ନୟାଗଡ଼,୨୧ା୧୦(ଲୋକନାଥ ମିଶ୍ର): ବିପର୍ଯ୍ୟସ୍ତ ଟ୍ରାଫିକ୍ ସମସ୍ୟାକୁ ସୁଧାରିବାକୁ ନୟାଗଡ଼ ମ୍ୟୁନିସିପାଲିଟି ଉଦ୍ୟମ କରିଛି। ରାସ୍ତାରେ ଗୋରୁ ବୁଲିଲେ ସେମାନଙ୍କୁ ଉଦ୍ଧାର କରି ଗୋଶାଳାରେ ରଖାଯିବ। ଗୋ ମାଲିକ ଜରିମାନା ଦେଲେ ଛଡା ଯିବ। କେହି ଦାବିଦାର ନ ଥିଲେ ବିକ୍ରି ବି କରାଯିବ। ଗୋରଙ୍କ ଉପରେ ଲାଗିଥିବା କଟକଣା ନେଇ ନୟାଗଡ଼ ମ୍ୟୁନିସିପାଲିଟି ପକ୍ଷରୁ ସଚେତନତା ଆରମ୍ଭ ହୋଇଛି। ସଫେଇ ଗାଡିରେ ନୟାଗଡ଼ ମ୍ୟୁନିସିପାଲିଟି ପକ୍ଷରୁ ପ୍ରଚାର କରାଯାଉଛି। ଅନ୍ୟପକ୍ଷେ ଶୁକ୍ରବାର ମ୍ୟୁନିସିପାଲିଟି ପକ୍ଷରୁ କରାଯାଇଥିବା କାଉନସିଲ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏହାକୁ କାର୍ଯ୍ୟକାରୀ କରାଯିବାକୁ କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଇଛି।
ଜିଲା ସଦର ମହକୁମାରେ ଥିବା ନୟାଗଡ଼ ମ୍ୟୁନିସିପାଲିଟିରେ ଗୋରୁ ଓ କୁକୁର ରାସ୍ତାଘାଟରେ ସବୁବେଳେ ବୁଲୁ ଥିବାରୁ ବିଭିନ୍ନ ସମୟରେ ଦୁର୍ଘଟଣା ହେଉଛି। ସହର ମଧ୍ୟ ଦେଇ ବଲାଙ୍ଗୀର-ଖୋର୍ଦ୍ଧା ୫୭ ନଂ. ଜାତୀୟ ରାଜପଥ ଯାଇଛି। ରାଜପଥରେ ମଧ୍ୟରେ ଗାଈ ଓ କୁକୁରଙ୍କ ଉତ୍ପାଦ ଲାଗି ରହିଛି। ଗୋରୁ ମାଲିକମାନେ କ୍ଷୀର ଦୁହିଁ ଗାଈକୁ ଛାଡି ଦେଉଛନ୍ତି। ନୟାଗଡ଼ ମ୍ୟୁନିସିପାଲିଟି ପକ୍ଷରୁ ବାରମ୍ବାର ତାଗିଦ୍ ପରେ ସୁଫଳ ମିଳି ନ ଥିଲା। ଶେଷର ନୟାଗଡ଼ ମ୍ୟୁନିସିପାଲିଟି କଠୋର ହୋଇଛି। ନୟାଗଡ ମ୍ୟୁନିସିପାଲିଟି ପକ୍ଷରୁ ପ୍ରଚାର ପରେ ବି ଶୁକ୍ରବାର ଗୋରୁ ୫୭ ନଂ. ଜାତୀୟ ରାଜପଥ, ନୟାଗଡ଼ ସହରର ବିଭିନ୍ନ ରାସ୍ତାରେ ବୁଲୁଥିବା ଦେଖିବାକୁ ମିଳିଥିଲା। ନୟାଗଡ଼ ମ୍ୟୁନିସିପାଲିଟିର ପ୍ରଚାର ଗୋରୁ ମାଲିକଙ୍କ ଉପରେ କିଛି ପ୍ରଭାବ ପକାଇନି। ମ୍ୟୁନିସିପାଲିଟି ଗାଈଙ୍କୁ ଉଦ୍ଧାର କରି ଗୋଶାଳା ପଠାଇବା ଓ ଫାଇନ ଲାଗୁ କରିବା ପରେ ସ୍ଥିତି ଜଣାପଡିବ। ଏ ନେଇ ନୟାଗଡ଼ ମ୍ୟୁନିସିପାଲିଟି ଚେୟାରମ୍ୟାନ ନିରୁପମା ଖଟେଇ କହିଛନ୍ତି, ବିପର୍ଯ୍ୟସ୍ତ ଟ୍ରାଫିକ୍ ସେବାକୁ ସୁଧାରିବାକୁ ଯାଇ ଗୋରୁଙ୍କ ଉପରେ ଊଗାମ ଲଗାଇବାକୁ ନିଷ୍ପତ୍ତି ହୋଇଛି। ରାସ୍ତାରୁ ଗୋରୁ ହଟିଲେ ଟ୍ରାଫିକ ବିଶୃଙ୍ଖଳା ଦୂର ହେବ ବୋଲି ଆଶା କରାଯାଉଛି। ଗୋ ମାଲିକଙ୍କୁ ଏ ନେଇ ସଚେତନତା କରାଯାଉଛି। ପରେ କଟକଣାକୁ ଲାଗୁ କରାଯିବ ବୋଲି କହିଛନ୍ତି। ସହର ବାସିନ୍ଦା ଧ୍ରୁବ ସାହୁ କୁହନ୍ତି, ନୟାଗଡ ମ୍ୟୁନିସିପାଲିଟି ପକ୍ଷରୁ ବିଭିନ୍ନ ନିଷ୍ପତ୍ତି ନିଆଯାଉଛି। ତେବେ ଏହାକୁ ଠିକ୍ ଭାବେ କାର୍ଯ୍ୟକାରୀ ହେଉନି। ରାସ୍ତାରେ ଗୋରୁ ଉପରେ କଟକଣା ଲାଗିବା ଦରକାର। ଏହାକୁ ସମସ୍ତେ ସ୍ବାଗତ କରୁଛନ୍ତି। ତେବେ ଆନ୍ତରିକତାର ସହ ଏ ନେଇ କାର୍ଯ୍ୟ ନ କଲେ କଟକଣା ବାଟବଣା ହୋଇଯିବ। କାରଣ ବିଭିନ୍ନ ସମୟରେ ଏହାକୁ ଲାଗୁ କରାଯାଇଛି। ଚାପରେ ଚେପା ହୋଇ ପୁଣି ନିୟମ ବାଟବଣା ହୋଇଯାଇଛି ବୋଲି ସେ କହିଛନ୍ତି।