ଦୁବାଇ,୨୨।୧୧: ପାକିସ୍ତାନରେ ହେବାକୁ ଥିବା ୨୦୨୫ ଚାମ୍ପିୟନ୍ସ ଟ୍ରଫିରେ ଅଂଶଗ୍ରହଣ କରିବା ଲାଗି କୌଣସି ଦଳ ଅନିଚ୍ଛା ପ୍ରକାଶ କରିବେ ନାହିଁ। ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ପକ୍ଷରୁ ଏଭଳି ଦୃଢ଼ୋକ୍ତି ପ୍ରକାଶ କରାଯାଇଛି। ଗତ ସପ୍ତାହରେ ଅନ୍ତର୍ଜାତୀୟ କ୍ରିକେଟର ସର୍ବୋଚ୍ଚ ସଂସ୍ଥା ୨୦୨୫ ଚାମ୍ପିୟନ୍ସ ଟ୍ରଫି ଆୟୋଜନର ଅଧିକାର ପାକିସ୍ତାନକୁ ଦେଇଥିଲା। ଦୁଇ ଦଶନ୍ଧିର ବ୍ୟବଧାନ ପରେ ପାକିସ୍ତାନକୁ ଫେରିବାକୁ ଯାଉଛି ଆଇସିସି ଇଭେଣ୍ଟ। ଅନ୍ତିମ ଥର ୧୯୯୬ରେ ଭାରତ ଓ ଶ୍ରୀଲଙ୍କା ସହ ମିଶି ପାକିସ୍ତାନ ଦିନିକିଆ ବିଶ୍ୱକପ୍ ଆୟୋଜନ କରିଥିଲା। କିନ୍ତୁ ୨୦୦୯ରେ ଶ୍ରୀଲଙ୍କା ଦଳର ବସ ଉପରେ ଆତଙ୍କବାଦୀ ଆକ୍ରମଣ ପରଠାରୁ ପ୍ରାୟତଃ ଅନ୍ତର୍ଜାତୀୟ ଦଳ ପାକିସ୍ତାନ ଯିବାକୁ ମନା କରି ଦେଉଛନ୍ତି।
”ଦୀର୍ଘ ବର୍ଷ ପରେ ପାକିସ୍ତାନକୁ ଫେରିବାକୁ ଯାଉଛି ଆଇସିସି କ୍ରିକେଟ୍ ଇଭେଣ୍ଟ। ଏଥିରେ ଅଂଶଗ୍ରହଣ କରିବା ଲାଗି କେହି ଅନିଚ୍ଛା ପ୍ରକାଶ କରିବେ ନାହିଁ। ପାକିସ୍ତାନ ପାଖରେ ସଫଳତାର ସହ ଇଭେଣ୍ଟ ଆୟୋଜନ କରିବାର ଦକ୍ଷତା ନ ଥିଲେ ଆଇସିସି ଏଭଳି ନିଷ୍ପତ୍ତି ନେଇ ନ ଥାନ୍ତା। ବିଶ୍ୱ ସ୍ତରୀୟ ଇଭେଣ୍ଟ ଆୟୋଜନ କରିବା ଲାଗି ପାକିସ୍ତାନ ପାଖରେ ଭଲ ସୁଯୋଗ ଅଛି। ମୁଁ ନିଶ୍ଚିତ ଯେ, ସେମାନେ ସଫଳତାର ସହ ଏହି ଇଭେଣ୍ଟ ଆୟୋଜନ କରିବେ“ ବୋଲି ଆଇସିସି ଚେୟାରମ୍ୟାନ ଗ୍ରେଗ ବାର୍ସଲ କହିଛନ୍ତି। ଉଲ୍ଲେଖଯୋଗ୍ୟ, ଗତ ସେପ୍ଟେମ୍ବରରେ ନ୍ୟୁଜିଲାଣ୍ଡ ଓ ଇଂଲଣ୍ଡ ସୁରକ୍ଷା ଜନିତ କାରଣ ଦର୍ଶାଇ ପାକିସ୍ତାନରେ ଦ୍ୱିପାକ୍ଷିକ ସିରିଜ୍ ଖେଳିବାକୁ ମନା କରି ଦେଇଥିଲେ।