ଚଣ୍ଡିଗଡ଼,୧୭।୧୨: ଭାରତୀୟ ଯବାନଙ୍କର ତାଓ୍ବାଙ୍ଗରେ ଚାଇନା ସୈନିକଙ୍କ ସହ ହୋଇଥିବା ସଂଘର୍ଷକୁ ନେଇ ବିରୋଧୀଦଳର ନେତାଙ୍କ ବୟାନକୁ ନେଇ ପାଲଟା ଆକ୍ରମଣ କରିଛନ୍ତି ହରିୟାଣା ଗୃହମନ୍ତ୍ରୀ ଅନିଲ ବିଜ। ଘଟଣାକୁ ନେଇ ଏଯାବତ ଚାଇନା ପକ୍ଷରୁ ଗୋଟିଏ ବି ବୟାନ ଆସିନାହିଁ। ହେଲେ ଭାରତରେ ବସିଥିବା ଚାଇନାର କିଛି ପ୍ରତିନିଧୀଙ୍କ ବୟାନ ଆସିଛି। ଏଥିଲାଗି ଯବାନମାନଙ୍କୁ କହିବାକୁ ଚାହିଁବି ଯେ ଆପଣ ସୀମା ଆରପଟରେ ଥିବା ଶତ୍ରୁମାନଙ୍କ ସହ ମୁକାବିଲା କରନ୍ତୁ, ଆମେ ସୀମା ଭିତରେ ଥିବା ଶତ୍ରୁମାନଙ୍କ ସହ ମୁକାବିଲା କରିବୁ ବୋଲି ସେ କହିଛନ୍ତି।
ତେବେ ଭାରତ ଏବଂ ଚାଇନା ଯବାନଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀ କେନ୍ଦ୍ର ସରକାରଙ୍କୁ ଶୁକ୍ରବାର କଟାକ୍ଷ କରିଥିଲେ। ଚାଇନା ଯୁଦ୍ଧ ଲାଗି ପ୍ରସ୍ତୁତ ହେଉଛି। ହେଲେ ସରକାର ତାହାକୁ ସ୍ବୀକାର କରୁନାହାନ୍ତି ବୋଲି ସେ କହିଥିଲେ। ଏହି ବୟାନକୁ ନେଇ ଅନିଲ କହିଛନ୍ତି, ଚାଇନା ସେନା ଆଗରେ ଆମର ଯବାନମାନେ ଦୃଢ଼ ଭାବେ ଛିଡ଼ା ହୋଇଛନ୍ତି। ଆମ ଯବାନମାନେ ସେମାନଙ୍କୁ ତଡ଼ି ଦେଇଛନ୍ତି। ହେଲେ ଲୋକଙ୍କ ସାମ୍ନାରେ ଏହି ପ୍ରସଙ୍ଗକୁ ଭିନ୍ନ ଢ଼ଙ୍ଗରେ ଉଠାଯାଉଛି। ଏବେ ଆମ ଯବାନମାନେ ଏହି ବିରୋଧୀଙ୍କୁ ଜବାବ ଦେବେ ନା ସୀମା ଆରପଟେ ଥିବା ଶତ୍ରୁଙ୍କୁ? ଦେଶର କିଛି ତଥାକଥିତ ନେତା ଚାଇନା ଭାଷା କହିବାରେ ଲାଗିଛନ୍ତି। ସେମାନେ ପାକିସ୍ତାନ ସହ ଲଢ଼େଇ ବେଳେ ତାଙ୍କ ଭାଷା କୁହନ୍ତି, ଚାଇନା ସହ ହେଲେ ଚାଇନା ଭାଷା କୁହନ୍ତି। ତେଣୁ ଏଭଳି ସ୍ଥିତିରେ ଆମେ ସେନା ଉପରେ ଗର୍ବ କରିବା ଉଚିତ। ସେମାନେ ଶତ୍ରୁମାନଙ୍କୁ ଉପଯୁକ୍ତ ଜବାବ ଦେଉଛନ୍ତି। ଏବେ ସେନା ବିଷୟରେ ଅନେକ ଜିନିଷ ସାର୍ବଜନୀନ କରାଯାଇପାରିବ ନାହିଁ। କାରଣ ଏହା ଯୁଦ୍ଧର ସିଦ୍ଧାନ୍ତ ବୋଲି ସେ ମଧ୍ୟ କହିଛନ୍ତି।
