ନୂଆଦିଲ୍ଲୀ,୨୭।୯: ରାଜଧାନୀ ଦିଲ୍ଲୀରେ ଗତ ବର୍ଷ ଏକ ଆଇଏଏସ୍ ଦମ୍ପତ୍ତି ନିଜର ପୋଷା କୁକୁର ବୁଲାଇବାକୁ ପୁରା ଷ୍ଟାଡିୟମ ଖାଲି କରୁଥିବା ମାମଲା ବେଶ ଚର୍ଚ୍ଚାରେ ରହିଥିଲା। ଏହା ସାମ୍ନାକୁ ଆସିବା ପରେ କାର୍ଯ୍ୟାନୁଷ୍ଠାନସ୍ବରୂପ ଦମ୍ପତ୍ତିଙ୍କୁ ଅନ୍ୟତ୍ର ଟ୍ରାନ୍ସଫର କରିଦିଆଯାଇଥିଲା। ହେଲେ ଏବେ ସେମାନଙ୍କ ମଧ୍ୟରୁ ଜଣଙ୍କୁ କେନ୍ଦ୍ର ସରକାର ସମୟ ଥାଇ ସେବାନିବୃତ ଅର୍ଥାତ୍ ବାଧ୍ୟତାମୂଳକ ଅବସର ଦେଇଛନ୍ତି।
ଦିଲ୍ଲୀର ଏହି ଘଟଣାରେ ଆଇଏଏସ୍ ଅଫିସର ରିଙ୍କୁ ଦୁଗ୍ଗାଙ୍କୁ ଅରୁଣାଚଳ ପ୍ରଦେଶ ଟ୍ରାନ୍ସଫର କରାଯାଇଥିଲା। ସେଠାରେ ତାଙ୍କର ଚାକିରି କାଳର ରେକର୍ଡକୁ ଦେଖି ସରକାର ତାଙ୍କୁ ବାଧ୍ୟତାମୂଳକ ଅବସର ଦେଇଛନ୍ତି। ତାଙ୍କ ସ୍ବାମୀ ଆଇଏଏସ୍ ଅଫିସର ସଞ୍ଜିବ ଖିରବାର ଏବେ ଲଦାଖରେ କାର୍ଯ୍ୟ କରୁଥିବା ଜଣାପଡ଼ିଛି।
ପ୍ରକାଶ ଯେ, ଆଇଏଏସ୍ ଅଫିସର ରିଙ୍କୁ ଏବଂ ସ୍ବାମୀ ସଞ୍ଜିବ ଦିଲ୍ଲୀରେ ନିଯୁକ୍ତି ପାଇଥିଲେ। ସେଠାରେ ସେମାନେ ତ୍ୟାଗରାଜ ଷ୍ଟାଡିୟମରେ ବୁଲିବାକୁ ଯାଉଥିଲେ। ଯେଉଁ ସମୟରେ ସେମାନେ ଷ୍ଟାଡିୟମରେ ଉପସ୍ଥିତ ରହୁଥିଲେ, ଏହାକୁ ଖାଲି କରାଯାଉଥିଲା। ଏପରିକି ସମସ୍ତ ଖେଳର ଆୟୋଜନ ବନ୍ଦ କରିଦିଆଯାଉଥିଲା। ଏହାର ଭିଡିଓ ଭାଇରାଲ ହେବା ପରେ କେନ୍ଦ୍ର ସରକାରଙ୍କୁ ସମାଲୋଚନାର ଶିକାର ହେବାକୁ ପଡ଼ିଥିଲା।