ନୂଆଦିଲ୍ଲୀ,୨୪।୧: ଉପଯୁକ୍ତ ଝିଅ ମିଳିଲେ ବିବାହ କରିବେ ବୋଲି କଂଗ୍ରେସ ନେତା ତଥା ଅନେକଙ୍କ ଦୃଷ୍ଟିରେ ଭାରତର ସବୁଠୁ ଯୋଗ୍ୟ ଅବିବାହିତ ରାହୁଲ ଗାନ୍ଧୀ କହିଛନ୍ତି। ସମସ୍ୟା ହେଲା କି ତାଙ୍କ ମାତାପିତାଙ୍କ ‘ବାସ୍ତବ ସୁନ୍ଦର ବିବାହ’ ବହୁତ ଉଚ୍ଚ ପ୍ରତିବନ୍ଧକ ସୃଷ୍ଟି କରିଛି। ୟୁଟ୍ୟୁବରେ ଖାଦ୍ୟ ଓ ଭ୍ରମଣ ପ୍ଲାଟଫର୍ମ କର୍ଲି ଟେଲ୍ସ ସହ ଏକ ହାଲ୍କା ଫୁଲ୍କା ଆଲୋଚନା ବେଳେ ରାହୁଲ ଏହା କହିଥିଲେ। ସେ ପଲିଟିକ୍ସ ଟ୍ରାକ୍ରୁ କିଛି ସମୟ ପାଇଁ ଦୂରେଇଯାଇ ତାଙ୍କର ବ୍ୟକ୍ତିଗତ ପ୍ରସଙ୍ଗ, ଖାଦ୍ୟ ରୁଚି, ବ୍ୟାୟାମ ଆଦି ସମ୍ପର୍କରେ କହିଥିଲେ। ବିବାହକୁ ନେଇ ତାଙ୍କର କୌଣସି ବିରୋଧ ନାହିଁ ବୋଲି ୫୨ ବର୍ଷୀୟ ପୂର୍ବତନ କଂଗ୍ରେସ ଅଧ୍ୟକ୍ଷ କହିଛନ୍ତି। ତେବେ କେମିତିକା ଝିଅଙ୍କୁ ବିବାହ କରିବାକୁ ଚାହାନ୍ତି, ତାହାର ଚେକ୍ଲିଷ୍ଟ ପ୍ରସ୍ତୁତ କରିଛନ୍ତି କି ବୋଲି ପ୍ରଶ୍ନ ହେବାରୁ ରାହୁଲ କହିଥିଲେ, କେବଳ ସେ ସ୍ନେହୀ ଏବଂ ବୁଦ୍ଧିମତି ହେବା ଆବଶ୍ୟକ। ରାଜସ୍ଥାନରେ ଭାରତ ଯୋଡ଼ୋ ଯାତ୍ରା ଅବସରରେ ରାତ୍ର ଭୋଜନ ବେଳେ ତାଙ୍କର ଏହି କଥାବାର୍ତ୍ତା ରେକର୍ଡ କରାଯାଇଥିଲା। ଖାଦ୍ୟକୁ ନେଇ ତାଙ୍କର କୌଣସି ପ୍ରତିବାଦ ନାହିଁ, ଯାହା ମିଳିଲା ଖାଇଥାନ୍ତି। ତେବେ ମଟର ଓ ପଣସକୁ ସେ ପସନ୍ଦ କରନ୍ତି ନାହିଁ ବୋଲି ରାହୁଲ କହିଥିଲେ।
