ମୁମ୍ବାଇ: ସ୍ତ୍ରୀ ହେଲେ ମାସକୁ ମିଳିବ ୨୫ ଲକ୍ଷ। ଜଣେ ବ୍ୟବସାୟୀଙ୍କ ନିକଟରୁ ବଲିଉଡ୍ ଅଭିନେତ୍ରୀ ନୀତୁ ଚନ୍ଦ୍ରାଙ୍କୁ ମିଳିଥିଲା ଏଭଳି ଏକ ଘୃଣ୍ୟ ଅଫର। ଅଙ୍ଗେ ନିଭାଇଥିବା ଏଭଳି ଦୁଃଖଦ ଘଟଣାକୁ ନିକଟରେ ଏକ ସାକ୍ଷାତ୍କାରରେ ସାର୍ବଜନୀନ କରିଛନ୍ତି ସେ। ବି-ଟାଉନ୍ରେ କେତେବେଳେ କାହା ଭାଗ୍ୟ ବଦଳିଯିବ ତାହା କହିବା ମୁସ୍କିଲ୍। ଇଣ୍ଡଷ୍ଟ୍ରିରେ କିଏ କେତେବେଳେ ଉପରକୁ ଉଠିଯାଏ ତ କିଏ କେବେ ହଜିଯାଆନ୍ତି। ଠିକ୍ ସେମିତି ଜଣେ ଅଭିନେତ୍ରୀ ହେଉଛନ୍ତି ନୀତୁ ଚନ୍ଦ୍ରା। ନାୟିକା ନୀତୁ ୨୦୦୫ରେ ଫିଲ୍ମ ‘ଗରମ ମସଲା’ ଜରିଆରେ ବଲିଉଡ୍ରେ ଡେବ୍ୟୁ କରିଥିଲେ। ଏଥିରେ ସେ ଏୟାରହୋଷ୍ଟେସ୍ ଚରିତ୍ରରେ ନଜରକୁ ଆସିଥିଲେ। ଖିଲାଡି ଷ୍ଟାର ଅକ୍ଷୟ କୁମାର ଏବଂ ଜନ୍ ଆବ୍ରାହମ୍ ମଧ୍ୟ ତାଙ୍କ ବିପକ୍ଷରେ ଅଭିନୟ କରିଥିଲେ। ଏହା ପରେ ସେ ‘ଟ୍ରାଫିକ୍ ସିଗ୍ନାଲ୍’, ‘ୱାନ୍ ଟୁ ଥ୍ରୀ’, ‘ଓଏ ଲକି ଲକି ଓଏ’ ଭଳି ସିନେମାରେ ଅଭିନୟ କରିଥିଲେ। ଶେଷ ଥର ପାଇଁ ତାଙ୍କୁ ‘କୁଛ୍ ଲଭ୍ ଜୈସା’ରେ ଦେଖିବାକୁ ମିଳିଥିଲା। ହାତଗଣତି ସିନେମାରେ ଅଭିନୟ କରିଥିଲେ ମଧ୍ୟ ନୀତୁ ଦର୍ଶକଙ୍କ ମନରେ ଛାଡ଼ିଛନ୍ତି ସ୍ବତନ୍ତ୍ର ଛାପ। ତେବେ ମାସିକ ୨୫ ଲକ୍ଷ ଟଙ୍କାରେ ଜଣେ ବ୍ୟବସାୟୀ ନୀତୁଙ୍କୁ ତାଙ୍କର ଧର୍ମପତ୍ନୀ ହେବାକୁ ଅଫର ଦେଇଥିଲେ। ଲୋକମାନେ ବିବାହ ଭଳି ପବିତ୍ର ସମ୍ପର୍କକୁ ନେଇ ଡିଲ୍ କରିପାରନ୍ତି, ଏହା ଭାବିବା ବେଳକୁ ବିଶ୍ୱାସ କରିବା କଷ୍ଟକର ବୋଲି ନୀତୁ କୋହଭରା କଣ୍ଠରେ କହିଛନ୍ତି।