ଭୁବନେଶ୍ୱର,୯ା୭(ବ୍ୟୁରୋ): ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ)ଠାରୁ ଦୀର୍ଘବର୍ଷ ହେଲା ଜାଗା ନେଇ ଘର କରି ନ ଥିବା
ବ୍ୟକ୍ତିଙ୍କ ପ୍ଲଟ୍ ରଦ୍ଦ ହେବ। ଏ ନେଇ ପ୍ଲଟ୍ ନେଇଥିବା ବ୍ୟକ୍ତିଙ୍କୁ ସତର୍କ କରାଇଛି ବିଡିଏ। ଆସନ୍ତା ମାର୍ଚ୍ଚ ୩୧ ସୁଦ୍ଧା ଅନୁମୋଦିତ ପ୍ଲଟ୍ରେ ଘର ନିର୍ମାଣ ନ ହେଲେ ସମ୍ପୃକ୍ତ ପ୍ଲଟ୍ର ଅନୁମୋଦନ ରଦ୍ଦ କରାଯିବ। ଏପରିକି ସମ୍ପୃକ୍ତ ପ୍ଲଟ୍କୁ ନୋ-ଅବଜେକ୍ସନ ସାର୍ଟିଫିକେଟ ପ୍ରଦାନ କରାଯିବ ନାହିଁ ବୋଲି ବିଡିଏ ଚେତାବନୀ ଦେଇଛି।
ବିଡିଏଠାରୁ ପ୍ଲଟ ନେଇ ନିର୍ମାଣ କାର୍ଯ୍ୟ କରି ନ ଥିବା ବ୍ୟକ୍ତିଙ୍କୁ ୨୦୦୯ରୁ ବାରମ୍ବାର ଅବଗତି କରାଯାଉଛି। ଏ ନେଇ ୨୦୦୯, ୨୦୧୫, ୨୦୧୭, ୨୦୧୮ ଏବଂ ୨୦୨୦ରେ ଗଣମାଧ୍ୟମରେ ବିଜ୍ଞପ୍ତି ପ୍ରକାଶିତ ହୋଇଛି। ହେଲେ ଜମିକୁ ଆକାଶ ଛୁଅଁା ଦରରେ ବିକ୍ରି କରିବାକୁ ଯୋଜନା କରି ପ୍ଲଟ ମାଲିକମାନେ କୌଣସି ନିର୍ମାଣ କରୁନାହାନ୍ତି, ଯାହା ବିଡିଏର ଲ୍ୟାଣ୍ଡ୍ ଆଲଟମେଣ୍ଟ ସ୍କିମ୍ର ଖୋଲାଖୋଲି ଉଲ୍ଲଂଘନ କରୁଛି। ଏହି କାର୍ଯ୍ୟରେ ବିଡିଏର କେତେଜଣ ଅସାଧୁ ଅଧିକାରୀଙ୍କରସମ୍ପୃକ୍ତି ରହିଥିବା ଅଭିଯୋଗ ହେଉଛି। ଜମି ନେଇଥିବା ଅନେକ ବ୍ୟକ୍ତି ବିଦେଶରେ ରହୁଛନ୍ତି। କରୋନା ମହାମାରୀ ଯୋଗୁ ସମସ୍ତଙ୍କୁ ଅଧିକ ବର୍ଷେ ସମୟ ଦିଆଯାଇଛି। ପ୍ଲଟ୍ ନେଇଥିବା ବ୍ୟକ୍ତିଙ୍କୁ ଶେଷ ଥର ପାଇଁ ସୁଯୋଗ ଦିଆଯାଇଛି। ସମୟ ସୀମା ମଧ୍ୟରେ ଖାଲି ଜମିରେ ଘର ନିର୍ମାଣ ନ କଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏପରି କି ଜମି ଅନୁମୋଦନକୁ ରଦ୍ଦ କରାଯିବ ବୋଲି ବିଡିଏ ସେକ୍ରେଟାରି କବୀନ୍ଦ୍ର କୁମାର ସାହୁ କହିଛନ୍ତି।
