ବେଜିଂ,୪।୧୨: ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ଜିରୋ-କୋଭିଡ୍ ନୀତିକୁ ବିରୋଧକରି ସପ୍ତାହେ ହେଲା ଦେଶରେ ବିକ୍ଷୋଭ ଜାରି ରହିଛି। ୧୯୮୯ ଟିଆନାନ୍ମେନ୍ ସ୍କୋୟାର ବିକ୍ଷୋଭ ପରେ ଗତ ୩୩ ବର୍ଷ ମଧ୍ୟରେ ଚାଇନାରେ ଏଭଳି ବିକ୍ଷୋଭ କେବେ ଦେଖାଯାଇ ନ ଥିଲା। ସାରା ବିଶ୍ୱରେ କୋଭିଡ୍ କଟକଣା ଉଠାଇ ଦିଆଯାଇଥିବାବେଳେ ଚାଇନାରେ ଜିରୋ-କୋଭିଡ୍ ନୀତିକୁ ନେଇ ଦେଶବାସୀ ଅତିଷ୍ଠ ହୋଇପଡ଼ିଲେଣି। ଯଦିଓ ଚାଇନାରେ ଦୈନିକ ସଂକ୍ରମଣ ଏବେ ସର୍ବାଧିକ ରହିଛି, ତଥାପି ଲକ୍ଡାଉନ୍ ଏବଂ ପରୀକ୍ଷା ସର୍ତ୍ତାବଳୀ କୋହଳ କରିବାକୁ ଦାବି ହେଉଛି।
ଅନ୍ୟପକ୍ଷରେ ଜୀବନ ବଞ୍ଚାଇବା ଏବଂ ହସ୍ପିଟାଲଗୁଡ଼ିକରେ ରୋଗୀ ସଂଖ୍ୟା କମାଇବାକୁ ହେଲେ କଠୋର କୋଭିଡ୍ କଟକଣା ମାନିବାକୁ ପଡ଼ିବ ବୋଲି ସରକାରଙ୍କ ପକ୍ଷରୁ କୁହାଯାଉଛି। ଏବେ ସରକାର କୋଭିଡ୍ ନୀତିରେ ସାମାନ୍ୟ କୋହଳ କରିଛନ୍ତି। ଏଥିରେ ଲୋକେ ଆଶ୍ୱସ୍ତ ହୋଇଥିଲେ ହେଁ ସ୍ବାସ୍ଥ୍ୟଜନିତ ପରିଣାମକୁ ନେଇ ଚିନ୍ତା ପ୍ରକଟ କରାଯାଇଛି। ଦେଶର ଅଧିକାଂଶ ଅଞ୍ଚଳରେ ଟିକାଦାନ ହାର୍ ଯଥେଷ୍ଟ କମ୍ ରହିଛି। ସଂକ୍ରମଣ ବିପଦ ଥିବା ଅଞ୍ଚଳରେ ଗୋଷ୍ଠୀ ରୋଗ ପ୍ରତିରୋଧ ଶକ୍ତିର ଅଭାବ ରହିଥିବାରୁ ବର୍ତ୍ତମାନ ସ୍ଥିତିରେ ଲକ୍ଡାଉନ୍ କଟକଣା ସମ୍ପୂର୍ଣ୍ଣ ଉଠାଇ ଦିଆଗଲେ ୨୦ ଲକ୍ଷରୁ ଅଧିକ ଲୋକଙ୍କ ଜୀବନ ଯାଇପାରେ ବୋଲି ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ ମୁଖ୍ୟ ଝୋଉ ଜିଆଟୋଙ୍ଗ୍ କହିଛନ୍ତି। ସାଙ୍ଗାଇ ଜର୍ନାଲ ଅଫ୍ ପ୍ରିଭେଣ୍ଟିଭ୍ ମେଡିସିନ୍ରେ ପ୍ରକାଶିତ ସନ୍ଦର୍ଭରେ ଏହା କୁହାଯାଇଛି। ସେହିପରି ସଂକ୍ରମଣ ୨୩.୩ କୋଟିକୁ ବୃଦ୍ଧି ପାଇପାରେ ବୋଲି ଏଥିରେ କୁହାଯାଇଛି।
ଚାଇନା ଯଦି ଟିକାକରଣ ଓ ଚିକିତ୍ସା ସୁବିଧା ନ ବଢ଼ାଇ କଠୋର କୋଭିଡ୍ ନୀତିକୁ ହଟାଇଦିଏ ତେବେ ୧୫ ଲକ୍ଷ ଲୋକଙ୍କ ମୃତ୍ୟୁ ଘଟିବ ବୋଲି ଗତ ମେ’ ମାସରେ ଚାଇନା ଓ ଆମେରିକାର ବୈଜ୍ଞାନିକମାନେ ଆକଳନ କରିଥିଲେ। ନେଚର ମେଡିସିନ୍ରେ ଏହି ଗବେଷଣା ପ୍ରକାଶ ପାଇଥିଲା। ତେବେ ଟିକାକରଣ ବଢ଼ାଇଲେ ମୃତ୍ୟୁସଂଖ୍ୟା ଯଥେଷ୍ଟ ହ୍ରାସ ପାଇପାରେ ବୋଲି ଏଥିରେ କୁହାଯାଇଥିଲା। ସେହିପରି ବ୍ରିଟିଶ ବିଜ୍ଞାନସମ୍ମତ ସୂଚନା ଓ ବିଶ୍ଳେଷଣ କମ୍ପାନୀ ଏୟାରଫିନିଟି କହିବା ଅନୁଯାୟୀ, ଯଦି ଜିରୋ-କୋଭିଡ୍ ନୀତି ହଟାଇ ଦିଆଯାଏ, ତେବେ ୧୩ରୁ ୨୧ ଲକ୍ଷ ଲୋକଙ୍କ ମୃତ୍ୟୁ ହୋଇପାରେ। ଫେବୃୟାରୀରେ ହଂକଂରେ ବ୍ୟାପିଥିବା ବିଏ.୧ ଭାରିଆଣ୍ଟ ସଂକ୍ରମଣ ତଥ୍ୟକୁ ଆଧାରକରି ଏହି ଆକଳନ କରାଯାଇଛି।