କେନ୍ଦୁଝର,୪।୨(ନରେଶ ଚନ୍ଦ୍ର ପଟ୍ଟନାୟକ): ସାଧାରଣ ନିର୍ବାଚନ ପୂର୍ବରୁ ସବୁ ବିଷୟ ଉପରେ ଲୋକେ ଟିକିନିକି ନଜର ରଖିଛନ୍ତି। ଏବେ କେନ୍ଦୁଝର ଜିଲାରେ ଆଲୋଚନା ଚାଲିଛି, ୫ ବର୍ଷ ମଧ୍ୟରେ ରାଜ୍ୟରୁ କେନ୍ଦ୍ରରେ ପାଓ୍ବାରଫୁଲ ମନ୍ତ୍ରୀ ହୋଇଥିବା ଧର୍ମେନ୍ଦ୍ର ପ୍ରଧାନ ଓ ଅଶ୍ୱିନୀ ବୈଷ୍ଣବ ଜିଲାବାସୀଙ୍କୁ ଅଣଦେଖା କରିଚାଲିଛନ୍ତି। ଉଭୟ ମନ୍ତ୍ରୀ ହେବା ପରେ ସେମାନଙ୍କ ପାଦ ଜିଲାରେ ପଡ଼ିନାହିଁ। ପଡ଼ୋଶୀ ଜିଲାରେ ପଇଁତରା ମାରିବା ସହ ବିକାଶର ପ୍ରକଳ୍ପ ବିଛାଡ଼ି ଦେଉଥିବା ବେଳେ କେନ୍ଦୁଝରକୁ ଦିନଟିଏ ବି ଆସି ନାହାନ୍ତି। କେବଳ ଆଶ୍ୱାସନାର ବିଷୟ, ଆଖିଦୃଶିଆ ପ୍ରକଳ୍ପ କରି ନ ଥିଲେ ମଧ୍ୟ ଅନ୍ୟତମ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ଜିଲାକୁ ଅନେକ ଥର ଗସ୍ତ କରିଛନ୍ତି।
ଲୁହାପଥର ପରିବହନରୁ ରେଲ୍ଓ୍ବେ ସର୍ବାଧିକ ରାଜସ୍ବ ପାଉଥିବା ବେଳେ କେନ୍ଦୁଝରକୁ ରେଳପଥ କ୍ଷେତ୍ରରେ ଅବହେଳା କରାଯାଇ ଆସୁଛି। ଏଣୁ ରାଜ୍ୟର ସାଂସଦ ଅଶ୍ୱିନୀ ବୈଷ୍ଣବ ରେଳମନ୍ତ୍ରୀ ହେବା ପରେ ଜିଲାବାସୀ ବହୁ ଆଶାବାଦୀ ହୋଇ ପଡ଼ିଥିଲେ। ତାଙ୍କୁ କିଛି ଦିନ ତଳେ ଭାଜପା ବିଧାୟକ ମୋହନ ମାଝୀ ଦେଖାକରି କେନ୍ଦୁଝର ଦେଇ ନୂଆଦିଲ୍ଲୀ ଟ୍ରେନ୍ ଚଳାଇବାକୁ ଦାବି କରିଥିଲେ। ମନ୍ତ୍ରୀ ଟ୍ରେନ୍ ଚଳାଇବା ନେଇ ପ୍ରତିଶ୍ରୁତି ଦେଇଥିଲେ ବୋଲି ତାଙ୍କ ସହିତ ଯାଇଥିବା ଭାଜପା ନେତା ଅଜୟ ସାହୁ କହିଛନ୍ତି। ଏହାକୁ ନେଇ ଜିଲାବାସୀ ଉତ୍ସାହିତ ହୋଇପଡ଼ିଥିଲେ। ତେବେ ଦିନଗଡ଼ିବା ସହ କେନ୍ଦ୍ରମନ୍ତ୍ରୀଙ୍କ କାର୍ଯ୍ୟକାଳ ସରିବାକୁ ବସିଥିଲେ ହେଁ ଟ୍ରେନ୍ ନ ଚାଲିବା ଜିଲା ତଥା ନିଜ ଦଳ ପ୍ରତି ମନ୍ତ୍ରୀଙ୍କ ଆଭିମୁଖ୍ୟକୁ ନେଇ ଚର୍ଚ୍ଚା ହେଉଛି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କ ଦ୍ୱାରା ଉପସ୍ଥାପିତ ଅନ୍ତରୀଣ ବଜେଟରେ ବଡ଼ବିଲରୁ କିରିବୁର ଓ ଗନ୍ଧମାର୍ଦ୍ଦନ ଖଣିରୁ ଗୁହାଳଡ଼ିହି ରେଳ ଷ୍ଟେଶନ ନୂତନ ରେଳପଥ ନେଇ ଘୋଷଣା କରାଯାଇଛି। ଦେଖିବାକୁ ଗଲେ ଏସବୁ ଖଣିଜ ପଥର ପରିବହନ କରି ଅଧିକ ଲାଭ ଉଠାଇବା ଲାଗି ବ୍ୟବସ୍ଥା ହୋଇଛି। କିନ୍ତୁ ଯାତ୍ରୀବାହୀ ଟ୍ରେନ୍ ସମ୍ବନ୍ଧୀୟ କୌଣସି ବିଷୟ ଉଲ୍ଲେଖ କରାଯାଇନାହିଁ। ପୁଣି ଜିଲାରେ ଚାଲିଥିବା ଦୁଇଟି ଟ୍ରେନ୍ରେ ବଗି ସଂଖ୍ୟା ହ୍ରାସ କରାଯାଇଥିବାରୁ ଲୋକମାନେ ଠିଆ ହୋଇ ଅନେକ ସମୟରେ ଯାତାୟାତ କରୁଥିବା ଦେଖାଯାଉଛି। ରେଳମନ୍ତ୍ରୀ ଖୋଦ୍ ନିଜ ଦଳର ବିଧାୟକଙ୍କ ଏକମାତ୍ର ଦାବି ପୂରଣ କରିପାରି ନ ଥିବାରୁ କଂଗ୍ରେସ ପକ୍ଷରୁ ସମାଲୋଚନା କରାଯାଇଛି। ଜିଲା ଯୁବ କଂଗ୍ରେସ ସଭାପତି ସୁନେଶ ଧୀର କହିଛନ୍ତି, ଜିଲାବାସୀଙ୍କ ପ୍ରତି ମନ୍ତ୍ରୀଙ୍କ ଭାବନା ଯେମିତି ରହିଛି, ଆଗାମୀ ଦିନରେ ଭାଜପାକୁ ସେମାନେ ଠିକ୍ ସମୟରେ ଜବାବ ଦେବେ।
କେନ୍ଦ୍ରରେ ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଥିବା ଧର୍ମେନ୍ଦ୍ର ମଧ୍ୟ କେନ୍ଦୁଝର ପାଇଁ ସେମିତି କିଛି କରି ନ ଥିବା ଆଲୋଚନା ହେଉଛି। ଜିଲାରୁ ରାଜକୋଷକୁ ଅନେକ ହଜାର କୋଟି ଟଙ୍କା ଖଣି ରାଜସ୍ବ ଯାଉଛି। ହେଲେ ବେରୋଜଗାର ସମସ୍ୟା ସହିତ ଖଣିଜ ପଥରର ସଦୁପଯୋଗ କରିବା ପାଇଁ ବହୁ ବର୍ଷ ହେଲା ହୋଇ ଆସୁଥିବା ମେଗା ଇସ୍ପାତ କାରଖାନା ପ୍ରତିଷ୍ଠା ଦାବି କେବଳ ଦାବିରେ ରହିଯାଇଛି। ଖଣିଜସମ୍ପଦ ଭରା ଜିଲାରେ ରାଷ୍ଟ୍ରାୟତ୍ତ କମ୍ପାନୀ ଜରିଆରେ ଏକ ମେଗା ଇସ୍ପାତ କାରଖାନା ପ୍ରତିଷ୍ଠା କରିବା ନେଇ କେହି ଆଗ୍ରହ ପ୍ରକାଶ କରି ନାହାନ୍ତି। ଏହାଛଡ଼ା ଶିକ୍ଷାର ବିକାଶ ଦିଗରେ ଅନ୍ୟ ଜିଲାକୁ ଯେଉଁଭଳି ଅନୁଦାନ ମିଳୁଛି, ସେଭଳି ଆର୍ଥିକ ସହାୟତା କେନ୍ଦୁଝରକୁ ମିଳୁନାହିଁ। ଏଣୁ ଦୁଇ ମନ୍ତ୍ରୀଙ୍କ କେନ୍ଦୁଝର ଭଳି ଆଦିବାସୀ ବହୁଳ ଜିଲାକୁ ଏହା ଅବହେଳା ନା ଏଠାରେ ଥିବା ଭାଜପା ସଙ୍ଗଠନକୁ ଅଣଦେଖା ବୋଲି ଅନେକେ ପ୍ରଶ୍ନ ଉଠାଇଛନ୍ତି। ଭାଜପା ବିଧାୟକ ମୋହନ ମାଝୀ କହିଛନ୍ତି, ଦାବି ଉପସ୍ଥାପନ କରିଛୁ, କାମ ହେବ। ଦୁଇମନ୍ତ୍ରୀଙ୍କ ଯୋଗୁ ରାଜ୍ୟରେ କିଛି ବର୍ଷ ହେଲା ବହୁ ବିକାଶମୂଳକ କାର୍ଯ୍ୟ ହୋଇଛି। ତେବେ ସେମାନଙ୍କୁ କେନ୍ଦୁଝର ଜିଲାକୁ ଆମେ ବୋଧହୁଏ ଠିକ୍ ଭାବରେ ଡାକିପାରିନୁ।