ନୂଆଦିଲ୍ଲୀ,୧୧।୯: ଏସିଆ କପ୍ର ସୁପର-୪ ରାଉଣ୍ଡରେ ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ ଆରମ୍ଭ ହୋଇଥିଲା। କଲମ୍ବୋସ୍ଥିତ ଆର ପ୍ରେମାଦାସା ଷ୍ଟାଡିୟମରେ ବର୍ଷା ହେତୁ ମ୍ୟାଚ ଶେଷ ହୋଇପାରି ନାହିଁ ଏବଂ ବର୍ତ୍ତମାନ ମ୍ୟାଚ ଆଜି ରିଜର୍ଭ ଡେ’ରେ ଖେଳାଯିବ। ରିଜର୍ଭ ଡେ’ରେ ବି ବର୍ଷା ସମ୍ଭାବନା ରହିଛି। ପାକିସ୍ତାନ ଅଧିନାୟକ ବାବର ଆଜାମ ଟସ ଜିତି ବୋଲିଂ କରିବାକୁ ନିଷ୍ପତ୍ତି ନେଇଛନ୍ତି। ରବିବାର ଖେଳ ବନ୍ଦ ହେବା ସମୟରେ ଭାରତୀୟ ଦଳ ୨୪.୧ ଓଭରରେ ଦୁଇଟି ଉଇକେଟ୍ ହରାଇ ୧୪୭ ରନ ସଂଗ୍ରହ କରିଥିଲା। ଏହି ସ୍କୋରଠାର ଭାରତ ଖେଳିବା ଆରମ୍ଭ କରିବ। ଯଦି ରିଜର୍ଭ ଦିନରେ ମ୍ୟାଚ ସମାପ୍ତ ନ ହୁଏ ତେବେ କ’ଣ ହେବ?
ଯଦି ରିଜର୍ଭ ଦିନରେ ମଧ୍ୟ ମ୍ୟାଚ ସମାପ୍ତ ନ ହୁଏ ତେବେ ମ୍ୟାଚ ବାତିଲ ହେବ ବୋଲି ଘୋଷଣା କରାଯିବ। ଏଭଳି ପରିସ୍ଥିତିରେ ଉଭୟ ଦଳକୁ ପଏଣ୍ଟ ବାଣ୍ଟିବାକୁ ପଡ଼ିବ। ଏହାପୂର୍ବରୁ ସେପ୍ଟେମ୍ବର ୨ରେ ଗ୍ରୁପ ରାଉଣ୍ଡରେ ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ ଅନୁଷ୍ଠିତ ହୋଇଥିଲା। ସେତେବେଳେ ବର୍ଷା ବ୍ୟାଘାତ ସୃଷ୍ଟି କରିଥିଲା। ଉଭୟ ଦଳକୁ ପଏଣ୍ଟ ବାଣ୍ଟିବାକୁ ପଡିଥିଲା। ଯଦି ମ୍ୟାଚ ବାତିଲ ହୁଏ ତେବେ ଭାରତର ଆକାଉଣ୍ଟରେ ଗୋଟିଏ ପଏଣ୍ଟ ଯୋଡାଯିବ। ଏଥି ସହିତ ପାକିସ୍ତାନ ଦୁଇଟି ମ୍ୟାଚରେ ତିନୋଟି ପଏଣ୍ଟ ପାଇବ।
ସୁପର- ୪ର ପଏଣ୍ଟ ଟେବୁଲରେ ପାକିସ୍ତାନ ପ୍ରଥମ ସ୍ଥାନରେ ରହିଛି। ଗୋଟିଏ ମ୍ୟାଚ୍ରେ ଦଳର ଦୁଇଟି ପଏଣ୍ଟ ରହିଛି। ପାକିସ୍ତାନର ନେଟ ରନ୍ ରେଟ୍ ହେଉଛି +୧.୦୫୧। ଶ୍ରୀଲଙ୍କା ଦଳ ଦ୍ୱିତୀୟ ସ୍ଥାନରେ ରହିଛି। ଗୋଟିଏ ମ୍ୟାଚରେ ଏହାର ଦୁଇଟି ପଏଣ୍ଟ ମଧ୍ୟ ରହିଛି, କିନ୍ତୁ ନେଟ ରନ ହାରରେ ପାକିସ୍ତାନ ପଛରେ ରହିଛି। ଶ୍ରୀଲଙ୍କାର ନେଟ ରନ୍ ରେଟ୍ ହେଉଛି +୦.୪୨୦। ଭାରତ ତୃତୀୟ ସ୍ଥାନରେ ରହିଛି। ଭାରତ ଏପର୍ଯ୍ୟନ୍ତ ପ୍ରଥମ ମ୍ୟାଚ ଖେଳି ନାହିଁ। ପଏଣ୍ଟ ଟେବୁଲର ସର୍ବନିମ୍ନ ସ୍ଥାନରେ ବାଂଲାଦେଶ ଦଳ ରହିଛି। ଦୁଇଟି ମ୍ୟାଚ୍ରେ ହାରି ଦଳ ଶୂନ ପଏଣ୍ଟ ପାଇଛି। ବାଂଲାଦେଶର ରନ୍ ରେଟ୍ ହେଉଛି -୦.୭୪୯।