ବାରଣାସୀ,୧୫।୧୧: ୧୦୮ ବର୍ଷ ପରେ କାନାଡାରୁ ଫେରିଥିବା ଅନ୍ନପୂର୍ଣ୍ଣା ଦେବୀଙ୍କ ମୂର୍ତ୍ତିକୁ ବାରଣାସୀର କାଶି ବିଶ୍ୱନାଥ ମନ୍ଦିରରେ ସୋମବାର ପ୍ରତିଷ୍ଠା କରାଯାଇଛି। ଏଥିଲାଗି ଆୟୋଜିତ ଉତ୍ସବରେ ଯୋଗ ଦେଇଥିଲେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ। ଦେବୀଙ୍କ ମୂର୍ତ୍ତୀକୁ ଏକ ରୂପା ପାଲଙ୍କିରେ ମନ୍ଦିରକୁ ନିଆଯାଇଥିଲା। ଏହାକୁ କାନ୍ଧେଇ ଥିଲେ ମୁଖ୍ୟମନ୍ତ୍ରୀ ଆଦିତ୍ୟନାଥ।
୧୦୮ ବର୍ଷ ତଳେ ଏହି ମୂର୍ତ୍ତିକୁ ୟୁପିରୁ ଚୋରି କରି କାନାଡା ନିଆଯାଇଥିଲା। ୧୮ଶ ଶତାବ୍ଦିର ମୂର୍ତ୍ତୀ ମ୍ୟାକେଞ୍ଜି ଆର୍ଟ ଗ୍ୟାଲେରିର ୟୁନିଭର୍ସିଟି ଅଫ୍ ରେଗିନାର କଲେକଶନରେ ରହିଥିଲା। ୨୦୧୯ରେ ଓ୍ବିନିପେଗର ପ୍ରତିଷ୍ଠିତ ଆର୍ଟିଷ୍ଟ ଦିବ୍ୟା ମେହେରାଙ୍କୁ ମ୍ୟାକେଞ୍ଜି ଆର୍ଟ ଗ୍ୟାଲେରିରେ ଏକ ପ୍ରଦର୍ଶନୀ ପାଇଁ ଡକାଯାଇଥିଲା। ସେଠାରେ ତାଙ୍କ ନଜରକୁ ଆସିଥିଲା ଅନ୍ନପୂର୍ଣ୍ଣା ଦେବୀଙ୍କ ମୂର୍ତ୍ତି, ଯାହାକୁ ୧୯୧୩ରେ ବାରଣାସୀରୁ ଚୋରି କରି ଅଣାଯାଇଥିଲା। ମୂର୍ତ୍ତିକୁ ଚିହ୍ନଟ କରିବା ପାଇଁ ପିବିଡି ଏସ୍ଏକ୍ସ ମ୍ୟୁଜିୟମକୁ ଭାରତ ଓ ସାଉଥ୍ ଏସିଆନ୍ ଆର୍ଟ କ୍ୟୁରେଟର ସିଦ୍ଧାର୍ଥ ଭି ଶାହଙ୍କୁ ଡକା ଯାଇଥିଲା। ମୂର୍ତ୍ତିଟି ଅନ୍ନପୂର୍ଣ୍ଣା ଦେବୀଙ୍କର ବୋଲି ସେ ସ୍ପଷ୍ଟ କରିଥିଲେ।
ପରେ ମୂର୍ତ୍ତିକୁ ଭାରତ ଫେରାଇ ନେବା ପାଇଁ ମ୍ୟାକେଞ୍ଜି ଆର୍ଟ ଗ୍ୟାଲେରିର କାର୍ଯ୍ୟକାରୀ ସିଇଓ ଜନ ହମ୍ପଟନଙ୍କୁ ନିବେଦନ କରିଥିଲେ ମେହରା। ଗ୍ୟାଲେରି ଏଥିରେ ରାଜି ହେବା ପରେ ଭାରତୀୟ ହାଇ କମିଶନ ଓ କାନାଡାର ସଂସ୍କୃତି ବିଭାଗ ଅଧିକାରୀ ମୂର୍ତ୍ତିକୁ ଭାରତ ଫେରାଇବା ବ୍ୟବସ୍ଥା କରିଥିଲେ। ଗତ ୧୧ ତାରିଖରେ କେନ୍ଦ୍ର ସଂସ୍କୃତି ମନ୍ତ୍ରୀ ଜି କିଷନ ରେଡ୍ଡୀ ଉତ୍ତରପ୍ରଦେଶ ସରକାରଙ୍କୁ ମୂର୍ତ୍ତି ହସ୍ତାନ୍ତର କରିଥିଲେ।
