କରାଚୀ,୧୮।୨: ଚଳିତ ପାକିସ୍ତାନ ସୁପର ଲିଗ୍ (ପିଏସ୍ଏଲ)ରେ କରାଚୀ କିଙ୍ଗ୍ସ ତା’ର ସବୁଠୁ ଖରାପ ପ୍ରଦର୍ଶନ ଜାରି ରହିଛି। ଲଗାତାର ୮ ମ୍ୟାଚ୍ରେ ପରାସ୍ତ ହୋଇସାରିଛି ବାବର ଆଜାମଙ୍କ ନେତୃତ୍ୱାଧୀନ ଦଳ। ବୁଧବାର କିଙ୍ଗ୍ସ ତା’ର ୮ମ ମ୍ୟାଚ୍ରେ ଅନ୍ତିମ ଓଭରରେ ମୁଲତାନ ସୁଲତାନ ଠାରୁ ପରାସ୍ତ ହୋଇଥିଲା। ମ୍ୟାଚ୍ ବେଳେ ବାଉଣ୍ଡ୍ରି ଲାଇନରେ ଅଧିନାୟକ ବାବର ଏବଂ ଦଳର ମେଣ୍ଟର ଓ୍ବାସିମ ଆକ୍ରମଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା, ଯାହାର ଭିଡିଓ ଭାଇରାଲ ହୋଇଛି।
କରାଚୀ କିଙ୍ଗ୍ସର ପ୍ରଦର୍ଶନକୁ ଅନେକ ସମାଲୋଚନା କରୁଥିବା ବେଳେ ବାବର ଆଜାମଙ୍କ ପଛରେ ଛିଡ଼ା ହୋଇଛନ୍ତି ପୂର୍ବତନ ପାକିସ୍ତାନ ଅଧିନାୟକ ସଲମାନ ବଟ।
“ମହେନ୍ଦ୍ର ସିଂ ଧୋନୀ କିମ୍ବା ରିକି ପଣ୍ଟିଂଙ୍କୁ ବାଂଲାଦେଶ ଦଳର କ୍ୟାପଟେନ କରାଇଦେଲେ ସେମାନେ ବିଶ୍ୱ ଚାମ୍ପିୟନ ହୋଇଯିବେ ନାହିଁ। ଫ୍ରାଞ୍ଚାଇଜ କ୍ରିକେଟରେ ଦଳରେ ସନ୍ତୁଳନ ନ ଥିଲେ କିଛି କରି ହେବ ନାହିଁ। ବାବରଙ୍କ ପାଖରେ ଥିବା ଦଳରେ ସ୍ପେଶାଲିଷ୍ଟ ନାହାନ୍ତି। ଦଳରେ ମହମ୍ମଦ ନବି, ଇମାଦ ଓ୍ବାସିମ, ଲୁଇସ ଗ୍ରେଗୋରି, କ୍ରିସ ଜୋର୍ଡାନଙ୍କ ଭଳି ଅଲରାଉଣ୍ଡର ଅଛନ୍ତି। ସ୍ପେଶାଲିଷ୍ଟ ପେସ ବୋଲର, ଲେଗ୍ ସ୍ପିନର କିମ୍ବା ବ୍ୟାଟର ନାହାନ୍ତି। କ୍ରିକେଟ ସ୍ପେଶାଲିଷ୍ଟଙ୍କ ଖେଳ, ଅଲରାଉଣ୍ଡରଙ୍କ ନୁହେଁ। ଏଣୁ ଯେତେ ଭଲ ପ୍ଲାନ କଲେ, ତାହାର ଫାଇଦା ମିଳିବ ନାହିଁ” ବୋଲି ପୂର୍ବତନ ଓପନର ସଲମାନ କହିଛନ୍ତି।