କେପ୍ ଟାଉନ୍: ଅଫିସ୍ରେ କାମର ଚାପ ବଢ଼ିବା କାରଣରୁ କର୍ମଜୀବୀ ବ୍ୟକ୍ତି ନିଜ ପରିବାରକୁ ସମୟ ଦେବାରୁ ବଞ୍ଚିତ ହେଉଛନ୍ତି। ଖାଲି ସେତିକି ନୁହେଁ ଓ୍ବାର୍କଲୋଡ୍ କାରଣରୁ ଶରୀରରେ ମଧ୍ୟ ଏହାର ନକାରାତ୍ମକ ପ୍ରଭାବ ପଡ଼ୁଥିବା ଯୋଗୁ ବହୁବିଧ ରୋଗରେ ଲୋକ ଆକ୍ରାନ୍ତ ହେଉଥିବା ଦେଖିବାକୁ ମିଳୁଛି। ଏପ୍ରକାର ସମସ୍ୟାକୁ କିଛିମାତ୍ରାରେ ଲାଘବ କରିବା ପାଇଁ ବିଦେଶୀ କମ୍ପାନୀ ସାମ୍ସଙ୍ଗ୍ ଏକ ସ୍ବତନ୍ତ୍ର ଧରଣ ମାଉସ୍ ତିଆରି କରିଛି, ଯାହାର ନାମ ସାମ୍ସଙ୍ଗ ବାଲାନ୍ସ ମାଉସ୍ ରଖାଯାଇଛି। ଅଫିସ୍ ଟାଇମ୍ଠାରୁ ଅଧିକ ସମୟ କାମ କଲେ ଏହି ମାଉସ୍ଟି ସ୍ବତଃ ଭାବେ କାମ କରିବା ବନ୍ଦ କରିଦେବ। ବିଶେଷ ପ୍ରକାର ଟେକ୍ନୋଲୋଜିରେ ତିଆରି ହୋଇଥିବା ଏହି ମାଉସ୍ରେ ସ୍ବତନ୍ତ୍ର ପ୍ରକାର ଫିଚର୍ ରହିଛି, ଯେଉଁଥିରେ ଅଫିସ୍ ସମୟ ଅତିବାହିତ ହୋଇଗଲା ପରେ ଏହା ହାତରୁ ଖସିଯିବ। ଅର୍ଥାତ୍ ଏହା ନିଜସ୍ବ ସେଲ ବା ଖୋଳରୁ ବାହାରି ଚାଲିଯିବ ଏବଂ ଆଉ ଧରା ଦେବ ନାହିଁ।
ଅଫିସ କାମ ସାଙ୍ଗକୁ ପରିବାର ମଧ୍ୟରେ ସାମଞ୍ଜସ୍ୟ ରକ୍ଷା କରିବା ପାଇଁ ଏହି ମାଉସ୍ ସାହାଯ୍ୟ କରିବ। ତେବେ ସାଉଥ୍ କୋରିଆନ୍ କମ୍ପାନୀ ସାମ୍ସଙ୍ଗ ନିଜ ଅଫିସିଆଲ ୟୁଟ୍ୟୁବ୍ ଚ୍ୟାନେଲରେ ବାଲାନ୍ସ ମାଉସ୍ ନେଇ ଏକ ବିଜ୍ଞାପନ ଜାରି କରିଛି। ଜଣେ କର୍ମଚାରୀ ଅଫିସ୍ ସମୟ ପରେ ଏକୁଟିଆ କାମ କରୁଥିବାବେଳେ ହଠାତ୍ ମାଉସ୍ଟି ନିଜ ସ୍ଥାନରୁ ଦୂରକୁ ଚାଲିଯାଉଛି। ଏହାପରେ ଉକ୍ତ କର୍ମଚାରୀ ଯେତେଚେଷ୍ଟା କଲେ ବି ମାଉସ୍ଟି ଆଉ ଧରା ଦେଉ ନ ଥିବା ଦେଖିବାକୁ ମିଳିଛି। ତେବେ ଏହି ବିଶେଷ ପ୍ରକାର ମାଉସ୍ର ନିର୍ମାଣ ପ୍ରଣାଳୀ ଆରମ୍ଭ ହୋଇଥିବାବେଳେ ଏହା କେଉଁ ସମୟରେ ବଜାରରେ ଉପଲବ୍ଧ ହେବ ତାହା କମ୍ପାନୀ ପକ୍ଷରୁ କୁହାଯାଇ ନାହିଁ।
