ଦୃଢ଼ ଆତ୍ମବିଶ୍ୱାସ ସଫଳତାର ଚାବିକାଠି। ମନୋବଳ ଥିଲେ ମଣିଷ ଆକାଶ ଛୁଇଁପାରେ। ଏହାର ଜ୍ୱଳନ୍ତ ଉଦାହରଣ ହେଉଛନ୍ତି ଆଇଏଏସ୍ ଅଫିସର ଆରତି ଡୋଗରା। ସେ ରାଜସ୍ଥାନ କ୍ୟାଡରର ଆଇଏଏସ୍ ଅଫିସର ହୋଇଥିବା ବେଳେ ଆଜିକାଲି ତାଙ୍କ ଚର୍ଚ୍ଚା ସବୁଆଡେ ହେଉଛି। କାରଣ କରୋନା କାଳରେ ସେ ଯେଉଁଭଳି ଭାବେ ଲୋକଙ୍କ ପାଇଁ କାମ କରୁଛନ୍ତି, ତାହାର ସମସ୍ତେ ପ୍ରଶଂସା କରୁଛନ୍ତି।
ଆରତୀ ପାଠପଢ଼ା ସାଙ୍ଗକୁ ଖେଳକୁଦରେ ବେଶ ଭଲ ଥିଲେ। ସେ ଘୋଡ଼ାଚଢ଼ା ଶିଖିଛନ୍ତି। ଦିଲ୍ଲୀର ପ୍ରତିଷ୍ଠିତ ଲେଡି ଶ୍ରୀରାମ କଲେଜରୁ ସେ ଇକୋନୋମିକ୍ସରେ ଗ୍ରାଜୁଏଶନ୍ ସାରିଛନ୍ତି। ସେ ଛାତ୍ର ରାଜନୀତି ସହ ସଶ୍ଳିଷ୍ଟ ଥିଲେ। ସେ ଛାତ୍ର ସଂସଦ ନିର୍ବାଚନରେ ବିଜୟୀ ମଧ୍ୟ ହୋଇଥିଲେ।
ଜଣେ ଆଇଏଏସ୍ ଅଫିସରଙ୍କଠାରୁ ପ୍ରେରଣା ପାଇ ସେ ପ୍ରଶାସନିକ ସେବାରେ ଯୋଗଦେବାକୁ ନିଷ୍ପତ୍ତି ନେଇଥିଲେ। ୨୦୦୬ରେ ପ୍ରଥମ ଥରରେ ହିଁ ସେ ବାଜିମାତ୍ କରିଥିଲେ।
ଏସବୁ ମଧ୍ୟରେ ଆରତିଙ୍କ ଆହୁରି କିଛି ସ୍ବତନ୍ତ୍ର କରିଛି, ତାହା ହେଲା ତାଙ୍କର ଉଚ୍ଚତା। ଆରତିଙ୍କ ଉଚ୍ଚତା ମାତ୍ର ୩ ଫୁଟ ୬ ଇଞ୍ଚ। ଏହାକୁ ନେଇ ତାଙ୍କୁ ଲୋକମାନେ କଟାକ୍ଷ କରୁଥିଲେ । ହେଲେ ଆଇଏଏସ୍ ହେବା ପରେ ସେ ଅନେକଙ୍କ ପାଇଁ ଉଦାହରଣ ପାଲଟିଥିଲେ। ତାଙ୍କୁ ନିଷ୍ଠାପର ସେବା ପାଇଁ ଅନେକ ରାଷ୍ଟ୍ରୀୟ ପୁରସ୍କାର ମିଳିସାରିଛି। ପୂର୍ବ ରାଷ୍ଟ୍ରପତି ଅବ୍ଦୁଲ କଲାମ ମଧ୍ୟ ତାଙ୍କ କାମର ପ୍ରଶଂସା କରିଛନ୍ତି। ଏବେ କରୋନା କାଳରେ ସେ ଉଲ୍ଲେଖନୀୟ କାମ କରି ପ୍ରଶଂସାର ପାତ୍ର ପାଲଟିଛନ୍ତି।
