ଭୁବନେଶ୍ୱର,୧୪।୮: ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି(ଆଇଆଇଟି), ଭୁବନେଶ୍ୱର ସହ ଆଇଜି ଡ୍ରୋନ୍ସର ଏକ ଦ୍ୱିପାକ୍ଷିକ ବୁଝାମଣା ନିକଟରେ ହୋଇଯାଇଛି। ଏହି ବୁଝାମଣା ଅନୁଯାୟୀ ଆଇଆଇଟି ଭୁବନେଶ୍ୱର ରିସର୍ଚ୍ଚ ଆଣ୍ଡ ଏଣ୍ଟରପ୍ରେନ୍ୟୁରଶିପ୍ ପାର୍କରେ ଡିଜାଷ୍ଟର ମ୍ୟାନେଜମେଣ୍ଟ ଆର୍ ଆଣ୍ଡ ଡି ଉପରେ ଗୁରୁତ୍ୱ ଦେଉଥିବା ଏକ ଆଡ୍ଭାନ୍ସଡ ଡ୍ରୋନ୍ ଏକ୍ସିଲେନ୍ସ ସେଣ୍ଟର ସ୍ଥାପନ କରିବା ପାଇଁ ଏହି ବୁଝାମଣାପତ୍ର (ଏମ୍ଓୟୁ) ଚୁକ୍ତି ସ୍ବାକ୍ଷରିତ ହୋଇଛି। ବିଶେଷକରି ଭାରତ ଏକ ବିପର୍ଯ୍ୟୟପ୍ରବଣ ଦେଶ ହୋଇଥିବାରୁ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଡ୍ରୋନ୍ ଟେକ୍ନୋଲୋଜିର ଗବେଷଣା ଓ ବିକାଶର ଅଗ୍ରଗତି ପାଇଁ ଏହି ସହଭାଗିତା ଏକ ଗୁରୁତ୍ୱପୂର୍ଣ୍ଣ ସଫଳତାକୁ ଚିହ୍ନିତ କରୁଛି। ଏହି ସହଭାଗିତା ମାଧ୍ୟମରେ ସ୍ଥାପିତ ହେବାକୁ ଥିବା ନୂଆ ସେଣ୍ଟର ଅଫ୍ ଏକ୍ସିଲେନ୍ସ (ସିଓଇ) ବିପର୍ଯ୍ୟୟ ପରିଚାଳନା ପ୍ରୟୋଗ କ୍ଷେତ୍ରରେ ଡ୍ରୋନ୍ ଟେକ୍ନୋଲୋଜିର ଅନୁସନ୍ଧାନ ଓ ବିକାଶକୁ ଆଗକୁ ବଢାବା ପାଇଁ ଉତ୍ସର୍ଗୀକୃତ ରହିବ। ଏହି ଆଡ୍ଭାନ୍ସ ଡ୍ରୋନ୍ ଏକ୍ସିଲେନ୍ସ ସେଣ୍ଟର ୨୦୦୦ ବର୍ଗଫୁଟ ଅଞ୍ଚଳରେ ଅବସ୍ଥାପିତ ହେବ। ଯାହା ଅନୁସନ୍ଧାନ ଓ ବିକାଶମୂଳକ ପଦକ୍ଷେପରେ ସହଯୋଗ କରିବା ପାଇଁ ଅତ୍ୟାଧୁନିକ ବ୍ୟବସ୍ଥାରେ ସୁସଜ୍ଜିତ ରହିବ। ଓଡ଼ିଶା ଭାରତର ୧ ନମ୍ବର ବିପର୍ଯ୍ୟୟ ପ୍ରସ୍ତୁତ ରାଜ୍ୟ ଓ ଏହାକୁ ନିଜର ସକ୍ରିୟ ବିପର୍ଯ୍ୟୟ ପରିଚାଳନା ରଣନୀତି ପାଇଁ ବିଶ୍ୱବ୍ୟାପୀ ପ୍ରଶଂସା କରାଯାଉଛି।
ଏ ସମ୍ପର୍କରେ ଆଇଆଇଟି ଭୁବନେଶ୍ୱର ରିସର୍ଚ୍ଚ ଆଣ୍ଡ ଏଣ୍ଟରପ୍ରେନ୍ୟୁରଶିପ ପାର୍କର ସିଇଓ ଡ. ଶୁଭଙ୍କର ପତି କହିଛନ୍ତି, ଆମେ ଆଇଜି ଡ୍ରୋନ୍ସ ସହ ସହଭାଗିତାକରି ବେଶ୍ ଉତ୍ସାହିତ ଅଛୁ; ଯାହା ଅତ୍ୟାଧୁନିକ ଟେକ୍ନୋଲୋଜି କ୍ଷେତ୍ରରେ କାର୍ଯ୍ୟରତ ଷ୍ଟାର୍ଟଅପ୍ଗୁଡିକ ମାଧ୍ୟମରେ ବିପର୍ଯ୍ୟୟ ପରିଚାଳନା ଉପରେ ଆମର ଧ୍ୟାନକୁ ବୃଦ୍ଧି କରୁଛି। ଏହି ସହଭାଗିତା ଆମର ଭିଜନ ‘୧୦୦କ୍ୟୁବ୍’ ସହ ଜଡ଼ିତ ଥିବା ହାଇ ଏଣ୍ଡ ଟେକ୍ନୋଲୋଜି କ୍ଷେତ୍ରଗୁଡିକରେ ଉଦ୍ଭାବନ ଓ ଉଦ୍ୟୋଗିକତା ବିକଶିତ କରିବା ପ୍ରତି ଆମର ପ୍ରତିବଦ୍ଧତାର ଏକ ପ୍ରମାଣ।
ଉଲ୍ଲେଖଯୋଗ୍ୟ, ୧୦୦କ୍ୟୁବ୍ ଓଡ଼ିଶା ୨୦୩୬ରେ ଏକ ଭାଷାଗତ ରାଜ୍ୟ ଭାବେ ୧୦୦ ବର୍ଷରେ ପଦାର୍ପଣ କରୁଥିବାରୁ ୧୦୦ କୋଟି ଟଙ୍କା ଲେଖାଏ ମୂଲ୍ୟର ୧୦୦ଟି ଷ୍ଟାର୍ଟଅପ୍କୁ ସୁଗମ କରିବା ପାଇଁ ଲକ୍ଷ୍ୟ ରଖିଛି। ସେହିଭଳି ଆଇଜି ଡ୍ରୋନ୍ସର ସିଇଓ ବୋଧିସତ୍ୱ ସଂଘପ୍ରିୟା କହିଛନ୍ତି, ଆଇଆଇଟି ଭୁବନେଶ୍ୱର ସହ ଆମର ସହଭାଗିତା ଡ୍ରୋନ୍ ଟେକ୍ନୋଲୋଜି ମାଧ୍ୟମରେ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଅଗ୍ରଗତିର ପ୍ରତିନିଧିତ୍ୱ କରୁଛି। ଏପରିକି ଆର୍ ଆଣ୍ଡ ଡି ଉପରେ ଗୁରୁତ୍ୱ ଦେଇ ଆମେ ବିପର୍ଯ୍ୟୟ ସ୍ଥିତିରେ ଡ୍ରୋନ୍ ପ୍ରୟୋଗର ପ୍ରଭାବଶାଳିତାକୁ ବୃଦ୍ଧି କରିବାକୁ ଲକ୍ଷ୍ୟ ରଖିଛୁ। ଏହି ପଦକ୍ଷେପ ଉଦ୍ଭାବନକୁ ପରିଚାଳନା କରିବ ଏବଂ ବିପର୍ଯ୍ୟୟର ମୁକାବିଲା ଓ ପୁନରୁଦ୍ଧାର କ୍ଷମତାକୁ ଉନ୍ନତ କରିବା ପାଇଁ ଗୁରୁତ୍ୱପୂର୍ଣ୍ଣ ଯୋଗଦାନ ଦେବ।