![](https://www.dharitri.com/wp-content/uploads/2024/07/65-3.jpg)
ପାରଳାଖେମୁଣ୍ଡି,୨୨ା୭(ଗିରିଧାରୀ ପରିଛା): ପାରଳାଖେମୁଣ୍ଡି ସ୍ଥିତ ଜିଲାପାଳଙ୍କ କାର୍ଯ୍ୟାଳୟ ନିକଟରେ ଗୁମ୍ମା ବ୍ଲକର ଶତାଧିକ ଲୋକ ପହଞ୍ଚି ଘର ଡିହ ପ୍ରଦାନରେ ବିଳମ୍ବ ଓ ବିଫଳତା ପ୍ରତିବାଦରେ ଧାରଣା ଦେଇଛନ୍ତି। ଏଥିସହ ଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଛନ୍ତି। ରାଜ୍ୟ ସରକାର ଜବରଦଖଲ ଉଚ୍ଛେଦ କରିବା ପାଇଁ ନିଷ୍ପତ୍ତି ନେଇଛନ୍ତି। ଏଭଳି ପଦକ୍ଷେପକୁ ସ୍ବାଗତ କରୁଛୁ ବୋଲି ଆନ୍ଦୋଳନକାରୀ କହିବା ସହ ଜବରଦଖଲ ଉଚ୍ଛେଦ ପରେ ହିତାଧିକାରୀମାନଙ୍କ ତଦନ୍ତ କରି ଯେଉଁମାନେ ଘର ଡିହ ପାଇବାକୁ ହକଦାର ସେମାନଙ୍କୁ ପ୍ରଦାନ କରାଯାଉ ବୋଲି ଦାବି କରିଛନ୍ତି।
ଘରଡିହ, ଲିଜ୍ ଦରଖାସ୍ତଗୁଡିକ ଦାଖଲ କରିଥିବା ହଜାର ହଜାର ଘରହୀନ, ଜିଲାରେ ଘଟିଥିବା ଅନେକ ଝଡ଼ତୋଫାନରେ ଘର ହରାଇ ଅସୁବିଧାରେ ସମ୍ମୁଖୀନ ହୋଇଆସୁଥିବା ଆଦିବାସୀ, ହରିଜନ ଓ ଅନ୍ୟାନ୍ୟ ସଂପ୍ରଦାୟର ଜନସାଧାରଣ ବାରମ୍ବାର ଜିଲାପାଳ, ଏଡିଏମ, ସବ୍କଲେକ୍ଟରଙ୍କ ଜରିଆରେ ଦାବିପତ୍ର ଦେଇଥିଲେ ମଧ୍ୟ ତହସିଲଦାର, ରାଜସ୍ବ ବିଭାଗର କର୍ମଚାରୀମାନେ କୌଣସି ପଦକ୍ଷେପ ଗ୍ରହଣ କର ୁନ ଥିବା ଦାବିପତ୍ରରେ ଉଲ୍ଲେଖ କରାଯାଇଛି। ଦାବି ପୂରଣ ନ ହେଲେ ଆନ୍ଦୋଳନ ତୀବ୍ରତର ହେବ ବୋଲି ବିକେଏମୟୁ ଓଡ଼ିଶା ରାଜ୍ୟ ସଭାପତି ଜେନା ସୁବାସଚନ୍ଦ୍ର ରାଓ, ଲିଙ୍ଗରାଜ ଦଳେଇ ଓ ସମସ୍ତ ଗ୍ରାମବାସୀ ଚେତାବନୀ ଦେଇଛନ୍ତି। ଆଗାମୀ ଦିନରେ ଯେଉଁଠି ସରକାରଙ୍କର ଖାଲି ଜାଗା ରହିଛି ତାକୁ ଦଖଲ କରିବୁ ବୋଲି ଚେତାବନୀ ଦେଇଛନ୍ତି।