ଦୁବାଇ, ୧୩।୧(ପି.ଟି.)- ମଙ୍ଗଳବାର ପ୍ରକାଶିତ ଆଇସିସି ଟେଷ୍ଟ ର଼୍ୟାଙ୍କିଙ୍ଗ୍ର ବ୍ୟାଟ୍ସମ୍ୟାନ ତାଲିକାରେ ଦ୍ୱିତୀୟ ସ୍ଥାନ ହରାଇଛନ୍ତି ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି। ଅଷ୍ଟ୍ରେଲିଆର ଷ୍ଟିଭ୍ ସ୍ମିଥ ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ମାତ୍ର ମିଡିଲ ଅର୍ଡର ବ୍ୟାଟ୍ସମ୍ୟାନ ଚେତେଶ୍ୱର ପୂଜାରା ୨ଟି ସ୍ଥାନ ଉପରକୁ ଉଠି ୮ରେ ପହଞ୍ଚତ୍ଛନ୍ତି। ପ୍ରଥମ ସନ୍ତାନର ପିତା ହୋଇଥିବା କୋହଲି ଅଷ୍ଟ୍ରେଲିଆ ବିପକ୍ଷ ପ୍ରଥମ ଟେଷ୍ଟ ପରେ ସିରିଜରୁ ଓହରି ଯାଇଥିଲେ। ବର୍ତ୍ତମାନ ର଼୍ୟାଙ୍କିଙ୍ଗ୍ରେ ତାଙ୍କ ପଏଣ୍ଟ ୮୭୦ ରହିଛି। ସ୍ମିଥ ୯୦୦ ପଏଣ୍ଟ ସହିତ ଦ୍ୱିତୀୟକୁ ଉଠିଥିବାବେଳେ ନ୍ୟୁଜିଲାଣ୍ଡ ଅତ୍ଧନାୟକ କେନ୍ ଓ୍ବିଲିୟମସନ ୯୧୯ ପଏଣ୍ଟ ସହିତ ଶୀର୍ଷରେ ଅପରିବର୍ତ୍ତିତ ରହିଛନ୍ତି। ସ୍ମିଥ ଭାରତ ବିପକ୍ଷ ତୃତୀୟ ଟେଷ୍ଟରେ ଯଥାକ୍ରମେ ୧୩୧ ଓ ୮୧ ରନ କରି ଫାଇଦା ପାଇଛନ୍ତି। ଖ୍ରୀଷ୍ଟଚର୍ଚ୍ଚଠାରେ ଅନୁଷ୍ଠିତ ପାକିସ୍ତାନ ବିପକ୍ଷ ଦ୍ୱିତୀୟ ଟେଷ୍ଟରେ ସ୍ମରଣୀୟ ୨୩୮ ରନର ଇନିଂସ ଖେଳି ଓ୍ବିଲିୟମସନ ପ୍ରଥମ ନ୍ୟୁଜିଲାଣ୍ଡ ଖେଳାଳିଭାବେ ଶୀର୍ଷରେ ପହଞ୍ଚତ୍ଥିଲେ। ଦୁଇ ଇନିଂସରେ ୫୦ ଓ ୭୭ ରନ କରି ସିଡ୍ନୀ ଟେଷ୍ଟକୁ ଡ୍ର ରଖିବାରେ ଅନ୍ୟତମ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିବା ପୂଜାରା ୮ମ ସ୍ଥାନ ଅଧିକାର କରିଥିବାବେଳେ କାମଚଳା ଅଧିନାୟକ ଅଜିଙ୍କ୍ୟ ରାହାନେ ୭ମ ସ୍ଥାନ ପାଇଛନ୍ତି। ସିଡ୍ନୀରେ ଦୁଇ ଇନିଂସରେ ଯଥାକ୍ରମେ ୩୬ ଓ ୯୭ ରନ କରିଥିବା ରିଷଭ ପନ୍ତ ୧୯ଟି ସ୍ଥାନ ଉପରକୁ ଉଠି ୨୬ତମ ସ୍ଥାନ ପାଇଛନ୍ତି। ହନୁମା ବିହାରୀ ୫୨, ଶୁବମନ ଗିଲ୍ ୬୯ ଓ ରବିଚନ୍ଦ୍ରନ ଅଶ୍ୱିନ ୮୯ତମ ସ୍ଥାନରେ ରହିଛନ୍ତି। ବୋଲିଂ ତାଲିକାରେ ଭାରତର ୨ ବୋଲର ଟପ୍-୧୦ରେ ରହିଛନ୍ତି। ଅଶ୍ୱିନ ୨ ସ୍ଥାନ ତଳକୁ ଖସି ୯ମ ଓ ଯଶପ୍ରୀତ୍ ବୁମ୍ରା ୧୦ମରେ ରହିଛନ୍ତି। ଏହି ତାଲିକାରେ ଅଷ୍ଟ୍ରେଲିଆର ପ୍ୟାଟ୍ କୁମିନ୍ସ ଶୀର୍ଷରେ ଅପରିବର୍ତ୍ତିତ ରହିଛନ୍ତି। ଇଂଲଣ୍ଡର ଷ୍ଟୁଆର୍ଟ ବ୍ରଡ୍ ଓ ନ୍ୟୁଜିଲାଣ୍ଡର ନେଲ୍ ଓ୍ବାଗନର ପରବର୍ତ୍ତୀ ୨ ସ୍ଥାନ ପାଇଛନ୍ତି।
