ନୂଆଦିଲ୍ଲୀ,୨୧ ।୯: ଭାରତୀୟ ବାୟୁସେନାକୁ ନିକଟରେ ମିଳିଥିବା ରାଫାଲ ଯୁଦ୍ଧ ବିମାନର ଦାୟିତ୍ୱରେ ଥିବା ସ୍କାଡ୍ରନଙ୍କ ମଧ୍ୟରେ ଖୁବ୍ଶୀଘ୍ର ଜଣେ ମହଳା ପାଇଲଟ ସାମିଲ ହୋଇ ପାରନ୍ତି ବୋଲି କୁହାଯାଉଛି । ରାଫାଲକୁ ବାୟୁସେନାର ୧୭ତମ ସ୍କାଡ୍ରନରେ ସାମିଲ କରାଯାଇଛି । ଏଥିରେ ସାମିଲ କରିବାକୁ ଏବେ ଭାରତୀୟ ବାୟୁସେନାର ୧୦ ମହିଳା ଫାଇଟର ପାଇଲଟଙ୍କୁ ଟ୍ରେନିଂ ଦିଆଯାଉଥିବା କୁହାଯାଉଛି । ଏମାନଙ୍କ ମଧ୍ୟରୁ ଜଣକୁ ରାଫାଲ ଉଡାଇବାକୁ ଅନୁମତି ମିଳିପାରେ ବୋଲି ଅନୁମାନ କରାଯାଉଛି । ତେବେ ଯେଉଁ ମହିଳା ପାଇଲଟଙ୍କୁ ରାଫାଲ ଉଡାଇବାକୁ ଅନୁମତି ମିଳିବ ସେ ଏବେ ମିଗ୍-୨୧ ଉଡାଇବାକୁ ନିଯୁକ୍ତ ହୋଇଛନ୍ତି । ତେବେ ରାଫାଲ ଯୁଦ୍ଧ ବିମାନକୁ ଉଡାଇବାକୁ ଆଉ ଏକ ଟ୍ରେନିଂ ସମ୍ପୂର୍ଣ୍ଣ କରିବା ଆବଶ୍ୟକ ରହିଛି । କାରଣ ମିଗ୍ ଓ ରାଫେଲ ଉଡାଇବା ଭିତରେ କିଛିଟା ପାର୍ଥକ୍ୟ ଥିବାରୁ ଏହି ଟ୍ରେନିଂର ଆବଶ୍ୟକତା ଥିବା କୁହାଯାଏ । ସୂଚନାଯୋଗ୍ୟ, ଚଳିତ ମାସରେ ରାଫାଲ ଯୁଦ୍ଧ ବିମାନ ଅମ୍ବାଲା ଏୟାରବେସରେ ବାୟୁସେନାରେ ସାମିଲ ହୋଇ ବାୟୁସେନାର ଶକ୍ତି ବୃଦ୍ଧି କରିଛି । ଏହା ବାୟୁସେନାରେ ସାମିଲ ହେବା ପରେ ଲଦାଖ ସୀମାରେ ଉଡିଥିବା ଦେଖାଯାଇଛି । ଭାରତର ଆବଶ୍ୟକ ଥିବା ୩୬ ରାଫାଲ ବିମାନ ୨୦୨୧ ସୁଦ୍ଧା ପହଞ୍ଚିଯିବ ବୋଲି କୁହାଯାଇଛି । କିଛିଦିନ ପୂର୍ବର ପ୍ରତିରକ୍ଷା ମନ୍ତ୍ରୀ କହିଥିଲେ କି ଆବଶ୍ୟକ ହେଲେ ମହିଳା ଫାଇଟର ପାଇଲଟଙ୍କୁ ନିଯୁକ୍ତ କରାଯିବ ।
