ବ୍ରହ୍ମପୁର ଅଫିସ,୩୧।୭ା: ବିଭିନ୍ନ ଦାବି ନେଇ ଏମ୍କେସିଜି ମେଡିକାଲ କଲେଜ ହସ୍ପିଟାଲ ଆଉଟସୋର୍ସିଂ କର୍ମଚାରୀମାନେ ରବିବାର ବିକ୍ଷୋଭ ପ୍ରଦର୍ଶନ କରିଛନ୍ତି। ମେଡିକାଲରେ କାର୍ଯ୍ୟରତ ସମସ୍ତ ସିଫ୍ଟର ଆଟେଣ୍ଡାଣ୍ଟମାନେ ସୁପରିଟେଣ୍ଡେଣ୍ଟଙ୍କ କାର୍ଯ୍ୟଳୟ ନିକଟସ୍ଥ ଷ୍ଟେୱାର୍ଡ କାର୍ଯ୍ୟାଳୟ ଆଗରେ ୧ ଘଣ୍ଟା ଧରି ବିକ୍ଷୋଭ ପ୍ରଦର୍ଶନ କରିଥିଲେ। ଏଥିରେ ସଂଘର ସଭାପତି ସି. ଏଚ୍ ସୁନିଲ ପାତ୍ର ନେତୃତ୍ୱ ନେଇଥିଲେ।
ଏହି ଅବସରରେ ଅନୁଷ୍ଠିତ ଏକ ସଭାରେ ସଂଘ ପକ୍ଷରୁ ରହିଥିବା ଦାବିଗୁଡିକ ପୂରଣ ନ ହେଲେ ସପ୍ତାହକ ମଧ୍ୟରେ କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନ କରିବାକୁ ଚେତାବନୀ ଦିଆଯାଇଛି। ସମ୍ପୃକ୍ତ ଏଜେନ୍ସିମାନଙ୍କ ସ୍ଥାନୀୟ କାର୍ଯ୍ୟାଳୟ, ମାସର ପ୍ରଥମ ସପ୍ତାହରେ ଦରମା ପ୍ରଦାନ, ବକେୟା ଥିବା ବର୍ଦ୍ଧିତ ଦରମା ତୁରନ୍ତ ପ୍ରଦାନ, ସରକାରଙ୍କ ନିର୍ଦ୍ଦେଶ ଅନୁଯାୟୀ ବାର୍ଷିକ ୧୨ଟି ସବୈତନିକ ଛୁଟି, ଇପିଏଫ ଓ ଇଏସ୍ଆଇ ବାବଦ ଅର୍ଥ ପୈଠ, ଆଉଟସୋର୍ସିଂ କର୍ମଚାରୀମାନଙ୍କ ପ୍ରତି କଠୋରତାକୁ କୋହଳ, ପ୍ରତ୍ୟେକ ଆଉଟସୋର୍ସିଂ କର୍ମଚାରୀମାନଙ୍କୁ ସେମାନଙ୍କ ଦରମାର ବୈଧାନିକ ପେ-ସ୍ଲିପ ପ୍ରଦାନ ଆଦି ଦାବି ନେଇ ମେଡିକାଲ ସୁପରିଟେଣ୍ଡେଣ୍ଟ, ପ୍ରିନ୍ସିପାଲ, ଦକ୍ଷିଣାଞ୍ଚଳ ରାଜସ୍ବ କମିଶନର ଏବଂ ଜିଲା ପ୍ରଶାସନ ନିକଟକୁ ଏକ ସ୍ମାରକପତ୍ର ପଠାଯାଇଛି। ଆନ୍ଦୋଳନରେ ସଂଘର ଉପଦେଷ୍ଠା ଭାଲଚନ୍ଦ୍ର ଷଡ଼ଙ୍ଗୀ, ଯୁବନେତା ଲକ୍ଷ୍ମୀ ନୃସିଂହ ରଥ, ସମ୍ପାଦକ ଏନ୍. ନିରଞ୍ଜନ ଦାସ, ଜୟରାମ ରାଓ, ଉପସଭାପତି ରମେଶ ରାଓ, ଚନ୍ଦ୍ର ପାତ୍ର, ବିଷ୍ଣୁ ପାତ୍ର, କାହ୍ନୁ ଚରଣ ନାୟକ, ମୁରଲୀ ରାଜୁ, ରାଜଲକ୍ଷ୍ମୀ ସାହୁ, ସୁଜିତ ପାତ୍ର, ଶ୍ରୀନିବାସ ପାତ୍ର, ସମୀର ବର୍ମା ପ୍ରମୁଖ ଉପସ୍ଥିତ ଥିଲେ।