ଭୋପାଳ,୧୮।୮: ମଧ୍ୟପ୍ରଦେଶରେ ଟ୍ରାଫିକ୍ ନିୟମ ଏବେ କଡ଼ାକଡ଼ି ହେବାକୁ ଯାଉଛି। ପରିବହନ ବିଭାଗ, ନାପଟୋଲ ଓ ଟ୍ରାଫିକ୍ ପୋଲିସ ମିଳିତ ଭାବେ ଏବେ ସ୍ବତନ୍ତ୍ର ଯାଞ୍ଚ ଅଭିଯାନ ସମୟରେ ହେଲମେଟ୍ର ଓଜନ ମଧ୍ୟ ଯାଞ୍ଚ କରିବେ। ଏଥିପାଇଁ ପ୍ରସ୍ତୁତି ମଧ୍ୟ ଆରମ୍ଭ ହୋଇଯାଇଛି। ଯଦି କୌଣସି ବ୍ୟକ୍ତି ୧ କିଲୋ ୨୦୦ଗ୍ରାମ୍ରୁ ଊର୍ଦ୍ଧ୍ୱ ଓଜନର ହେଲମେଟ୍ ପିନ୍ଧନ୍ତି ତେବେ ତାଙ୍କୁ ୧ ହଜାର ଟଙ୍କା ଜରିମାନା ଦେବାକୁ ପଡ଼ିବ। ନିକଟରେ ସଡ଼କ ପରିବହନ ଓ ରଜପଥ ମନ୍ତ୍ରଣାଳୟ ପକ୍ଷରୁ ଏକ ବିଜ୍ଞାପ୍ତି ଜାରି କରାଯାଇଛି। ଯାହା ଦ୍ୱାରା ଗୋଟିଏ ମାନର ହେଲମେଟ୍ ବ୍ରିକ୍ରି ହୋଇପାରିବ। ଏପର୍ଯ୍ୟନ୍ତ ହେଲମେଟକୁ ନେଇ କୌଣସି ନିୟମ ନ ଥିଲା। ଏଥିପାଇଁ କମ୍ପାନୀଗୁଡ଼ିକ ନିଜ ମନ ମୁତାବକ ସବ୍ ଷ୍ଟାଣ୍ଡାର୍ଡର ହେଲମେଟ ନିର୍ମାଣ କରୁଥିଲେ। କିନ୍ତୁ ପରିବହନ ମନ୍ତ୍ରଣାଳୟ ଏହାକୁ ବ୍ୟୁରୋ ଅଫ୍ ଷ୍ଟାଣ୍ଡାର୍ଡର ବାଧ୍ୟତାମୂଳକ ତାଲିକାରେ ସାମିଲ କରିଛି। ବର୍ତ୍ତମାନ ହେଲମେଟର ଓଜନ ୧ କିଲୋ ୨୦୦ଗ୍ରାମ୍ରୁ ଅଧିକ ହେବ ନାହିଁ। ଟ୍ରାଫିକ୍ ପୋଲିସ କେବଳ ହେଲମେଟ ପିନ୍ଧି ନ ଥିବା ବ୍ୟକ୍ତିଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରୁଥିଲା। କିନ୍ତୁ ଏବେ ସବ୍ ଷ୍ଟାଣ୍ଡାର୍ଡର ହେଲମେଟ୍ର ମଧ୍ୟ ଯାଞ୍ଚ କରାଯିବ। ଯେଉଁ କମ୍ପାନୀ ସବ୍-ଷ୍ଟାଣ୍ଡାର୍ଡର ହେଲମେଟ ତିଆରି କରୁଥିବେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ। ଏଥିସହ କମ୍ପୀନୀ ଉପରେ ୨ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ଏବଂ ୬ମାସର ଜେଲ୍ ଦଣ୍ଡ ମଧ୍ୟ ଭୋଗିବାକୁ ପଡ଼ିପାରେ। ରାଜ୍ୟରେ ଏହି ନିୟମ ଲାଗୁ ହେବା ପରେ ଗାଡ଼ି ଚାଳକଙ୍କୁ ହାଲୁକା ହେଲମେଟ ବ୍ୟବହାର କରିବାକୁ ପଡ଼ିବ। ତେବେ ପରିବହନ ବିଭାଗ ମାନ ଅନୁସାରେ ଏହି ନୂତନ ହେଲମେଟ୍ରେ ଭେଣ୍ଟିଲେଟର ରହିବ। ଯାହାଦ୍ୱାରା ଲୋକମାନଙ୍କୁ ନିଶ୍ୱାସ ନେବାରେ ଅସୁବିଧା ହେବ ନାହିଁ ବୋଲି ଜଣାପଡ଼ିଛି।