ପିଲାଙ୍କଠାରୁ ବୟସ୍କ ପର୍ଯ୍ୟନ୍ତ ସମସ୍ତେ ପ୍ରାୟ ଆଇସ୍କ୍ରିମ୍ ଖାଇବାକୁ ଭଲ ପାଆନ୍ତି। ସାଧାରଣତଃ ଆଇସ୍କ୍ରିମ୍ ଖାଇବା ବିଳମ୍ବ ହେଲେ ତାହା ତରଳି ଯାଇଥାଏ ବୋଲି ଆମେ ଜାଣିଛେ। ମାତ୍ର ଚାଇନାରେ ଏହି ସମସ୍ୟାର ସମାଧାନ ପାଇଁ ଏପରି ଏକ ଆଇସ୍କ୍ରିମ୍ ତିଆରି ହୋଇଛି, ଯାହା ତରଳି ନ ଥାଏ। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ।
ଚାଇନାର ପ୍ରିମିୟମ୍ ଆଇସ୍କ୍ରିମ୍ କମ୍ପାନୀ ଏପରି ଆଇସ୍କ୍ରିମ୍ ପ୍ରସ୍ତୁତ କରିଛି, ଯାହା ୩୧ ଡିଗ୍ରୀ ସେଲସିୟସ୍ ତାପମାତ୍ରାରେ ମଧ୍ୟ ତରଳି ନ ଥାଏ। ଏହି ଆଇ୍ସ୍କ୍ରିମ୍କୁ ନେଇ ଏବେ ଚାଇନାର ସୋସିଆଲ ମିଡିଆରେ ଅନେକ ଚର୍ଚ୍ଚା ସହ ଏକ ବିବାଦ ମଧ୍ୟ ମୁଣ୍ଡ ଟେକିଛି।
ଚାଇନାର ପ୍ରସିଦ୍ଧ ଆଇସ୍କ୍ରିମ୍ କମ୍ପାନୀ ଜୋଙ୍ଗ୍ସୁଏଗାଓ ଏପରି ଆଇସ୍କ୍ରିମ୍ ପ୍ରସ୍ତୁତ କରିଛି। ଏହି କମ୍ପାନୀ ଏହାର ଉଚ୍ଚ ଗୁଣବତ୍ତା ଉତ୍ପାଦ ପାଇଁ ଚାଇନାରେ ବେଶ୍ ଜଣାଶୁଣା। ଚାଇନାର ସୋସିଆଲ ମିଡିଆରେ ଜଣେ ୟୁଜର ଉକ୍ତ କମ୍ପାନୀର ଆଇସ୍କ୍ରିମ୍ ଥର୍ମୋମିଟରରେ ପରୀକ୍ଷା କରୁଥିବାର ଏକ ଫଟୋ ଏବଂ ଭିଡିଓ ପୋଷ୍ଟ କରିଥିଲେ, ଯେଉଁଥିରେ ଆଇସ୍କ୍ରିମ୍ ୩୧ ଡିଗ୍ରୀ ସେଲ୍ସିୟସ୍ରେ ମଧ୍ୟ ତରଳି ନ ଥିଲା। ଆଇସ୍କ୍ରିମ୍କୁ ଏହି ତାପମାତ୍ରାରେ ପ୍ରାୟ ଦେଢ଼ ଘଣ୍ଟା ରଖାଯାଇଥିଲା ତଥାପି ଏହା ତରଳି ନ ଥିଲା। ଏହା ପରେ ଲୋକମାନେ ଆଇସ୍କ୍ରିମ୍ ପରୀକ୍ଷା ଆରମ୍ଭ କଲେ। କେହି କେହି ଆଇସ୍କ୍ରିମ୍କୁ ସିଧାସଳଖ କ୍ୟାଣ୍ଡେଲର ନିଆଁ ଲଗାଇଥିଲେ ମାତ୍ର ଏହା ତରଳି ନ ଥିଲା।
ଏହି ଆଇସ୍କ୍ରିମ୍କୁ ନେଇ ବହୁ ଚର୍ଚ୍ଚା ପରେ ଜୋଙ୍ଗ୍ସୁଏଗାଓ କମ୍ପାନୀ କହିଛି, ଏଥିରେ ବ୍ୟବହୃତ ତାପମାତ୍ର ବୃଦ୍ଧିକାରୀ ଏଜେଣ୍ଟ ଯୋଗୁ ଆଇସ୍କ୍ରିମ୍ ସହଜରେ ତରଳିଯାଏ ନାହିଁ। ଏଥିସହ ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଏହା ସ୍ବାସ୍ଥ୍ୟ ପାଇଁ କ୍ଷତିକାରକ ନୁହେଁ ଏବଂ ଏହା ଜାତୀୟ ଖାଦ୍ୟ ନିରାପତ୍ତା ଦ୍ୱାରା ପ୍ରମାଣିତ ହୋଇଛି। ଯେହେତୁ ଏହି ବ୍ରାଣ୍ଡ୍ ଚାଇନାର ଏକ ପ୍ରିମିୟମ୍ ବ୍ରାଣ୍ଡ୍ ଏବଂ ଏହାର ଶସ୍ତା ଆଇସ୍କ୍ରିମର ମୂଲ୍ୟ ମଧ୍ୟ ୧୫୦ ଟଙ୍କା ପର୍ଯ୍ୟନ୍ତ ରହିଛି, ଏଭଳି ପରିସ୍ଥିତିରେ ଏହାର ବଦନାମ ନ କରିବାକୁ କମ୍ପାନୀ ଲୋକଙ୍କୁ ଅନୁରୋଧ କରିଛି।