଏବେ ଇଣ୍ଡିଆନ ଏୟାର ଲାଇନ୍ସର ଇଞ୍ଜିନିୟର ଭାବେ ଦିଲ୍ଲୀରେ କାର୍ଯ୍ୟରତ। ସେ ମାଡ୍ରାସ ଓ ଥିରୁଭାନନ୍ତପୁରମ୍ରେ ପାଠ ପଢ଼ିଛନ୍ତି। କଲିକତା କେନ୍ଦ୍ରୀୟ ବିଦ୍ୟାଳୟରେ ପଢ଼ିବା ପରେ ଏବେ ଦିଲ୍ଲୀ ବିଶ୍ୱବିଦ୍ୟାଳୟରେ ଏମ୍ଫିଲ କରୁଛନ୍ତି। ତୃତୀୟ ସୁଯୋଗରେ ସେ ଏହି ସଫଳତା ପାଇଛନ୍ତି। କଠିନ ପରିଶ୍ରମ ଓ ନିଷ୍ଠା ରହିଲେ ସଫଳତା ନିଶ୍ଚୟ ମିଳିବ। ଏହି ସଫଳତା ପାଇଁ ସେ ମା’, ବାପା, ବିଟେକ୍ କରୁଥିବା ସାନଭାଇ କୁନାଲ, ଗୁରୁଜନ ଓ ଭଗବାନଙ୍କୁ ଶ୍ରେୟ ଦେଇଛନ୍ତି। ଅନ୍ୟପକ୍ଷେ କାର୍ତ୍ତିକଙ୍କ ଏହି ସଫଳତା ଲାଗି ସୋନପୁର ବିଧାୟକ ତଥା ରାଜ୍ୟ ଅର୍ଥ ଓ ଅବକାରୀ ବିଭାଗ ମନ୍ତ୍ରୀ ନିରଞ୍ଜନ ପୂଜାରୀ ଶୁଭେଚ୍ଛା ଜଣାଇଛନ୍ତି। ସେ ଜିଲାକୁ ଗୌରବାନ୍ବିତ କରିବା ସହ ଆଗକୁ ଆହୁରି ସଫଳତା ଆଣିବେ ବୋଲି ମନ୍ତ୍ରୀ ପୂଜାରୀ ଆଶାପ୍ରକାଶ କରିଛନ୍ତି।