ନିରାକାରପୁର,୮ା୫(ଡି.ଏନ୍.ଏ.): ପ୍ରଚଣ୍ଡ ରୌଦ୍ରତାପକୁ ଦୃଷ୍ଟିରେ ରଖି ସରକାରଙ୍କ ଶ୍ରମ ନିୟମ ଅନୁଯାୟୀ ଏପ୍ରିଲ ପହିଲାରୁ ସମସ୍ତ ଶ୍ରମିକ ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଖରାରେ କାମ କରିବା ପାଇଁ ବାରଣ କରାଯାଇଛି। ତେବେ କେତେଜଣ ଅସାଧୁ ଠିକାଦାର ଏହି ନିୟମ ମାନୁନାହାନ୍ତି। ଟାଙ୍ଗୀ ବ୍ଲକ୍ ଅନ୍ତର୍ଗତ କମାଗୁରୁ ପାନୀୟଜଳ ପ୍ରକଳ୍ପ ନିକଟରେ ଯାଇଥିବା ରାସ୍ତାର ସୁରକ୍ଷା ପାଚେରି ନିର୍ମାଣ ଚାଲିଥିବା ବେଳେ ଖରାରେ ଶ୍ରମିକମାନେ କାର୍ଯ୍ୟ କରୁଥିବା ଦେଖିବାକୁ ମିଳିଛି। ସରକାରୀ ନିୟମକୁ ନ ମାନି ଠିକାଦାର ଶ୍ରମିକମାନଙ୍କୁ ଖରାରେ କାମ କରାଉଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଯଦି କୌଣସି ଶ୍ରମିକଙ୍କ ଶରୀର ଖରାପ ହୁଏ ଏଥିପାଇଁ କିଏ ଦାୟୀ ରହିବ ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ଖରାରେ କାର୍ଯ୍ୟ କରୁଥିବା ନେଇ ସେଠାରେ ନିୟୋଜିତ ଶ୍ରମିକଙ୍କୁ ପଚାରିବାରୁ କେହି କିଛି କହି ନ ଥିଲେ। ଅନ୍ୟପକ୍ଷରେ ଏ ସମ୍ପର୍କରେ ବାଲୁଗଁା ଶ୍ରମ ଅଧିକାରୀ ଚନ୍ଦନ ମାଝି କହିଛନ୍ତି, ନିୟମ ମୁତାବକ ଏବେ ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଶ୍ରମିକ ଖରାରେ କାମ କରିବା ପାଇଁ ବାରଣ କରାଯାଇଛି। ଯଦି କେହି ଠିକାଦାର ଅମାନିଆ ହୋଇ କାର୍ଯ୍ୟ କରାଉଛନ୍ତି ଏନେଇ ଉପରିସ୍ଥ ଅଧିକାରୀଙ୍କୁ ଜଣାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।