ନୂଆଦିଲ୍ଲୀ,୨୨।୪: ବିବାହ ବନ୍ଧନରେ ଆବଦ୍ଧ ହୋଇଛନ୍ତି ଚର୍ଚ୍ଚିତ ଆଇଏଏସ୍ ଅଫିସର ଯୋଡ଼ି ଟିନା ଡାବି ଏବଂ ଡା. ପ୍ରଦୀପ ଗାୱେଣ୍ଡେ। ଜୟପୁରର ଏକ ପଞ୍ଚତାରକା ହୋଟେଲରେ ଉଭୟଙ୍କ ବିବାହ ଅନୁଷ୍ଠିତ ହୋଇଛି। ଶୁକ୍ରବାର ଏହି ବିବାହ ବେଳର ଫଟୋ ସାମ୍ନାକୁ ଆସିଛି। ବିବାହ ବେଳେ ଉଭୟ ବେଶ ଖୁସିଥିବା ନଜର ଆସିଛନ୍ତି। ଫଟୋଟି ସାମ୍ନାକୁ ଆସିବା ପରେ ଅନେକ ସୋସିଆଲ ମିଡିଆରେ ନବ ଦମ୍ପତିଙ୍କୁ ଶୁଭେଚ୍ଛା ଜଣାଉଛନ୍ତି। ତେବେ ଗତ ବୁଧବାର ବ୍ୟକ୍ତିଗତ ସମାରୋହରେ ଉଭୟଙ୍କ ବିବାହ ହୋଇଥିବା ବେଳେ ଶୁକ୍ରବାର ଭୋଜି କାର୍ଯ୍ୟକ୍ରମ ରହିଥିବା କୁହାଯାଉଛି।
୨୦୧୬ ବ୍ୟାଚ୍ ଆଇଏଏସ ଅଫିସର ଟିନା ରାଜସ୍ଥାନ କ୍ୟାଡରର ହୋଇଥିବା ବେଳେ ପ୍ରଦୀପ ୨୦୧୩ ବ୍ୟାଚ୍ର ଆଇଏଏସ୍ ଅଫିସର। ଉଭୟେ ରାଜସ୍ଥାନରେ ପୋଷ୍ଟିଂ ହୋଇଛନ୍ତି। ଟିନା ବର୍ତ୍ତମାନ ରାଜସ୍ଥାନ ସରକାରଙ୍କ ଅର୍ଥ ବିଭାଗଗରେ ଯୁଗ୍ମ ନିର୍ଦ୍ଦେଶକ ଥିବା ବେଳେ ପ୍ରଦୀପ ଐତିହ୍ୟ ଏବଂ ସଂଗ୍ରହାଳୟର ନିର୍ଦ୍ଦେଶକ ଅଛନ୍ତି। କରୋନା କାଳରେ ଦୁହିଙ୍କୁ ପରିବହନ ସମ୍ପର୍କିତ ଦାୟିତ୍ୱ ମିଳିଥିବା ସମୟରେ ସମ୍ପର୍କ ଯୋଡ଼ି ହୋଇଥିଲା। ପରେ ଉଭଙ୍କ ମଧ୍ୟରେ ପ୍ରେମ ହୋଇଯାଇଥିଲା।
ତେବେ ୨୯ ବର୍ଷୀୟ ଟିନାଙ୍କ ଏହା ଦ୍ୱିତୀୟ ବିବାହ । ସେ ୨୦୧୮ରେ ଆଇଏଏସ୍ ଅଫିସର ଅତହର ଖାନ୍ଙ୍କୁ ବିବାହ କରିଥିଲେ। ପରେ ମାତ୍ର ୨ବର୍ଷ ଅର୍ଥାତ୍ ୨୦୨୧ରେ ସେମାନଙ୍କ ମଧ୍ୟରେ ଛାଡ଼ପତ୍ର ହୋଇଥିଲା।