କେନ୍ଦୁଝର,୩।୧: (ନରେଶ ଚନ୍ଦ୍ର ପଟ୍ଟନାୟକ/ଦୀପକ ମିଶ୍ର): ସାଧାରଣ ନିର୍ବାଚନ ପାଖେଇ ଆସୁଥିବାରୁ ଉଭୟ କେନ୍ଦ୍ର ଓ ରାଜ୍ୟ ସରକାର ଗଁା ଗଣ୍ଡାର ଉନ୍ନତି କରିଥିବା କଥା ବଡ଼ ବଡ଼ ପୋଷ୍ଟର ବ୍ୟାନର ମାରି ପ୍ରଚାର ପ୍ରସାର କରିଚାଲିଛନ୍ତି। କିନ୍ତୁ ଦୁର୍ଭାଗ୍ୟର ବିଷୟ ସ୍ବାଧୀନତାର ୭୫ ବର୍ଷ ବିତି ଯାଇଥିଲେ ମଧ୍ୟ ଆଜି ବି କେତେକ ଗଁାର ଉନ୍ନତି ହୋଇ ପାରିନାହିଁ। ଏହା ଦେଖିବାକୁ ମିଳିଛି କେନ୍ଦୁଝର ସଦର ବ୍ଲକ ଅନ୍ତର୍ଗତ ନୂଆଗାଁ ପଞ୍ଚାୟତ ବିସ୍ତାପାଳ ମଶାଣିପଦା ସାହିରେ। ଏହି ଗଁାକୁ ଭଲ ରାସ୍ତା ନ ଥିବାରୁ ଲୋକେ ବହୁ ଅସୁବିଧାର ସମ୍ମୁଖିନ ହେଉଛନ୍ତି। ଏଥିରେ ଅସନ୍ତୋଷ ପ୍ରକାଶ କରି ଆସନ୍ତା ନିର୍ବାଚନ ପୂର୍ବରୁ ରାସ୍ତା ନିର୍ମାଣ କରା ନ ଗଲେ ସାହି ବାସିନ୍ଦା ଭୋଟ ବର୍ଜନ କରିବେ ବୋଲି ଚେତାବନୀ ଦେଇଛନ୍ତି।
ଅନୁଯାୟୀ, ମଶାଣିପଦା ସାହିରେ ପ୍ରାୟ ୭୦ ପରିବାରର ୨୦୦ ଲୋକ ବସବାସ କରନ୍ତି। ବିସ୍ତାପାଳ ଶିବ ମନ୍ଦିରଠାରୁ ଉକ୍ତ ସାହିକୁ ଅରଡେଇ ଓ ମାଛ କାନ୍ଦଣା ନଦୀ କୂଳେ କୂଳେ ପାଖାପାଖି ୧ କି.ମି.ରାସ୍ତା ଦେଇ ଯିବାକୁ ପଡ଼ିଥାଏ। ଏହି ସାହିରେ ଆଦିବାସୀ ମୁଣ୍ଡା ସମ୍ପ୍ରଦାୟର ଲୋକେ ବସବାସ କରିଆସୁଥିବାବେଳେ କିଛି ଗଣ୍ଡ ଓ ଗଉଡ଼ ସମ୍ପ୍ରଦାୟର ଲୋକେ ରହୁଛନ୍ତି। ତେବେ ଉକ୍ତ ୧ କି.ମି. ରାସ୍ତା ଖାଲଖମାରେ ପରିପୂର୍ଣ୍ଣ ହୋଇଯାଇଥିବା ବେଳେ ଏବେ ମରଣଜନ୍ତା ପାଲଟିଛି। ବର୍ଷା ଦିନରେ ଜୀବନକୁ ବାଜି ଲଗାଇ ଲୋକେ ନାଳ ପାର ହୋଇ ୯ କି.ମି. ରାସ୍ତା ବୁଲି ପଞ୍ଚାୟତକୁ ଚାଉଳ ଓ ଭତ୍ତା ପାଇଁ ଯାଇଥାନ୍ତି। କେନ୍ଦୁଝର ଡିଆର୍ଡିଏ ତରଫରୁ ୨୦୧୯-୨୦ ଆର୍ଥିକ ବର୍ଷରେ ମସିଣାବିଲା ନାଳରେ ପୋଲ ନିର୍ମାଣ ପାଇଁ ୨ ଲକ୍ଷ ଟଙ୍କାର କାର୍ଯ୍ୟାଦେଶ ମିଳିଥିଲା। ଠିକାଦାର କାର୍ଯ୍ୟ ଆରମ୍ଭ କରିଥିବାବେଳେ ୨୦୨୦-୨୧ରେ ୮୨୫.୬୨୫.୦୦ ଟଙ୍କା ଅର୍ଥ ବରାଦ ହୋଇ କାର୍ଯ୍ୟ ହୋଇଥିଲା। ପୁନର୍ବାର ର୍ ୨୦୨୧-୨୨ରେ ୩ ଲକ୍ଷ ୪୦ ହଜାର ଟଙ୍କାର ଅର୍ଥ ମଞ୍ଜୁର ହୋଇ କାର୍ଯ୍ୟ ହୋଇଛି, କିନ୍ତୁ ଅଦ୍ୟାବଧି ପୋଲ କାର୍ଯ୍ୟ ସମ୍ପୂର୍ଣ୍ଣ ହୋଇନାହିଁ । ଯୁବ ଓ ଶ୍ରମ ବିକାଶ ମଞ୍ଚ କେନ୍ଦୁଝରଗଡ଼ ସଭାପତି ରଞ୍ଜନ କୁମାର ବେହେରା ଓ ଉପସଭାପତି ଜୟକୃଷ୍ଣ ନାଏକ ଉକ୍ତ ସାହିକୁ ଯାଇ ରାସ୍ତା ଓ ପୋଲ ଦେଖି ବର୍ଷା ଦିନ ପୂର୍ବରୁ ପୋଲ ଓ ରାସ୍ତା ସାରିବା ଏବଂ ପୋଲ କାର୍ଯ୍ୟ କରିଥିବା ଠିକାଦାରଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଜିଲାପାଳଙ୍କୁ ଅବଗତ କରିଛନ୍ତି। ସରକାର ତୁରନ୍ତ ରାସ୍ତା ଓ ପୋଲ କାମ ନ କଲେ ଆଗାମୀ ସାଧାରଣ ନିର୍ବାଚନରେ ଭୋଟ ବର୍ଜନ କରାଯିବ ବୋଲି ସାହିର ବିରଞ୍ଚି ମୁଣ୍ଡା, ବାବୁଲାଲ ଜାମୁଦା, ମଙ୍ଗଳ ଜାମୁଦା, ବିଜୟ କୁମାର ଜାମୁଦା, ଟୁରା ମୁଣ୍ଡା, ଲିପ୍ସା ମୁଣ୍ଡା, ସୁକୁଲାଲ ମୁଣ୍ଡା, ଚାନ୍ଦମଣି ମୁଣ୍ଡା, ରାଇ ମୋନି ସଏ,ଗୌର ସଏ କହିଛନ୍ତି।