ଭୁବନେଶ୍ୱର,୭ା୨(ବ୍ୟୁରୋ):ଚାଷୀ ବିକ୍ରି ଧାନର ଟଙ୍କା ପାଇପାରୁନାହାନ୍ତି। ମାସେ ବିତିଗଲେ ମଧ୍ୟ ଚାଷୀଙ୍କ ଆକାଉଣ୍ଟକୁ ଟଙ୍କା ପହଞ୍ଚୁନାହିଁ। ଏହାର ପ୍ରତିବାଦରେ ଭାଜପା କୃଷକ ମୋର୍ଚ୍ଚାର ଏକ ୧୦ ଜଣିଆ ପ୍ରତିନିଧି ମଣ୍ଡଳୀ ରାଜ୍ୟ ଯୋଗାଣ ନିଗମ ପରିଚାଳନା ନିର୍ଦ୍ଦେଶକ(ଏମ୍ଡି)ଙ୍କୁ ଭେଟି ଦାବିପତ୍ର ଦେଇଛନ୍ତି। ଆଗାମୀ ୪୮ ଘଣ୍ଟା ମଧ୍ୟରେ ଚାଷୀଙ୍କ ବକେୟା ଥିବା ଧାନ ବିକ୍ରି ବାବଦ ପ୍ରାପ୍ୟ ପ୍ରଦାନ କରା ନ ଗଲେ ରାଜ୍ୟବ୍ୟାପୀ ଆନ୍ଦୋଳନ କରାଯିବ ବୋଲି ପ୍ରତିନିଧି ମଣ୍ଡଳୀ ଚେତାବନୀ ଦେଇଛି।
ଧାନ ବିକ୍ରି ପ୍ରାପ୍ୟ ଚାଷୀ ପାଇପାରୁ ନ ଥିବା ବେଳେ ବିଭାଗୀୟ ଏମ୍ଡି ଦୀର୍ଘଦିନ ଧରି କେଉଁଆଡ଼େ ଯାଇଛନ୍ତି ତାହା ତାଙ୍କ ଅଧିକାରୀମାନଙ୍କ ପାଖରେ ଖବର ନାହିଁି। ଏହାର ପ୍ରତିବାଦରେ କୃଷକ ମୋର୍ଚ୍ଚାର ପ୍ରତିନିଧି ମଣ୍ଡଳୀ ଏମ୍ଡିଙ୍କ କାର୍ଯ୍ୟାଳୟ କବାଟ ଏବଂ ମୁଖ୍ୟ ଫାଟକରେ ଲଟ୍କା ଜାରି କରି ଏମ୍ଡି ନିଖୋଜ ଥିବାର ଫଟୋ ଲଗାଇଛନ୍ତି। କୃଷକ ମୋର୍ଚ୍ଚା ଅଭିଯୋଗ କରିଛି ଯେ, ମିଲରଙ୍କ ମନମାନିରେ ମଣ୍ଡି ଚାଲିଛି। ଯୋଗାଣ ବିଭାଗ ତତ୍ତ୍ୱାବଧାନରେ ଚାଲିଥିବା ମଣ୍ଡି ବ୍ୟବସ୍ଥା ମିଲରଙ୍କ କବ୍ଜାରେ ରହିଛି। କେନ୍ଦ୍ର ସରକାର କୁଇଣ୍ଟାଲ ପିଛା ୨୦୪୦ ଟଙ୍କା ଧାନର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି)ସ୍ଥିର କରି ରାଜ୍ୟ ସରକାରଙ୍କ ମାଧ୍ୟମରେ କିଣିବା ବ୍ୟବସ୍ଥା କରୁଥିଲେ ମଧ୍ୟ କଟ୍ନୀ ଛଟ୍ନୀରେ ଚାଷୀ ଫସିଯାଇଛି। ଚାଷୀଙ୍କ ଧାନ ଠିକ୍ ସମୟରେ ବିକ୍ରି ହୋଇପାରୁନାହିଁ। ଟୋକନ୍ ରଦ୍ଦ ହେଉଛି। ରାଜ୍ୟ ସରକାର ଚାଷୀଙ୍କ ଧାନ ବିକ୍ରି ପ୍ରାପ୍ୟ ପୈଠ କରିବାରେ ଘୋର ଅବହେଳା କରିଛନ୍ତି। ଅନ୍ଲାଇନ ବ୍ୟବସ୍ଥାରେ ଧାନ ବିକ୍ରିର ୨୪ ଘଣ୍ଟା ଭିତରେ ଚାଷୀଙ୍କ ଆକାଉଣ୍ଟକୁ ଟଙ୍କା ଯିବା ବ୍ୟବସ୍ଥା ଥିବା ବେଳେ ୧ ମାସ ପରେ ମଧ୍ୟ ପହଞ୍ଚୁନାହିଁ। ମଣ୍ଡି ଅଧିକାରୀ ଏବଂ ଜିଲାସ୍ତରରେ ଯୋଗାଣ ଅଧିକାରୀ ଟଙ୍କା ଆସିଲେ ଦିଆଯିବ ବୋଲି କହିବା ଅତ୍ୟନ୍ତ ହାସ୍ୟାସ୍ପଦ ଓ କଷ୍ଟଦାୟକ ବୋଲି ମୋର୍ଚ୍ଚା ପକ୍ଷରୁ କୁହାଯାଇଛି। ପ୍ରତିନିଧି ମଣ୍ଡଳୀରେ କୃଷକ ମୋର୍ଚ୍ଚାର ରାଜ୍ୟ ଉପସଭାପତି ହୃଷୀକେଶ ଜେନା ଓ ଶ୍ରୀରଞ୍ଜନ ମଙ୍ଗରାଜ, ଜାତୀୟ କାର୍ଯ୍ୟକାରିଣୀ ସଦସ୍ୟ ଦିଲୀପ ସ୍ବାଇଁ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ରଶ୍ମିରଞ୍ଜନ କାନୁନ୍ଗୋ ପ୍ରମୁଖ ଉପସ୍ଥିତ ଥିଲେ।