ଛତ୍ରପୁର, ୨୮।୭(ଡି.ଏନ୍.ଏ.): ଗଞ୍ଜାମ ଜିଲାରେ କରୋନା ପରିସ୍ଥିତି ଅଣାୟତ ଆଡ଼କୁ ଗଲାଣି। କରୋନା ସଂକ୍ରମଣକୁ କିଭଳି ନିୟନ୍ତ୍ରଣ କରାଯିବ ସେନେଇ ଜ଼ିଲାର ଆଇଏଏସ୍, ଓଏଏସ୍ ତଥା ବରିଷ୍ଠ ଅଧିକାରୀମାନେ ରାତି ଦିନ କାର୍ଯ୍ୟ କରୁଛନ୍ତି। ସେମାନେ କରୋନା ମୁକାବିଲା କାର୍ଯ୍ୟ କରୁଥିବାବେଳେ ଓଏଏସ୍ ତଥା ବରିଷ୍ଠ ଅଧିକାରୀମାନେ ପଜିଟିଭ୍ଙ୍କ ସଂସ୍ପର୍ଶରେ ଆସି କରୋନାରେ ସଂକ୍ରମିତ ହେବାରେ ଲାଗିଛନ୍ତି। ଏଥିପାଇଁ ବରିଷ୍ଠ ଅଧିକାରୀମାନେ ସର୍ବଦା ମାନସିକ ଚାପରେ ରହୁଛନ୍ତି। ଦିଲ୍ଲୀ ବିଶ୍ୱବିଦ୍ୟାଳୟର ମନସ୍ତତ୍ତ୍ୱ ବିଭାଗର ପ୍ରଫେସର ଡକ୍ଟର ଏସ୍ପି କେ ଜେନା ଭିଡିଓ କନ୍ଫରେନ୍ସିଂ ଜରିଆରେ ଏମାନଙ୍କର କାଉନସିଲିଂ କରିଛନ୍ତି। କୋଭିଡ-୧୯ ସମୟରେ ମାନସିକ ଚାପରୁ କିଭଳି ରକ୍ଷା ପାଇବେ ଏବଂ କୋଭିଡ୍ ପରିଚାଳନା ଠିକ୍ ଭାବେ ତ୍ୱରାନ୍ବିତ ହେବ ସେ ଉପରେ ପ୍ରଫେସର ଜେନା ବୁଝାଇଛନ୍ତି। ଏଥିସହ ଆଚରଣ ଓ ବ୍ୟବହାରରେ ପରିବର୍ତ୍ତନ ଓ ପରିଚାଳନା ଉପରେ ଆଲୋଚନା ମଧ୍ୟ ହୋଇଛି। ଏହି ଅଧିବେଶନ ସଫଳ ହୋଇଥିବା ଜ଼ିଲା କୋଭିଡ୍ ସେଲ୍ ପକ୍ଷରୁ ସୂଚନା ଦିଆଯାଇଛି।
