ବ୍ରହ୍ମପୁର,୧୭ା୫(ଅଶୋକ କୁମାର ସାହୁ):: ଆସିକା ସଂସଦୀୟ କ୍ଷେତ୍ର ଅଧୀନ ପୋଲସରା ବିଧାନସଭା ନିର୍ବାଚନ ମଣ୍ଡଳୀରେ ୯ଜଣ ବିଧାୟକ ପ୍ରାର୍ଥୀ ହୋଇଛନ୍ତି। ବିଜେଡି ଓ ଭାଜପା ପୁରୁଣା ଗତଥରର ପ୍ରାର୍ଥୀଙ୍କୁ ରିପିଟ କରିଥିବା ବେଳେ କଂଗ୍ରେସ ନୂଆ ମୁହଁ ଉପରେ ଭରସା କରିଛି। ଧରିତ୍ରୀ ପକ୍ଷରୁ ଭାଜପା ପ୍ରାର୍ଥୀ ଗୋକୁଳାନନ୍ଦ ମଲ୍ଲିକଙ୍କ ସହିତ ସ୍ବଳ୍ପ ଆଳାପ।
ଆପଣଙ୍କ ନିର୍ବାଚନୀ ପ୍ରସଙ୍ଗ କ’ଣ ରହିଛି?
ଉ: ଗତ ୨୫ ବର୍ଷ ଏହି ନିର୍ବାଚନ ମଣ୍ଡଳୀରେ ବିକାଶ ନାଁରେ ଦୁର୍ନୀତି ଚାଲିଛି। ପ୍ରଧାନମନ୍ତ୍ରୀଙ୍କ ଯୋଜନାର ପ୍ରକୃତ ସୁଫଳ ହିତାଧିକାରୀଙ୍କ ନିକଟରେ ପହଞ୍ଚତ୍ ପାରୁନାହିଁ। ଏଠାରେ ରୋଜଗାର ନ ମିଳିବାରୁ ବହୁ ଲୋକ ଦାଦନ ଖଟିବାକୁ ଯାଉଛନ୍ତି। ତେଣୁ ଦାଦନ ରୋକିବା ଉପରେ ପ୍ରୟାସ କରାଯିବ। ଜଳସେଚନ, ଶିକ୍ଷା, ପାନୀୟ ଜଳ ଓ ସ୍ବାସ୍ଥ୍ୟର ବିକାଶ ଏବଂ ଏହା କୃଷି ପ୍ରଧାନ ଅଞ୍ଚଳ ହୋଇଥିବାରୁ ଶୀତଳ ଭଣ୍ଡାର ନିର୍ମାଣକୁ ପ୍ରସଙ୍ଗ କରିଛି।
ଭୋଟରଙ୍କୁ ନିଜ ସପକ୍ଷରେ କ’ଣ କହିବେ?
ଉ: ମହିଳାଙ୍କୁ ସମ୍ମାନ, ମହିଳା ସଶକ୍ତୀକରଣ, ଯୁବପିଢ଼ିଙ୍କୁ ସଶକ୍ତ କରିବା ମୋର ଉଦ୍ଦେଶ୍ୟ। ଏ ନେଇ ପ୍ରଧାନମନ୍ତ୍ରୀ ବହୁ ଯୋଜନା କରିଛନ୍ତି। ତାହାର ସଫଳ ରୁପାୟନକୁ ଗୁରୁତ୍ୱ ଦିଆଯିବ। ଦାଦନ ଖଟିବାକୁ ଯେଉଁମାନେ ଯାଉଛନ୍ତି ସେମାନଙ୍କୁ ଏଠାରେ ସଶକ୍ତ କରିବାକୁ ପୂର୍ବରୁ ପ୍ରୟାସ ଜାରି ରହିଥିଲା। ଏବେ ତାହା ନିଶ୍ଚିତ ଭାବେ କାର୍ଯ୍ୟକାରୀ କରାଯିବ। ଏହା ଦ୍ୱାରା ଅଞ୍ଚଳର ଅର୍ଥନୀତି କିଭଳି ସୁଦୃଢ଼ ହେବ ତାହା ଉପରେ ବିଶେଷ ଧ୍ୟାନ ଦିଆଯିବ। ଜନସାଧାରଣଙ୍କ ଉଦ୍ଦେଶ୍ୟକୁ ସଫଳ କରାଯିବ।
ମତଦାତାଙ୍କୁ କ’ଣ ପ୍ରତିଶ୍ରୁତି ଦେବେ?
ଉ: ମୋର ଭୋଟରଙ୍କୁ ସେଭଳି କିଛି ପ୍ରତିଶ୍ରୁତି ନାହିଁ। କେବଳ ପ୍ରଧାନମନ୍ତ୍ରୀଙ୍କ ପ୍ରତିଶ୍ରୁତି ଯାହା ତାକୁ ଏଠାରେ କାର୍ଯ୍ୟକାରୀ କରିବା ମୋ କାମ। ଜଣେ ଲୋକ ପ୍ରତିନିଧି ହିସାବରେ ଲୋକଙ୍କୁ ନେଇ କାମ କରିବି। ସୁଭଦ୍ରା ଯୋଜନାରେ ମହିଳାମାନଙ୍କୁ ୫୦ ହଜାର ଟଙ୍କା ଦେବାକୁ ପ୍ରଧାନମନ୍ତ୍ରୀ ଗ୍ୟାରେଣ୍ଟି ଦେଇଛନ୍ତି। ଏଥି ସହିତ ବୃଦ୍ଧାବୃଦ୍ଧଙ୍କୁ ମାସିକ ୩୦୦୦ ଟଙ୍କା, ଉତ୍ପାଦିତ ଦ୍ରବ୍ୟର ବଜାରୀକରଣ ପାଇଁ ସୁବିଧା, ଗ୍ରାମ୍ୟ କମିଟି ମାଧ୍ୟମରେ ସରକାରୀ କାର୍ଯ୍ୟ କରିବା ସହିତ ଧାନ କୁଇଣ୍ଟାଲ ପ୍ରତି ୩୧୦୦ ଟଙ୍କା କରାଯିବ। ଅଞ୍ଚଳରେ ଆଇନଶୃଙ୍ଖଳା ଓ ମଦମୁକ୍ତ ସମାଜ ଗଠନ ମୋର ପ୍ରତିଶ୍ରୁତି।
ଭୋଟର କାହିଁକି ଆପଣଙ୍କୁ ସମର୍ଥନ କରିବେ ବୋଲି ଭାବୁଛନ୍ତି?
ଉ: ଦେଖନ୍ତୁ! ଦୀର୍ଘ ୨୫ ବର୍ଷ ହେଲା ଉକ୍ତ ନିର୍ବାଚନ ମଣ୍ଡଳୀରେ ଅନେକ ସମସ୍ୟା ରହିଛି। ତାହା ଏଯାଏଁ ସମାଧାନ ହୋଇପାରିନାହଁ। ମୁଁ କେବଳ ଜନତାଙ୍କ ପ୍ରତିନିଧି। ଗତଥର ବି ଜନସାଧାରଣଙ୍କ ସାଥିରେ ଥିଲି। ସୁଖଦୁଃଖର ସାଥୀ ହୋଇଥିଲି। ତାହା ଲୋକେ ଭଲ ଭାବେ ଅବଗତ ଅଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଉଥିବା ଗ୍ୟାରେଣ୍ଟି ଉପରେ ସମସ୍ତଙ୍କ ବିଶ୍ୱାସ ରହିଛି। ଏବେ ଭୋଟରଙ୍କ ମୁହଁରେ ପରିବର୍ତ୍ତନର ନାରା ଶୁଭୁଛି। ତେଣୁ ମୋ ପ୍ରତି ବି ଏଥର ଭୋଟରଙ୍କ ସମର୍ଥନ ରହିବ ବୋଲି ଭାବୁଛି।
ଆପଣଙ୍କ ସହିତ କାହାର ପ୍ରତିଦ୍ୱନ୍ଦ୍ୱୀ ହେବ ବୋଲି ଭାବୁଛନ୍ତି?
ଉ: ଏହା ମୋ ନିର୍ବାଚନ ନୁହେଁ। ଏହା ଜନସାଧାରଣଙ୍କ ନିର୍ବାଚନ, ଜନତା ଲଢ଼ୁଛନ୍ତି। ମୋର କେହି ବିରୋଧୀ ନାହାନ୍ତି। ତେଣୁ ଏଠି ପ୍ରତିଦ୍ୱନ୍ଦ୍ୱୀ ଶବ୍ଦ ଆସିଲା କେଉଁଠୁ? ସାଧାରଣ ଜନତା ସେମାନଙ୍କ ମୌଳିକ ଅଧିକାର ପାଇଁ ମୋ ସହିତ ଠିଆ ହୋଇଛନ୍ତି। ପୋଲସରାର ବିକାଶ ବହୁ ଦୂରକୁ ଚାଲିଯାଇଛି। ତେଣୁ ଏ ନିର୍ବାଚନ ମୋର ନୁହେଁ, ଲୋକଙ୍କର।