ବ୍ରିସ୍ବେନ,୧୪।୧(ପି.ଟି.): ଯୁବ ଓପନର ଓ୍ବିଲ୍ ପୁକୋଭସ୍କି ଫିଟ୍ ନ ହେଲେ ତାଙ୍କ ସ୍ଥାନରେ ମାର୍କସ ହାରିସ୍ ଚତୁର୍ଥ ତଥା ଅନ୍ତିମ ଟେଷ୍ଟରେ ଇନିଂସ ଓପନ କରିବେ ବୋଲି ଅଷ୍ଟ୍ରେଲିଆ ହେଡ୍ କୋଚ୍ ଜଷ୍ଟିନ ଲାଙ୍ଗର କହିଛନ୍ତି। ସିଡ୍ନୀ ଟେଷ୍ଟ ଖେଳିବା ଅବସରରେ ପୁକୋଭସ୍କି କାନ୍ଧରେ ଆଘାତ ପାଇଥିଲେ। ସେ ଏହି ମ୍ୟାଚ୍ରେ ପଦାର୍ପଣ କରିଥିଲେ। ଫିଲ୍ଡିଂ କରୁଥିବାବେଳେ ଡ୍ରାଇଭ୍ ମାରିବା ଅବସରରେ ୨୨ ବର୍ଷୀୟ ପୁକୋଭସ୍କି ଆହତ ହୋଇଥିଲେ। ସ୍କାନ ପାଇଁ ସେ ଯାଇଛନ୍ତି। ଯଦି ସେ ଫିଟ୍ ଘୋଷିତ ହୁଅନ୍ତି ତେବେ ତାଙ୍କ ଖେଳିବାର କିଛି ଅସୁବିଧା ନାହିଁ। କିନ୍ତୁ ସେ ଫିଟ୍ ନ ଥିଲେ ତାଙ୍କ ସ୍ଥାନରେ ହାରିସ୍ ଖେଳିବେ। ପୁକୋଭସ୍କିଙ୍କ ଉପରେ ଆମେ ନଜର ରଖିଛୁ ବୋଲି ଲାଙ୍ଗର କହିଛନ୍ତି। ପଦାର୍ପଣରେ ସେ ଅର୍ଦ୍ଧଶତକ ହାସଲ କରି ନିଜ ପ୍ରତିଭାର ପ୍ରମାଣ ଦେଇଥିଲେ। ଅନ୍ୟପଟେ ହାରିସ୍ ଏପର୍ଯ୍ୟନ୍ତ ଅଷ୍ଟ୍ରେଲିଆ ପାଇଁ ୯ ଟେଷ୍ଟ ମ୍ୟାଚ ଖେଳି ୩୮୫ ରନ ସଂଗ୍ରହ କରିଛନ୍ତି। ତାଙ୍କ ବ୍ୟକ୍ତିଗତ ସର୍ବାଧିକ ସ୍କୋର ୭୯ ରହିଛି। ଚଳିତ ଭାରତ- ଅଷ୍ଟ୍ରେଲିଆ ଟେଷ୍ଟ ସିରିଜ ୧-୧ ସମାନସ୍ତରରେ ରହିଛି। ଅଷ୍ଟ୍ରେଲିଆ ଆଡିଲେଡ ଟେଷ୍ଟରେ ବିଜୟୀ ହୋଇଥିବା ବେଳେ ଭାରତ ମେଲବୋର୍ନରେ ବାଜି ମାରିଥିଲା। ତେବେ ସିଡ୍ନୀରେ ଅନୁଷ୍ଠିତ ତୃତୀୟ ଟେଷ୍ଟ ନାଟକୀୟ ଢଙ୍ଗରେ ଅମୀମାଂସିତ ରହିଥିଲା।
