ଭୁବନେଶ୍ବର, ୨୪ା୪(ବ୍ୟୁରୋ): ମୁଁ ନିର୍ଦ୍ଦଳୀୟ। ଏବେ ମୁଁ କୌଣସି ଦଳରେ ନାହିଁ। ମୁଁ ଆପଣମାନଙ୍କ ଦଳରେ ଅଛି। ନିର୍ବାଚନ ରାଜନୀତିରେ ପୁନଃପ୍ରବେଶ କରିବାକୁ ଅମଙ୍ଗ ବୋଲି ରବିବାର ଶଙ୍ଖ ଭବନ ଉଦ୍ଘାଟନୀ ଉତ୍ସବରେ ଯୋଗଦେବା ଅବସରରେ ପୂର୍ବତନ ଏମ୍ପି ତଥା ଧରିତ୍ରୀ ଏବଂ ଓଡ଼ିଶା ପୋଷ୍ଟ ସମ୍ପାଦକ ତଥାଗତ ସତପଥୀ ଗଣମାଧ୍ୟମ ପ୍ରତିନିଧିମାନଙ୍କ ପ୍ରଶ୍ନର ଉତ୍ତରରେ ଏହା କହିଛନ୍ତି। ଏହାସହ ଆଗାମୀ ଦିନରେ ମଧ୍ୟ ସେ ନିର୍ବାଚନ ଲଢ଼ିବେ ନାହିଁ ବୋଲି ଏକପ୍ରକାର ସ୍ପଷ୍ଟ କରିଛନ୍ତି।
ସୂଚନାଯୋଗ୍ୟ, ଗତ ୨୦୧୯ ସାଧାରଣ ନିର୍ବାଚନ ପୂର୍ବରୁ ଆଉ ନିର୍ବାଚନ ଲଢ଼ିବେ ନାହିଁ ବୋଲି ତଥାଗତ କହିଥିଲେ। ଆଜି ମଧ୍ୟ ସେହି କଥାକୁ ସେ ଦୋହରାଇଛନ୍ତି। ଏହାପରଠାରୁ ତାଙ୍କୁ କେବେହେଲେ ବିଜେଡିର କୌଣସି ରାଜନୈତିକ ବା ସାଙ୍ଗଠନିକ କାର୍ଯ୍ୟକ୍ରମରେ ଯୋଗଦେବାର ଦେଖିବାକୁ ମିଳି ନ ଥିଲା। ୨୦୧୯ ସାଧାରଣ ନିର୍ବାଚନ ପରେ ତଥାଗତ ସତପଥୀ ପ୍ରଥମଥର ପାଇଁ ନବଗଠିତ ବିଜେଡି ଦଳୀୟ କାର୍ଯ୍ୟାଳୟକୁ ଯାଇଥିବାର ଦେଖିବାକୁ ମିଳିଥିଲା। ତାଙ୍କୁ ସେଠାରେ ଦେଖି ଗଣମାଧ୍ୟମ ପ୍ରତିନିଧିମାନେ ବିଭିନ୍ନ ପ୍ରଶ୍ନ କରିଥିଲେ।
ଗଣମାଧ୍ୟମ ତାଙ୍କୁ ଶଙ୍ଖ ଦଳ କାର୍ଯ୍ୟକ୍ରମରେ ଯୋଗଦେବା ନେଇ ପଚାରିବାରୁ ସେ କହିଛନ୍ତି, ଦଳର ସଭାପତିଙ୍କ ତରଫରୁ ତାଙ୍କୁ ନିମନ୍ତ୍ରଣ କରାଯାଇଥିଲା। ତାଙ୍କ କଥାକୁ ସମ୍ମାନ ଦିଏ। ତାଙ୍କ ସମ୍ମାନ ରକ୍ଷାକରି ଉକ୍ତ କାର୍ଯ୍ୟକ୍ରମରେ ଯୋଗ ଦେଇଛନ୍ତି। ଏବେ ସେ ନିର୍ଦ୍ଦଳୀୟ। ନିର୍ବାଚନ ରାଜନୀତିରେ ପୁନଃପ୍ରବେଶ କରିବା ପାଇଁ ସେ ଅମଙ୍ଗ। ସେଥିପାଇଁ ବହୁତ ଖୁସିରେ ଅଛନ୍ତି। ଶଙ୍ଖ ଭବନ ବିଲ୍ଡିଂଟି ବହୁତ ସୁନ୍ଦର ଏବଂ ଭଲ ହୋଇଛି ବୋଲି ତଥାଗତ କହିଛନ୍ତି। ତେବେ ୨୦୨୪ ନିର୍ବାଚନ ସମୟରେ ଯଦି ତାଙ୍କୁ ଖୋଜାପଡ଼େ ଆଉ ଡକାଯାଏ ତେବେ ସେ ଆସିବେ କି ନାହିଁ ବୋଲି ପଚାରିବାରୁ ତଥାଗତ କହିଛନ୍ତି, ଯେଉଁମାନଙ୍କୁ ଖୋଜାପଡ଼େ ସେମାନେ ଭାରି ଖୁସି ହୁଅନ୍ତି ଏବଂ ଭାବନ୍ତି ଯାହାହେଉ ତାଙ୍କୁ ଖୋଜାପଡୁଛି। ସେହିପରି ତାଙ୍କୁ ଡକାଗଲାରୁ ସେ ଆସିଲେ। କୌଣସି ନିର୍ବାଚନୀ ରାଜନୀତିରେ ତାଙ୍କର ଯିବାର ପ୍ରଶ୍ନ ଉଠୁନାହିଁ।
