ନୂଆଦିଲ୍ଲୀ,୨୩।୬: ଅନ୍ତିମ ଥର ୨୦୧୩ରେ ଟିମ୍ ଇଣ୍ଡିଆ ହାତେଇଥିଲା ଆଇସିସି ଟ୍ରଫି। ତା’ ପରଠୁ ଖେଳାଯାଇଥିବା ୪ଟି ଆଇସିସି ଟୁର୍ନାମେଣ୍ଟରେ ଭାରତୀୟ ଦଳ ଫାଇନାଲ କିମ୍ବା ସେମିଫାଇନାଲରେ ଖେଳିଆସୁଛି। ହେଲେ ହାତକୁ ଆସୁନି ଆଇସିସି ଟ୍ରଫି। ୨୦୧୪ରେ ଟି୨୦ ବିଶ୍ୱକପ୍ ଫାଇନାଲରେ ଶ୍ରୀଲଙ୍କାଠାରୁ ପରାସ୍ତ ହୋଇଥିଲା ମହେନ୍ଦ୍ର ସିଂ ଧୋନୀଙ୍କ ଟିମ୍ ଇଣ୍ଡିଆ। ତା’ର ପରବର୍ଷ ଭାରତୀୟ ଦଳ ଆଇସିସି ଦିନିକିଆ ବିଶ୍ୱକପ୍ ସେମିଫାଇନାଲରେ ପହଞ୍ଚିଥିଲା। କିନ୍ତୁ ଅଷ୍ଟ୍ରେଲିଆଠାରୁ ପରାଜୟ ପରେ ଶେଷ ହୋଇଥିଲା ଧୋନୀଙ୍କ ନେତୃତ୍ୱାଧୀନ ଦଳର ଅଭିଯାନ।
ଦୁଇ ବର୍ଷ ପରେ ବଦଳି ଥିଲେ ଭାରତୀୟ ଦଳର ଅଧିନାୟକ। ବିରାଟ କୋହଲିଙ୍କ ନେତୃତ୍ୱରେ ଭାରତ ୨୦୧୭ ଚାମ୍ପିୟନ୍ସ ଟ୍ରଫି ଫାଇନାଲରେ ପାକିସ୍ତାନଠାରୁ ଧୂଳି ଚାଟିଥିଲା। ୨୦୧୯ ଆଇସିସି ବିଶ୍ୱକପ୍ରେ ଭାରତୀୟ ଦଳର ଅଭିଯାନକୁ ସେମିଫାଇନାଲରେ ବାଧା ଦେଇଥିଲା ନ୍ୟୁଜିଲାଣ୍ଡ।
