ଦୁବାଇ, ୭।୧(ପି.ଟି.)- ନ୍ୟୁଜିଲାଣ୍ଡ ପ୍ରଥମଥର ପାଇଁ ଆଇସିସି ଟେଷ୍ଟ ର଼୍ୟାଙ୍କିଙ୍ଗରେ ନମ୍ବରଓ୍ବାନ ସ୍ଥାନ ହାସଲ କରିଛି। ଖ୍ରୀଷ୍ଟଚର୍ଚ୍ଚରେ ବୁଧବାର ଶେଷ ହୋଇଥିବା ଦ୍ୱିତୀୟ ଟେଷ୍ଟରେ ପାକିସ୍ତାନକୁ ଏକ ଇନିଂସ ୧୭୬ ରନରେ ହରାଇବାପରେ ନ୍ୟୁଜିଲାଣ୍ଡ ଏହାର ଟେଷ୍ଟ କ୍ରିକେଟ ଇତିହାସରେ ପ୍ରଥମଥର ଏହି ସଫଳତା ପାଇଛି। ପାକିସ୍ତାନ ବିପକ୍ଷରେ ବୃହତ୍ ବିଜୟ ଯୋଗୁ ଏହା ସମ୍ଭବ ହୋଇଛି। ଗତ ୧୦ ବର୍ଷ ମଧ୍ୟରେ ୬ଷ୍ଠ ଏବଂ ଓଭରଅଲ୍ ବିଶ୍ୱର ୭ମ ଦଳଭାବେ ନ୍ୟୁଜିଲାଣ୍ଡ ନମ୍ବରଓ୍ବାନ ସ୍ଥାନ ଦଖଲ କରିଛି। ଗତ କିଛିବର୍ଷ ଧରି ଏହି ଦଳ ନମ୍ବରଓ୍ବାନର ନିକଟତର ହୋଇଥିଲେ ହେଁ ସଫଳ ହୋଇପାରି ନ ଥିଲା। ନ୍ୟୁଜିଲାଣ୍ଡ ପଏଣ୍ଟ ସଂଖ୍ୟା ଏବେ ୧୧୮ରେ ପହଞ୍ଚତ୍ଛି। ଯାହାକି ଦ୍ୱିତୀୟ ସ୍ଥାନକୁ ଖସିଥିବା ଅଷ୍ଟ୍ରେଲିଆଠାରୁ ୨ ଏବଂ ତୃତୀୟ ସ୍ଥାନୀୟ ଦଳ ଭାରତଠାରୁ ୪ ପଏଣ୍ଟ ଅଧିକ। ଇଂଲଣ୍ଡ ୧୦୬ ଓ ଦକ୍ଷିଣ ଆଫ୍ରିକା ୯୬ ପଏଣ୍ଟ ସହିତ ଟପ୍-୫ରେ ରହିଛନ୍ତି।
ବ୍ୟାଟିଂ ତାଲିକାରେ ଭାରତୀୟ ଅଧିନାୟକ ବିରାଟ କୋହଲି ଓ ଅଷ୍ଟ୍ରେଲିଆର ଷ୍ଟିଭ୍ ସ୍ମିଥ୍ଙ୍କୁ ପଛରେ ପକାଇ କେନ୍ ଓ୍ବିଲିୟମସନ ନିଜର ପ୍ରଥମସ୍ଥାନକୁ ଦୃଢ଼ କରିଛନ୍ତି। ଶେଷ ୬ ଇନିଂସ ମଧ୍ୟରେ ସେ ୨ଥର ଦ୍ୱିଶତକ ହାସଲ କରି ସାରିଛନ୍ତି। ଆଇସିସି ବିଶ୍ୱ ଟେଷ୍ଟ ଚାମ୍ପିୟନ୍ଶିପ୍ ଷ୍ଟାଣ୍ଡିଂରେ ମଧ୍ୟ ନ୍ୟୁଜିଲାଣ୍ଡ ଟପ୍-୨ ସ୍ଥାନର ନିକଟତର ହୋଇଛି।
