ଖୋର୍ଦ୍ଧା ଅଫିସ,୩୧ା୧: ରାଜ୍ୟ ସରକାର ଗ୍ରାମାଞ୍ଚଳର ଭିତ୍ତିଭୂମି ବିକାଶ ଉପରେ ଗୁରୁତ୍ୱ ଦେଉଛନ୍ତି। ପ୍ରତ୍ୟେକ ଗ୍ରାମକୁ ପାଇପ୍ ମାଧ୍ୟମରେ ବିଶୁଦ୍ଧ ପାନୀୟଜଳ ଯୋଗାଇ ଦେବାକୁ ପଦକ୍ଷେପ ନେଉଛନ୍ତି। ସବୁ ଗ୍ରାମର ଲୋକଙ୍କୁ ପାନୀୟଜଳ ସୁବିଧା ମିଳିବ ବୋଲି ଘୋଷଣା କରିଛନ୍ତି। ତେବେ ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ବାଙ୍କେଇ ପଞ୍ଚାୟତର ଗର୍ଭଣୀପଡ଼ା ଗ୍ରାମବାସୀଙ୍କ ପାଇଁ ଏହା ଉପହାସ ପାଲଟିଛି। ଏହି ଗ୍ରାମର ଲୋକେ ପିଇବା ପାଣି ପାଇଁ ହଇରାଣ ହେଉଛନ୍ତି। ଗାଁରେ ଥିବା ଏକମାତ୍ର ନଳକୂପ ଦୀର୍ଘଦିନ ହେଲା ଅଚଳ ହୋଇପଡ଼ିଛି। ବାରମ୍ବାର ଅଭିଯୋଗ ସତ୍ତ୍ୱେ କେହି ଗୁହାରି ଶୁଣୁନାହାନ୍ତି। ପାଣି ସମସ୍ୟା ଦୂର ନ ହେଲେ ଚଳିତ ପଞ୍ଚାୟତ ନିର୍ବାଚନ ବର୍ଜନ କରିବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
ଗ୍ରାମରେ ୬୦ପରିବାର ରହୁଛନ୍ତି। ଗ୍ରାମରେ ଗୋଟିଏ ନଳକୂପ ରହିଛି। ତେବେ ତାହା ଦୀର୍ଘଦିନ ହେଲା ଅଚଳ ହୋଇପଡ଼ିଛି। ଫଳରେ ଗ୍ରାମବାସୀ ୨ କିମି ଦୂର ଏକ ପୋଖରୀ ଉପରେ ନିର୍ଭର କରୁଛନ୍ତି। ରାତି ପାହିଲେ ମହିଳାମାନେ ଗରା ମାଠିଆ ଧରି ସେଠାକୁ ଧାଉଁଛନ୍ତି। ଦୀର୍ଘଦିନ ଧରି ଏଭଳି ସମସ୍ୟା ଲାଗି ରହିଥିଲେ ବି ପ୍ରଶାସନ କିମ୍ବା ଲୋକପ୍ରତିନିଧି କେହି ବୁଝୁନାହାନ୍ତି। କେବଳ ନିର୍ବାଚନ ଆସିଲେ ନେତାମାନେ ସମସ୍ୟା ଦୂର ଲାଗି ପ୍ରତିଶ୍ରୁତି ଦିଅନ୍ତି, ମାତ୍ର ନିର୍ବାଚନ ସରିଗଲେ ପ୍ରତିଶ୍ରୁତି ଭୁଲିଯାଆନ୍ତି। ୨୦୧୭ ନିର୍ବାଚନରେ ମଧ୍ୟ ପାଣି ସମସ୍ୟା ଦୂର ଲାଗି ପ୍ରତିଶ୍ରୁତି ମିଳିଥିଲା, ମାତ୍ର ନିର୍ବାଚନ ଶେଷ ପରେ ଆଉ କାହାର ଦେଖା ମିଳିଲା ନାହିଁ ବୋଲି ଗ୍ରାମର ବରିଷ୍ଠ ନାଗରିକ ସୁରଥ ପାଇକରାୟ କହିଛନ୍ତି। ଅଚଳ ନଳକୂପ ମରାମତି ପାଇଁ ପ୍ରଶାସନକୁ ବାରମ୍ବାର ଅଭିଯୋଗ କରି ନିରାଶ ହୋଇଛୁ ବୋଲି ବରିଷ୍ଠ ନାଗରିକ ମାଣିଆ ମାର୍ଥା କହିଛନ୍ତି। ତେଣୁ ଚଳିତ ବର୍ଷ ଗ୍ରାମରେ ପାଣି ସମସ୍ୟା ଦୂର କରା ଗଲେ ଭୋଟ ଦେବୁନାହିଁ ବୋଲି ନିଷ୍ପତ୍ତି ନିଆଯାଇଥିବା ସୁରଥ ଓ ମାଣିଆଙ୍କ ସମେତ ବହୁ ଗ୍ରାମବାସୀ କହିଛନ୍ତି। ପାଣି ଏହି ଗ୍ରାମର ଏକ ମୁଖ୍ୟ ସମସ୍ୟା। ଖରାଦିନ ଆସିଲେ ଅବସ୍ଥା ସଙ୍ଗିନ ହୋଇପଡ଼େ। ଗ୍ରାମର ଅଶାନ୍ତି ଜେନା ଓ ରଶ୍ମିତା ମାର୍ଥା କହିଛନ୍ତି, ନଳକୂପ ମରାମତି କରିବାକୁ କେହି ଆସୁନାହାନ୍ତି। ନଳକୂପ ଉପରେ ଗଛଲତା ମାଡ଼ିିଗଲାଣି। ତେଣୁ ବାଧ୍ୟ ହୋଇ ପୋଖରୀରୁ ପାଣି ଆଣି କାମ ଚଳାଉଛୁ। ଏହି ପାଣି ଦୂଷିିତ ଯୋଗୁ ଅନେକ ସମୟରେ ପିଲା, ବୃଦ୍ଧାବୃଦ୍ଧ ଚର୍ମରୋଗ, ଜ୍ୱର ପ୍ରଭୃତି ରୋଗରେ ଆକ୍ରାନ୍ତ ହେଉଛନ୍ତି। ଆଗକୁ ଖରାଦିନ ଆସୁଛି। ତେଣୁ ପୁଣି ଡହଳବିକଳ ହେବାକୁ ପଡ଼ିବ ବୋଲି ସେ ପ୍ରକାଶ କରିଛନ୍ତି। ତେବେ ଏ ସମ୍ପର୍କରେ ବୋଲଗଡ଼ ବିଡିଓ ଧୋବେଇ ନାୟକଙ୍କ ପ୍ରତିକ୍ରିୟା ମିଳିପାରିନାହିଁ।