ଲକ୍ଷ୍ନୌ,୨।୮: ଉତ୍ତରପ୍ରଦେଶରେ ଏକ ଅଭାବନୀୟ ଘଟଣା ଘଟିଛି। ଜଣେ ଯୁବତୀ ତାଙ୍କଠାରୁ ୧୦ ବର୍ଷ ସାନ ଯୁବକଙ୍କୁ ବିବାହ ପାଇଁ ଧମକ ଦେଇଥିବା ଥାନାରେ ଅଭିଯୋଗ ହୋଇଛି। ଅଲ୍ଲୀଗଡ଼ ବିଶ୍ୱ ବିଦ୍ୟାଳୟରେ ବିଏସ୍ସି ପଢୁଥିବା ୧୯ ବର୍ଷ ବୟସ୍କ ଅଦିଲ୍ ଉଲାହଙ୍କୁ ଜଣେ ୨୯ ବର୍ଷ ବୟସ୍କା ଯୁବତୀ ବାହା ହେବା ଲାଗି ଅଡ଼ି ବସିଛନ୍ତି। ଅଦିଲ୍ ତାଙ୍କୁ ବିବାହ ନ କଲେ ସେ ବଳାତ୍କାର ଅଭିଯୋଗ ଆଣିବେ ବୋଲି ଧମକ ମଧ୍ୟ ଦେଉଛନ୍ତି। ଏନେଇ ଆଦିଲ୍ ସିଭିଲ୍ ଲାଇନ୍ ଥାନାରେ ଅଭିଯୋଗ କରିବା ସହିତ ଅଲ୍ଲୀଗଡ଼ ସିଜେଏମ୍ କୋର୍ଟରେ ନ୍ୟାୟ ପାଇଁ ଆବେଦନ କରିଛନ୍ତି। ଯୁବତୀଙ୍କ ପରିବାରର କିଛି ସଦସ୍ୟ ମଧ୍ୟ ଏଥିରେ ସାମିଲ୍ ଥିବା ଅଭିଯୋଗ ହୋଇଛି। ଆଦିଲ ଯୁବତୀଙ୍କ ଭଉଣୀଙ୍କ ପିଲାଙ୍କ ଟ୍ୟୁସନ କରିବାକୁ ଯାଉଥିଲେ। ଗତ କିଛି ମାସ ଧରି ଯୁବତୀ ଜଣକ ଆଦିଲ୍ଙ୍କୁ ବିବାହ କରିବାକୁ ଅଡ଼ି ବସିଥିବା କୁହାଯାଉଛି। ଘଟଣାର ତଦନ୍ତ ପାଇଁ କୋର୍ଟ ପୋଲିସକୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।