ଦୁବାଇ,୨୦।୧୨: ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ରେ ଭାରତୀୟ ଦଳ ଲଜ୍ଜାଜନକ ପରାଜୟ ବରଣ କରିଛି। ଦଳ ପାଇଁ ଗୋଟିଏ ଭଲ ଖବର ହେଲା ଅଧିନାୟକ ବିରାଟ କୋହଲି ଟପ୍ ର଼୍ୟାଙ୍କଧାରୀ ଷ୍ଟିଭ୍ ସ୍ମିଥଙ୍କ ନିକଟତର ହୋଇଛନ୍ତି। ଆଡିଲେଡ୍ ଟେଷ୍ଟର ପ୍ରଥମ ଇନିଂସରେ କୋହଲି ୭୪ ରନ୍ର ଇନିଂସ ଖେଳିଥିଲେ। ଏହି ଅର୍ଦ୍ଧଶତକ ସହ କୋହଲିଙ୍କ ରେଟିଂ ପଏଣ୍ଟରେ ଯୋଡ଼ି ହୋଇଛି ୨ ଅଙ୍କ। ଏଥି ସହ ଟିମ୍ ଇଣ୍ଡିଆ ଅଧିନାୟକଙ୍କ ରେଟିଂ ପଏଣ୍ଟ ୮୮୮ରେ ପହଞ୍ଚିଛି। ଅନ୍ୟପକ୍ଷରେ ଉଭୟ ଇନିଂସରେ ମାତ୍ର ୨ ରନ୍ କରିବାକୁ ସକ୍ଷମ ହୋଇଥିବା ପୂର୍ବତନ ଅଷ୍ଟ୍ରେଲିଆ ଅଧିନାୟକ ସ୍ମିଥଙ୍କୁ ୧୦ ପଏଣ୍ଟ ହରାଇବାକୁ ପଡ଼ିଛି।
ଏବେ କୋହଲି ଓ ନମ୍ବର ଓ୍ବାନ ପୋଜିଶନରେ ଥିବା ସ୍ମିଥ(୯୦୧)ଙ୍କ ମଧ୍ୟରେ ରହିଛି ମାତ୍ର ୧୩ ପଏଣ୍ଟର ଗ୍ୟାପ୍। ତେବେ ଚଳିତ ସିରିଜ୍ରେ ସ୍ମିଥଙ୍କୁ ଅତିକ୍ରମ କରିପାରିବେ ନାହିଁ କୋହଲି । କାରଣ ପ୍ରଥମ ଥର ବାପା ହେବାକୁ ଯାଉଥିବା କୋହଲି ସ୍ବଦେଶ ପ୍ରତ୍ୟାବର୍ତ୍ତନ କରିବେ। ସେ ପରବର୍ତ୍ତୀ ମ୍ୟାଚ୍ ଖେଳିବେ ନାହିଁ।
