ଓ୍ବାଶିଂଟନ,୮ା୮: ସମଗ୍ର ବିଶ୍ୱରେ କରୋନା ଭାଇରସ୍ ଆତଙ୍କ ଖେଳାଇ ଚାଲିଥିବା ବେଳେ ଏହାର ସଫଳ ଟିକା ଏ ପର୍ଯ୍ୟନ୍ତ ବାହାରି ନାହିଁ। ତେଣୁ ବିଭିନ୍ନ ଦେଶରେ ଏହାକୁ ରୋକିବା ପାଇଁ ଭିନ୍ନ ଭିନ୍ନ ପଦକ୍ଷେପ ନିଆଯାଉଛି। ସେହିପରି ଆମେରିକାର କାଲିଫର୍ନିଆ ଏକ ଅଜବ ନିଷ୍ପତ୍ତି ନେଇଛି। ଯିଏ କରୋନା ଭାଇରସ୍ରେ ସଂକ୍ରମିତ ହେବ ସେହି ଅକ୍ରାନ୍ତଙ୍କୁ ପ୍ରାୟ ୯୪ ହଜାର ଟଙ୍କା ଦିଆଯିବ।
କାଲିଫର୍ନିଆର ଆଲମେଡାର ସୁପରଭାଇଜର ବୋର୍ଡ କହିଛି, ସଂକ୍ରମିତ ହେବା ପରେ ଅନେକ ଲୋକ ଦୁଇ ସପ୍ତାହ ପର୍ଯ୍ୟନ୍ତ କ୍ୱାରାଣ୍ଟାଇନ୍ରେ ରହିପାରିବେ ନାହିଁ। ଏହି କାରଣରୁ ସେମାନଙ୍କୁ ସାହାଯ୍ୟ କରିବା ପାଇଁ ଏପରି ନିଷ୍ପତ୍ତି ନିଆଯାଇଛି। ଏତଦ୍ବ୍ୟତୀତ ଲୋକଙ୍କୁ ଖାଦ୍ୟ ଖର୍ଚ୍ଚ, ଘରଭଡ଼ା ଏବଂ ଫୋନ୍ ବିଲ ପୈଠ କରିବା ପାଇଁ ଏହି ଟଙ୍କା ଦିଆଯିବ।
ରିପୋର୍ଟ ଅନୁଯାୟୀ, ଏହି କାର୍ଯ୍ୟକ୍ରମ ଅଧୀନରେ କରୋନାକୁ ନିଶ୍ଚିତ କରିବା ପାଇଁ ବୋର୍ଡର ସର୍ବସମ୍ମତି କ୍ରମେ ୯୪ ହଜାର ଟଙ୍କା ଦେବାକୁ ନିଷ୍ପତ୍ତି ନିଆଯାଇଛି। ବୋର୍ଡ କହିଛି, ଯଦି ଲୋକମାନେ ପରୀକ୍ଷା କରାଇବାକୁ ଡରୁଛନ୍ତି କିମ୍ବା ଆଇସୋଲେଶନରେ ରହିବାକୁ ଇଚ୍ଛା ପ୍ରକାଶ କରୁନାହାନ୍ତି ତେବେ ଭୂତାଣୁ ରୋକିବା ଯୋଜନା ସଫଳ ହେବ ନାହିଁ। ତେଣୁ ୯୪ ହଜାର ଟଙ୍କା ସହାୟତା ଦେଲେ ଆକ୍ରାନ୍ତ ବ୍ୟକ୍ତି କୌଣସି କ୍ଲିନିକ୍ରେ ପରୀକ୍ଷା କରାଇ ପାରିବେ।
ବୋର୍ଡର ଏହି ନିଷ୍ପତ୍ତି ପରେ ସଂକ୍ରମିତ ବ୍ୟକ୍ତି ନିଜକୁ ଅଲଗା ରଖିବା ପାଇଁ ଉତ୍ସାହିତ ହେବେ। ଆଉ ଏହି କାରଣରୁ ଅଧିକ ପରୀକ୍ଷା ପାଇଁ ଆଗେଇ ଆସିବେ।