ଦୁବାଇ,୧।୩(ପି.ଟି.): ସଦ୍ୟ ପ୍ରକାଶିତ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଟେଷ୍ଟ ର଼୍ୟାଙ୍କିଙ୍ଗ୍ରେ ଭାରତୀୟ ତାରକା ଓପନର ରୋହିତ ଶର୍ମା କ୍ୟାରିୟର ଶ୍ରେଷ୍ଠ ଅଷ୍ଟମ ସ୍ଥାନ ଅଧିକାର କରିଛନ୍ତି। ର଼୍ୟାଙ୍କିଙ୍ଗ୍ର ବ୍ୟାଟିଂ ତାଲିକାରେ ରୋହିତ ୬ଟି ସ୍ଥାନ ଉପରକୁ ଉଠି ଅଷ୍ଟମକୁ ଉଠିଛନ୍ତି। ଇଂଲଣ୍ଡ ବିପକ୍ଷ ଲୋ ସ୍କୋରିଂ ତୃତୀୟ ଟେଷ୍ଟ ମ୍ୟାଚ୍ରେ ରୋହିତ ପ୍ରଥମ ଇନିଂସରେ ୬୬ ଓ ଦ୍ୱିତୀୟ ଇନିଂସରେ ଅପରାଜିତ ୨୫ ରନ ସଂଗ୍ରହ କରି ନିଜ ଦେଶର ଚେତେଶ୍ୱର ପୂଜାରାଙ୍କୁ ପଛରେ ପକାଇଛନ୍ତି। ସେ ୭୪୨ ରେଟିଂ ପଏଣ୍ଟ ହାସଲ କରିଛନ୍ତି। ୨୦୧୯ରେ ସେ କ୍ୟାରିୟର ଶ୍ରେଷ୍ଠ ୧୦ମ ସ୍ଥାନ ଅଧିକାର କରିଥିଲେ।
ତୃତୀୟ ଟେଷ୍ଟର ପ୍ଲେୟାର ଅଫ୍ ଦି ମ୍ୟାଚ୍ ଅକ୍ଷର ପଟେଲ ଓ ରବିଚନ୍ଦ୍ରନ ଅଶ୍ୱିନ ମଧ୍ୟ ର଼୍ୟାଙ୍କିଙ୍ଗ୍ରେ ଉନ୍ନତି କରିଛନ୍ତି। ୧୧ ଉଇକେଟ ଅକ୍ତିଆର କରିଥିବା ଅକ୍ଷର ୩୦ଟି ସ୍ଥାନ ଉପରକୁ ଉଠି ବୋଲିଂ ତାଲିକାର ୩୮ତମ ସ୍ଥାନ ଅଧିକାର କରିଛନ୍ତି। ୭ଟି ଉଇକେଟ ହାସଲ କରିଥିବା ଅଶ୍ୱିନ ୪ଟି ସ୍ଥାନ ଉଠି ତୃତୀୟ ସ୍ଥାନ ଅଧିକାର କରିଛନ୍ତି। ଇଂଲଣ୍ଡ ସ୍ପିନର ଜ୍ୟାକ ଲିଚ୍ ମ୍ୟାଚ୍ରେ ୪ଟି ଉଇକେଟ ଅକ୍ତିଆର କରି ପ୍ରଥମଥର ପାଇଁ ଶ୍ରେଷ୍ଠ ୩୦ରେ ସ୍ଥାନ ପାଇଛନ୍ତି। ୩ଟି ସ୍ଥାନ ଉପରକୁ ଉଠି ସେ ୨୮ତମ ସ୍ଥାନ ଅଧିକାର କରିଛନ୍ତି। ସେହିପରି ପାର୍ଟଟାଇମ୍ ବୋଲିଂର ବେଶ୍ ସଫଳତା ପାଇଥିବା ରୁଟ୍ ୫ ଉଇକେଟ ଅକ୍ତିଆର କରି ବୋଲିଂ ତାଲିକାର ୧୬ଟି ସ୍ଥାନ ଉପରକୁ ଉଠି ୭୨ତମ ସ୍ଥାନ ଅଧିକାର କରିଛନ୍ତି। ଅଲ୍ରାଉଣ୍ଡର ତାଲିକାରେ ସେ ଟିମ୍ ସୌଦିଙ୍କ ସହ ଯୁଗ୍ମ ୧୩ତମ ସ୍ଥାନ ଅଧିକାର କରିଛନ୍ତି। ପ୍ରଥମ ଇନିଂସରେ ଅପରାଜିତ ୫୩ ରନର ଅର୍ଦ୍ଧଶତକୀୟ ପାଳି ଖେଳିଥିବା ଓପନର ଜ୍ୟାକ କ୍ରଲି ୧୫ଟି ସ୍ଥାନ ଉପରକୁ ଉଠି ୪୬ତମ ସ୍ଥାନରେ ରହିଛନ୍ତି ଓ ଇଂଲଣ୍ଡ ବ୍ୟାଟ୍ସମ୍ୟାନଙ୍କ ପାଇଁ ଏହା ଉଲ୍ଲେଖନୀୟ ଘଟଣା ସାବ୍ୟସ୍ତ ହୋଇଛି।
ଇତିମଧ୍ୟରେ ଖେଳାଳିଙ୍କ ର଼୍ୟାଙ୍କିଙ୍ଗ୍ ୨୦୨୧ ମାର୍ଚ୍ଚରୁ ପ୍ରତି ସପ୍ତାହରେ ଅପ୍ଡେଟ କରାଯିବ ବୋଲି ଆଇସିସି ତରଫରୁ କୁହାଯାଇଛି। ପୂର୍ବରୁ କୌଣସି ଫର୍ମାଟର ସିରିଜ ଶେଷ ହେବା ପରେ ର଼୍ୟାଙ୍କିଙ୍ଗ୍ ପ୍ରକାଶିତ ହୋଇଥାଏ। କିନ୍ତୁ ଏଥର ମ୍ୟାଚ୍ କିମ୍ବା ସିରିଜ ଚାଲିଥିବା ବେଳେ ଖେଳାଳିଙ୍କ ପ୍ରଦର୍ଶନକୁ ଅଣଦେଖା କରାଯାଇ ର଼୍ୟାଙ୍କିଙ୍ଗ୍ ପ୍ରକାଶିତ କରାଯିବ ବୋଲି ଆଇସିସି କହିଛି।
