ନୂଆଦିଲ୍ଲୀ,୧।୧୨: ପଞ୍ଜାବ କିଙ୍ଗ୍ସ ଦଳର ଅଧିନାୟକ ଲୋକେଶ ରାହୁଲ ନୂଆ ଫ୍ରାଞ୍ଚାଇଜ ଯୋଗାଯୋଗରେ ଥିବା ରିପୋର୍ଟ ପ୍ରକାଶ ପାଇବା ପରେ ପ୍ରଥମ ଥର ପାଇଁ ମୁହଁ ଖୋଲିଛନ୍ତି ପଞ୍ଜାବ ଫ୍ରାଞ୍ଚାଇଜର ସହମାଲିକ ନେସ ଓ୍ବାଡିଆ। ଯଦି ରାହୁଲଙ୍କୁ ନୂଆ ଫ୍ରାଞ୍ଚାଇଜ ପକ୍ଷରୁ ଯୋଗାଯୋଗ କରାଯାଇ ଥାଏ, ତେବେ ଏହା ବିସିସିଆଇର ନିୟମ ବିରୋଧରେ ବୋଲି ଓ୍ବାଡିଆ କହିଛନ୍ତି।
୨୦୨୦ ସିଜନ ପୂର୍ବରୁ ରବିଚନ୍ଦ୍ରନ ଅଶ୍ୱିନଙ୍କ ସ୍ଥାନରେ ରାହୁଲଙ୍କୁ ଦଳର ନେତୃତ୍ୱ ଭାର ଦିଆଯାଇଥିଲା। ସେବେଠାରୁ ସେ ବ୍ୟାଟରେ ଭଲ ପ୍ରଦର୍ଶନ କରି ଆସୁଥିଲେ ମଧ୍ୟ ଦଳକୁ ଫ୍ଲେ-ଅଫ୍ରେ ପହଞ୍ଚାଇ ପାରି ନ ଥିଲେ। ସେ ଏବେ ନୂଆ ଲକ୍ଷ୍ନୌ ଫ୍ରାଞ୍ଚାଇଜ ଯୋଡ଼ି ହେବାକୁ ଯାଉଛନ୍ତି। ରିପୋର୍ଟ ମୁତାବକ ଆରପିଏସ୍ଜି ଗ୍ରୁପ୍ ସମର୍ଥତ୍ତ ଫ୍ରାଞ୍ଚାଇଜର ସେ କ୍ୟାପଟେନ ଭାର ସମ୍ଭାଳିବେ।
“ଆମେ ରାହୁଲଙ୍କୁ ରିଟେନ କରିବାକୁ ଚାହୁଁଥିଲୁ। କିନ୍ତୁ ସେ ଅକଶନକୁ ଯିବା ପାଇଁ ଇଚ୍ଛା ପ୍ରକଟ କରିଥିଲେ। ଯଦି ଅକଶନ ପୂର୍ବରୁ ତାଙ୍କୁ ଅନ୍ୟ ଫ୍ରାଞ୍ଚାଇଜ ପ୍ରସ୍ତାବ ଦିଏ, ତେବେ ଏହା ନିୟମ ବିରୋଧରେ ହେବ” ବୋଲି ପଞ୍ଜାବ କିଙ୍ଗ୍ସ ସହମାଲିକ ନେସ ଓ୍ବାଡିଆ କହିଛନ୍ତି। ରାହୁଲ ଅନ୍ୟ ଫ୍ରାଞ୍ଚାଇଜ ସହ ଯୋଗାଯୋଗରେ ଥିବା ଜଣାପଡ଼ିଲେ ତାଙ୍କୁ ଏକ ବର୍ଷ ଲାଗି ଆଇପିଏଲରୁ ବାସନ୍ଦ ହେବାକୁ ପଡ଼ିପାରେ।
ଉଲ୍ଲେଖଯୋଗ୍ୟ, ୨୦୧୦ରେ ପ୍ରଥମ ଥର ପାଇଁ ଆଇପିଏଲରେ ଖେଳାଳିଙ୍କ ପୋଚିଂ ଘଟଣା ସାମ୍ନାକୁ ଆସିଥିଲା। ସେତେବେଳେ ବର୍ଷକ ଲାଗି ବାସନ୍ଦ ହୋଇଥିଲେ ସିଏସ୍କେ ଅଲରାଉଣ୍ଡର ରବୀନ୍ଦ୍ର ଜାଡେଜା। ରାଜସ୍ଥାନ ରୟାଲ୍ସ ଦଳ ସହ ତାଙ୍କ ଚୁକ୍ତି ଶେଷ ହୋଇ ନ ଥିବା ବେଳେ ସେ ଅନ୍ୟ ଫ୍ରାଞ୍ଚାଇଜ ସହ ଆଲୋଚନା କରିଥିଲେ।