ଗାଜା,୧୪।୧୧: ଇସ୍ରାଏଲ ହମାସ ଯୁଦ୍ଧକୁ ୩୯ ଦିନ ହୋଇଛି। ଗାଜାରେ ଇସ୍ରାଏଲ ସେନା ଏବଂ ହମାସ ମଧ୍ୟରେ ଯୁଦ୍ଧ ଜାରି ରହିଛି। ଯୁଦ୍ଧ ହେତୁ ଗାଜାରେ ଏପର୍ଯ୍ୟନ୍ତ ୨୩ଲକ୍ଷ ଲୋକଙ୍କୁ ନିଜ ଘର ଛାଡି ସୁରକ୍ଷିତ ସ୍ଥାନକୁ ଯିବାକୁ ପଡିବ।
ଅକ୍ଟୋବର ୭ରୁ ଚାଲିଆସୁଥିବା ଏହି ଯୁଦ୍ଧରେ ୧୧,୦୦୦ରୁ ଅଧିକ ପାଲେଷ୍ଟାଇନୀୟଙ୍କର ମୃତ୍ୟୁ ଘଟିଛି। ଇସ୍ରାଏଲ କହିଛି ଯେ ସେନା ସବୁ ଦିଗରୁ ଗାଜା ସହରକୁ ଘେରି ରହିଛି। ଏଥି ସହିତ ଜଣେ ଇସ୍ରାଏଲ ସେନା ଦାବି କରିଛନ୍ତି ଯେ ସେନା ହମାସର ‘ସଂସଦ’ ଦଖଲ କରିଛି।
ଇସ୍ରାଏଲ ସେନା ସୋସିଆଲ ମିଡିଆରେ ଏକ ଫଟୋ ଶେୟାର କରିଛନ୍ତି ଯେଉଁଥିରେ ଦେଖିବାକୁ ମିଳେ ଯେ ଗାଜାର ହମାସ ସଂସଦ ଭବନ ଭିତରେ ଆଇଡିଏଫର ଗୋଲାନି ବ୍ରିଗେଡ ଉପସ୍ଥିତ ଅଛନ୍ତି ଏବଂ ସେମାନେ ନିଜ ଦେଶର ପତାକା ଉତ୍ତୋଳନ କରୁଛନ୍ତି। ଫଟୋରେ ଏହା ଦେଖିବାକୁ ମିଳେ ଯେ ଇସ୍ରାଏଲ ସୈନିକମାନେ ସଂସଦର ବାଚସ୍ପତିଙ୍କ ଚେୟାରରେ ବସିଛନ୍ତି।
ଟାଇମ୍ସ ଅଫ ଇସ୍ରାଏଲ ରିପୋର୍ଟ ଅନୁଯାୟୀ, ପାଲେଷ୍ଟାଇନ ବିଧାନ ପରିଷଦ ବିଲଡିଂ ୨୦୦୭ରୁ ହମାସ ଅଧୀନରେ ଥିଲା, ଯାହା ବର୍ତ୍ତମାନ ଇସ୍ରାଏଲ ସେନାଙ୍କ ଅଧୀନକୁ ଆସିଛି।
